«ۇلتتىق بانك ۇكىمەتپەن بىرلەسىپ, بازالىق مولشەرلەمە دەڭگەيىن قايتا قاراۋى كەرەك», دەدى ە. جاماۋباەۆ ءماجىلىستىڭ جالپى وتىرىسىنان كەيىن تىلشىلەر ساۋالىنا.
وسى ورايدا ول بۇل ماسەلەنى دەپۋتاتتار دا كوتەرگەنىن اتاپ ءوتتى.
«بازالىق مولشەرلەمە ەكونوميكاداعى بارلىق ستاۆكاعا ىقپال ەتەدى, ونىڭ ىشىندە دەپوزيتتەر, نەسيەلەر, كۋپوندى باعالى قاعازدار مەن باسقالارى بويىنشا اسەرى بار. ءبىر جاعىنان ۇلتتىق بانك ينفلياتسيانى تەجەۋ ءۇشىن جوعارى دەڭگەيدە ۇستاپ تۇرۋ كەرەك ەكەنىن العا تارتسا, ءبىز ونىڭ دەڭگەيىن قايتا قاراۋ كەرەك ەكەنىن ايتىپ وتىرمىز. سەبەبى قازىر تەڭگەنىڭ دوللارعا قاتىستى باعامى تۇراقتانىپ, بۇرىنعى دەڭگەيىندە قالىپتاسا باستادى», دەدى مينيستر.
بۇل تۇرعىدا ول ەكونوميكانىڭ ءوسىمىن قامتاماسىز ەتۋ ءۇشىن ءتيىستى ترەندتى قۇرۋ قادامدارىنا كوشۋدىڭ ماڭىزدىلىعىن ايتتى.
ء«تيىستى پايىزدىق مولشەرلەمەسىز ەكونوميكانى نەسيەلەۋگە قاراجاتتى تارتا المايمىز. سوندىقتان اتالعان دەڭگەيدى تومەندەتكەن دۇرىس بولادى», دەدى ە. جاماۋباەۆ.
