قارابالىق اۋدانى اكىمىنىڭ ورىنباسارى يبراگيم بەكمۇحامەدوۆتىڭ ايتۋىنشا, وتكەن جىلى باستاۋ العان يگى شارالار بيىل دا جالعاسىن تاباتىن بولادى.
– اۋداندا ارنايى جۇمىس توبى قۇرىلىپ, مۇحامەدجان اتامىزدىڭ 150 جىلدىعىن اتاپ ءوتۋ جوسپارى تۇزىلگەن. وسى جوسپاردىڭ نەگىزىندە جاسالعان باعدارلاماعا جيىرما شاقتى ءىس-شارا ەنگىزىلدى. ونىڭ ىشىندە قايراتكەردىڭ ءومىرى مەن قىزمەتى تۋرالى دەرەكتەر مەن تولىق مۇراسىن جەكە جيناق ەتىپ شىعارۋ, «گۇلحاشيما», «توپجارعان» پوەمالارىن ورىس تىلىنە اۋدارۋ كوزدەلىپ وتىر. سونداي-اق عىلىمي-پراكتيكالىق كونفەرەنتسيا, مادەني جانە سپورتتىق ءىس-شارالار ۇيىمداستىرىلىپ, وبلىستىق «قوستاناي تاڭى» گازەتىندە م.سەرالينگە ارنالعان جازبا ايتىس وتەتىن بولادى, – دەدى ي.بەكمۇحامەدوۆ.
ىرگەدەگى ترويتسك قالاسىندا قازاقتىڭ العاشقى قوعامدىق ساياسي جانە ادەبي-مادەني جۋرنالى «ايقاپتىڭ» رەداكتورى بولعان قالام قايراتكەرىنىڭ مەرەيتويى كەزىندە ءوزى اشقان بۇرىنعى «اۋىل», بۇگىنگى «قوستاناي تاڭى» گازەتىنىڭ 100 جىلدىعىنا تۇسپا-تۇس كەلىپ تۇر. وبلىستىق گازەتتىڭ باس رەداكتورى جانۇزاق ايازبەكوۆتىڭ ايتۋىنشا, كوسەمسوزشى وسى گازەتتىڭ العاشقى نومىرىنەن باستاپ, 1926 جىلعا دەيىن ۇزدىكسىز شىعۋىنا تەر توكتى. رەداكتور بولا ءجۇرىپ, گۋبەرنيالىق اتقارۋ كوميتەتىنىڭ توراعاسى قىزمەتىن دە اتقاردى. كەڭەس وكىمەتى ەندى قۇرىلعان كەزەڭدە تىعىرىقتان جول تاۋىپ, رەداكتسيا جۇمىسىن ۇيىمداستىرىپ, العا جىلجىتا ءبىلدى. م.سەراليننىڭ قازاق رۋحانياتىندا الاتىن ورنى ەرەكشە دەيتىنىمىز سوندىقتان.
– مۇحامەتجان سەراليننىڭ ساۋلە تۇسپەگەن, ءالى تولىق باعاسىن الماعان ەڭبەكتەرى بار. الداعى ۋاقىتتا سونىڭ ءبارى سارالانۋعا ءتيىس. مەنى الاڭداتىپ وتىرعانى, ماسەلەن, م.سەرالين قازاق جۋرناليستيكاسىنىڭ اتاسى دەيمىز. ول كىسى شىعارعان «ايقاپ» جۋرنالى بۇكىل قازاق دالاسىنا تاراپ تۇردى. وعان الاش ارىستارى ءۇن قاتقان. ەندەشە, ءبىز بۇل مەرەيتويدى رەسپۋبليكالىق دەڭگەيدە نەگە اتاپ وتپەيمىز؟ نەگە بۇل كىسىنىڭ مەرەيتويىن اتاپ ءوتۋ جونىندە رەسپۋبليكالىق دەڭگەيدە باعدارلاما كورىنبەيدى؟ وسى جاعىنا ءمان بەرىلمەي وتىرعان سەكىلدى. بۇدان وتىز-قىرىق جىل بۇرىن الدىڭعى بۋىن اعا ۇرپاق مۇحامەدجان سەراليننىڭ ۇلتتىق كاسىبي جۋرناليستيكانىڭ نەگىزىن قالاعان ەڭبەگىن جان-جاقتى تالداپ, سارالاپ, زەرتتەدى. قازىرگى بۋىندا وسى جاعى كەمشىن ءتۇسىپ جاتىر. نەگىزىندە, م.سەراليندى مەملەكەت قايراتكەرى دەسەك تە قاتەلەسپەيمىز. ويتكەنى, احمەت بايتۇرسىن ۇلى ەكەۋى قازاقستان ولكەلىك كوميسسياسىنىڭ مۇشەسى رەتىندە قازىرگى قوستاناي وبلىسىن كورشىلەس چەليابى گۋبەرنياسىنىڭ اۋماعىنان قازاقستانعا قايتارىپ الۋعا بەلسەنە كىرىسىپ, وسى ماقساتتا تىزە قوسىپ, ايقاسقان ادامدار. سونىڭ ناتيجەسىندە قوستاناي وبلىسى قايتادان وزىمىزگە قوسىلدى. بۇل تۋرالى دەرەك-دايەك جەتكىلىكتى, – دەدى جانۇزاق ايازبەكوۆ.
