«پاستەر-فەرمەنتاتسيا» حالىقارالىق جوباسىن قورىتىندىلاۋعا ارنالعان بەينەكونفەرەنتسياعا فرانتسيانىڭ قازاقستانداعى ەلشىسى ديدە كانەسس, جيۋل گرەۆي كوللەدجىنىڭ ديرەكتورى كاترين مەسنە, اتالعان جوبانىڭ جەتەكشىسى پروفەسسور دانيەل رايشۆارگ جانە نازارباەۆ زياتكەرلىك مەكتەبى مەن پوليني مەكتەبىنىڭ وقۋشىلارى قاتىستى.
عىلىمي جوبا بارىسىندا ەكى ەلدىڭ وقۋشىلارى تاعام ونەركاسىبىندەگى حيميالىق ترانسفورماتسيالار تۋرالى بىلىمدەرىن جەتىلدىرىپ, ىرىمشىك پەن ءسۇت قىشقىلىن وندىرۋدەگى اشىتۋ ۇدەرىستەرى توڭىرەگىندە تاجىريبە الماستى.
– اتالعان جوبا اياسىندا نەگىزىنەن ۇلتتىق تاعامداردىڭ قۇرامىن, دايىندالۋ ادىستەرىن, ونىڭ ادام دەنساۋلىعىنا قانشالىقتى پايدالى نەمەسە زياندى ەكەنىن زەرتتەدىك. ءبىز قۇرت, قىمىز, ىرىمشىك سياقتى ۇلتتىق تاعامداردىڭ ەكولوگيالىق تازا, تابيعي ءونىم ەكەنىن عىلىمي جولمەن دالەلدەپ شىقتىق. پوليني مەكتەبىنىڭ وقۋشىلارىمەن بيولوگيا, حيميا جانە باسقا دا سالالار بويىنشا تاجىريبە الماسىپ, ءبىلىمىمىزدى ارتتىردىق. «پاستەر-فەرمەنتاتسيا» حالىقارالىق جوباسىنىڭ جەتەكشىسى, پروفەسسور دانيەل رايشۆارگ ءبىز جۇرگىزگەن ءسۇت ونىمدەرىنە قاتىستى زەرتتەۋ جۇمىستارىن جوعارى باعالاپ, قىمىز بەن قۇرتتى حالىقارالىق ۇلتتىق تاعامدار كىتابىنا ەنگىزەتىنىن ايتتى. مۇنى ءبىز ءوز ەڭبەگىمىزدىڭ ناتيجەسى دەپ بىلەمىز, – دەدى جوباعا قاتىسقان 9-سىنىپ وقۋشىسى داريا شۋنۋشەۆا.
كونفەرەنتسيانىڭ سوڭىندا فرانتسيانىڭ قازاقستانداعى ەلشىسى ديدە كانەسس حالىقارالىق عىلىمي جوباعا قاتىسقان وقۋشىلارعا العىس ايتىپ, ەكى ەلدىڭ اراسىندا ءوزارا دوستىق قارىم-قاتىناس پەن عىلىمي-مادەني ىنتىماقتاستىقتىڭ ودان ءارى دامي بەرەتىنىنە سەنىم ءبىلدىردى. سونداي-اق ەلشى الداعى ۋاقىتتا فرانتسياداعى جوعارى وقۋ ورىندارىندا گرانت بويىنشا ءبىلىم العىسى كەلەتىن نزم تۇلەكتەرىنە مۇمكىن- دىگىنشە قولداۋ كورسەتەتىنىن ايتتى.
قوستاناي
