تۇتاس ۇلتتىڭ وزگەنىڭ قولجاۋلىعىنا اينالۋدان ارتىق قاسىرەت جوق. وزگەنىڭ ىقپالىنان شىعا الماي, ونىڭ يلەۋىنە كوندىگۋ – بىرەۋلەر ءۇشىن ءتىرى قالۋدىڭ, تىرشىلىگىڭدى امالداپ جالعاستىرۋدىڭ جالعىز جولى ما نەمەسە شاراسىزدىعىڭدى مويىنداپ, قۇردىمعا قۇلاۋعا, كۇشتىنىڭ قۇلقىنىنا جۇتىلىپ, جويىلۋعا بەت الۋ ما؟ بالكىم, ول ەكىنشى بىرەۋلەر ءۇشىن وزگەنىڭ قۇرساۋىن بۇزىپ-جارىپ شىعۋ نيەتىندە ىشتەي شيرىعىپ, كۇش الۋ ءۇشىن ۋاقىتتان ۇتۋ, ءساتتى كەزەگىن سابىرمەن نە تاعاتسىزدانا كۇتۋ ۇدەرىسىندەگى تولعانىستى كەزەڭنىڭ سىرتقى سيپات-كورىنىسى مە؟
وسى ەكى كۇردەلى ساۋالعا تۇششىمدى جاۋاپ ىزدەۋگە ءماجبۇر جۇرتتىڭ قاراسى قالىڭ. بۇلاي بولۋىنىڭ سەبەبى – ءيىلدىرۋ, ەلپەڭدەتۋ, باعىندىرۋ مەن تۇساپ ۇستاۋ تاسىلىمەن وزگەنى تەسپەي سورىپ ۇيرەنىپ قالعان, دانىككەن ءارى قۇنىققان, قورقاۋلىعى مەن قاراۋلىعى باسىم ەلدەر وزدەرىنىڭ يمپەرياليستىك قاساڭ كوزقاراستارىن اۋىر ءارى ەسكى زەڭبىرەكتەي «سۇيرەتىپ» اكەلىپ, ءححى عاسىردىڭ توبەسىنەن ءتوندىرىپ, ونىسىن ۇلى يدەيا رەتىندە جوعارى باعالاۋدان شىمىرىكپەي وتىرعانىندا.
سان الۋان جوبالارىنىڭ ىشكى قالتارىس-بۇلتارىستارىنا, ترانسۇلتتىق كومپانيالارىنىڭ قورجىن-قوسقالاعىنا, ولاردىڭ الىس-بەرىس, بارىس-كەلىس سىندى ءىس-قيمىلدارىنىڭ وزەگىنە, بايلانىس تامىرلارىنا جىمىسقى مۇددەلەرىن جاسىرعان مەملەكەتتەردىڭ ساياسي كۇشتەرىنىڭ السىزدەردى ءبولىسۋ, نارىقتىق الاڭدارعا تالاسۋ, ۇستەمدىك جاساۋ اۋقىمىن كەڭەيتۋ, قىسقاسى قولجاۋلىق ەتۋ باعىتىنداعى باسەكەلەستىگى قىزا تۇسكەن بۇگىنگى كەزەڭدە ارقانى كەڭگە سالۋ قيىن.
بىرەۋدىڭ يلەۋىنە مويىنسۇنۋدان, ىقپالىندا قالۋدان باسقا امالى جوق, سولاي بولا تۇرا قۇردىمعا قۇلاۋدىڭ الدىندا تۇرعانىن مويىنداعىسى كەلمەي, دۇرىسى شىندىققا تۋرا قاراۋعا ءداتى شىداماي جۇرگەندەردىڭ جانە جۇتىلۋعا, وزگەگە ەرىكسىز ءسىڭىپ كەتۋگە بەت بۇرعاننان وزگە جولى قالماعانداردىڭ تابيعي تۇردە جىل سايىن جاڭارتىلىپ وتىراتىن ستاتيستيكاسىن قۇپيا ساناماي, رەسمي تۇردە شىمىرىكپەي جاريالايتىن كەزەڭ دە كەلىپ قالعانداي كورىنەدى. وسىناۋ جاعىمسىز ۇدەرىستەردى جان-تانىڭمەن سەزىنۋ اركىمگە ارقالاي اسەر ەتەر, بىراق جۇتىلۋ قاۋپى انىق تونگەن ۇلتتىڭ كوزى قاراقتى وكىلدەرى ءۇشىن بۇل وڭاي سوققى ەمەس.
قۇدايعا شۇكىر, ءبىزدىڭ تاڭداۋىمىز بەلگىلى. ول – شيرىعۋ, العا ۇمتىلۋ, كىممەن بولسىن تەرەزە تەڭەستىرۋ. ءبىز وزگەگە جۇتىلۋعا, قولجاۋلىق بولۋعا مويىنسۇنعان, ۇمىتسىزدىككە بوي الدىرعان ەل ەمەسپىز. ءوز امبيتسيامىز بار.
راس, كەزىندە كەڭەس وداعىنىڭ قۇرامىندا بولعان شاعىمىزدا ءتىرى قالۋدىڭ, تىرشىلىگىمىزدى امالداپ جالعاستىرۋدىڭ قامىن عانا جەۋمەن بولدىق. بۇل ۇمىتسىزدىك ەلەسى ەزەۋرەگەن كەزەڭنەن, كوڭىلسىز دە جابىعىڭقى ارنادان جالت بەرىپ, كەنەتتەن دەربەستىكتىڭ ءدامىن تاتقان كەزدەن بەرى سىرتقى ىقپالداردىڭ تىرناعىنان جاراقات الىپ قالماۋ جاعىن ويلاستىرا ءارى ىشتەي شيرىعا ءجۇرىپ, جەتىلىپ كەلەمىز. بىراق توسىن مىنەز كورسەتىپ, جەلكە كۇجىرەيتەر شاققا كەلگەنىمىز جوق. سوندىقتان ءدال قازىرگى وڭ نيەتتى مەن بۇكىر پيعىلدىنىڭ اراجىگىن اجىراتا ءبىلۋ قيىن كەزدە ايتاققا ەرۋ ۇلكەن ابەستىك بولار ەدى (ايتاققا ادام ەمەس, يت ەرمەي مە). وتىز جىلدا ءبارى بولا قويمادى دەپ كىجىنگەننەن ەشتەڭە ونبەيدى, ەندى بىزگە وتكەن شاقتاعى قاتەلىكتەرىمىزدەن ساباق الىپ, ونى العا دامۋدىڭ العىشارتى رەتىندە قاراستىرۋ ماڭىزدى.
بۇگىندە مەملەكەت, اتقارۋشى بيلىك ءوزى ورىنداۋعا ءتيىس بارلىق مىندەتتى شىنايى تۇردە موينىنا الۋ ءۇردىسى انىق بايقالادى. بۇل جەردە ەل الدىنداعى جاۋاپكەرشىلىك جۇگىن لايىقتى كوتەرۋگە بەت بۇرۋ ءۇردىسى ەلجاندىلىقپەن ەرىكتى تۇردە جۇزەگە اسىپ جاتىر ما نە ۋاقىت تالابىنا ساي ەرىكسىز جاعدايدا قولعا الىنۋدا ما, ول جاعى ماڭىزدى ەمەس. ەڭ باستىسى, فورمالدى, شىعارىپ سالما, سىرتىن جىلتىراتا سالۋ, وتىرىك ەسەپ بەرىپ «قۇتىلىپ كەتۋ» سىندى قوعامداعى كەلەڭسىز كورىنىستەردىڭ جولى كەسىلۋدە. دەمەك حالىق پەن بيلىكتىڭ ءبىر ارنادا, ورتاق مۇددە ورايىندا ۇيلەسىم تابۋىنا بەتبۇرىس جاسالۋدا.
حالقىنىڭ سەنىمى مەن الەۋەتىنە ارقا سۇيەگەن بيلىگى بار مەملەكەت ەشكىمنىڭ قولجاۋلىعى بولمايدى. ال بيلىگى وزىنە سەنگەن, ءوزىنىڭ رەسۋرسىنا جۇگىنگەن حالىق قاشاندا مەملەكەتتىڭ لايىقتى تىرەگى, جالاڭ, جالعان ەمەس, شىنايى, رياسىز پەيىلدى پاتريوتى بولادى. مىنە, بۇگىندە وسى اتالعان ماسەلەلەر كۇن تارتىبىنە شىعارىلىپ وتىر. بۇل ءوز كەزەگىندە ءبىزدىڭ كەلەشەكتە امبيتسياسى جوعارى ۇلت, سىرتتاي تەرەزەسى تەڭ رەتىندە ساناعانداي كورىنگەنمەن, ىشتەي دەگەنىنە كوندىرگىسى كەلىپ تۇراتىندارعا باتىل تويتارىس بەرۋگە مۇمكىندىگى بار ەل رەتىندە قالىپتاسۋىمىزعا العىشارت بولادى دەپ ويلايمىز.
