ءتورت بۇك, ءتورت شىك, ءتورت الشى, ءتورت تايكە

اسىق اتۋ ويىنى بويىنشا وبلىس مەكتەپ وقۋشىلارى اراسىندا  جارىس بولىپ ءوتتى

وبلىس ورتالىعىنداعى №25 جالپى ءبىلىم بەرەتىن قازاق ورتا مەكتەبىندە اسىق اتۋ ويىنى بويىنشا وتكەن جارىسقا وبلىس مەكتەپ وقۋشىلارى جينالدى. العاش رەت ۇيىمداستىرىلعان بۇل شاراعا 10-18 جاس ارالىعىنداعى جاسوسپىرىمدەردەن قۇرالعان, اۋىل­­داردان كەلگەن 9 كوماندا­ قاتىستى. ءسويتىپ, ماي, لەبيا­جى, پاۆلودار, باياناۋىل اۋدان­دارىنىڭ, ەكى­باس­تۇز قالاسى, وبلىس ورتا­لى­عىن­داعى مەكتەپ كوماندالارى ءوزارا سىنعا ءتۇستى. ءار كوماندا قۇرامىندا 3 وقۋشىدان بار. ۇيىم­داستىرۋشىلاردىڭ ايتۋ­ىنشا, اسىق اتۋ ويىنى سپورت­تىق ءتۋرنيرىن وتكىزۋدەگى ماقسات, حالقىمىزدىڭ ۇمىتىلىپ بارا جاتقان ۇلتتىق سالت-ءداستۇر ويىندارىن ناسيحاتتاۋ. اسىق ويىنى – حالقىمىزدىڭ ءداستۇرلى ويىنى سانالادى. يىرگەندە تۇسكەن قالپىنا قاراي اسىق: الشى, تايكە, بۇك, شىك دەپ, ال اتۋعا ارناپ ارنايى قورعاسىن قۇيىلىپ جاسالعانى – ساقا, جاقسىلارى – وڭقاي اتالاتىنىن اۋىلدا وسكەندەر بىلەدى. كىشكەنە كەزىندە اسىق ويناماعان اۋىل بالاسى جوق شىعار. قازىرگى كۇنگى ەلگە تانىمال كوپتەگەن اعالارىمىز دا اسىق ويناپ ءوستى. ۇيىمداستىرۋشىلار جارىستى اسىق ويىنىنىڭ تۇرلەرىنە ساي: قۇمار, تايكە, ومپى, الشى, حان, قاقپاقىل دەپ ءبولدى. مىسالى, قۇمار ويىنعا 2-4 وقۋشى قاتىستى. ويىن­شى­لار كەزەك-كەزەك ءتورت اسىقتى ءيىردى. ءيىرۋشى ءتورت بۇك, ءتورت شىك, ءتورت الشى, ءتورت تايكە ءتۇسىر­دى دە, جۇلدەنىڭ جارتىسىن الدى. ەكىن­شىسىندە, ءتورت اسىق ءتورت ءتۇر­لى ءتۇستى, ياعني تىگىلگەن جۇلدەنى تۇگەل­­دەي الدى دەگەن ءسوز. ومپى ويىنى وي­نالدى. ويىن قىزىقتى ءوتتى. جۇگىرەسىڭ, سەكىرەسىڭ, تەرلەي­سىڭ, كوزدەيسىڭ, تيگىزەسىڭ, ەرەگى­سەسىڭ, جەڭەسىڭ, جەڭىلەسىڭ, ۇتا­سىڭ, ۇتىلاسىڭ. مىنە, بۇل – ناعىز باسەكە. ۇلتتىق تاربيە. ۇلتتىق ۇلگى. سپورت­تىق باسەكە ويىنى: شە­بەر­لىككە, مەرگەندىككە, باتىل­دىق­قا تاربيەلەيدى. جان-جاق­تان ايعايلاعان جانكۇيەرلەر. جارىس قورىتىندىسى بويىنشا وبلىس ورتالىعىنداعى «نازارباەۆ زياتكەرلىك مەكتەبىنىڭ» كومانداسى جەڭىسكە جەتتى. باياناۋىلدىق بالالار ەكىنشى, ەكىباستۇزدىقتار ءۇشىنشى ورىندى يەلەندى. اسىق اتۋ ويىنى جارىسىندا «نازارباەۆ زياتكەرلىك مەكتەبى» كومانداسىنىڭ مۇشەلەرى بەكجان پىشكەمباەۆ, رامازان نازكەي, قاي­رات ماديار جەڭىمپاز اتاندى. «بارىنەن بۇرىن اسىق اتۋ جارى­سىندا وقۋشىلاردىڭ ۇلتتىق ويى­نى­مىزعا دەگەن قۇمارلىقتارى قۋانت­تى», دەيدى جاتتىقتىرۋشى قىلىش ءتۇسىپجانوۆ. فاريدا بىقاي, «ەگەمەن قازاقستان». پاۆلودار وبلىسى. سۋرەتتى تۇسىرگەن ۆلاديمير بۋگاەۆ.