قازاقتىڭ زاڭعار جازۋشىسىنىڭ مەرەيتويىن اتاپ ءوتۋ جونىندەگى جالپى رەسپۋبليكالىق جوسپارعا سايكەس بيىل 4 باعىت بويىنشا 82 ءىس-شارا ۇيىمداستىرىلادى.
ونىڭ ىشىندە مۇحتار اۋەزوۆتىڭ ادەبي-مەموريالدىق مۋزەيى عيماراتىنا عىلىمي-رەستاۆراتسيالاۋ جۇمىستارى جۇرگىزىلىپ, شولپان-اتادا جازۋشىنىڭ ءبيۋستى ورناتىلادى.
مەكتەپ وقۋشىلارىنا ارنالعان «اۋەزوۆتانۋ» بەينەدارىستەر تسيكلى ازىرلەنىپ, ادەبي پودكاستتار جاسالادى. حالىقارالىق تەاتر فەستيۆالى وتكىزىلىپ, «اقان-زايرا» تراگەدياسى العاش رەت ساحنالانادى. سونداي-اق «قيلى زامان» پوۆەسى بويىنشا تەلەحيكايا تۇسىرىلەدى.
مادەني ءىس-شارالار اياسىندا شەتەل مۇراعاتتارىندا مۇحتار اۋەزوۆكە قاتىستى قۇجاتتار زەردەلەنىپ, تىڭ ماتەريالداردى ىزدەستىرۋ قاراستىرىلعان. ودان بولەك وڭىرلىك دەڭگەيدە جوسپاردان تىس 500-دەن اسا مەرەكەلىك شارا وتكىزۋ جوسپارلانىپ وتىر. وسىعان بايلانىستى ەرالى توعجانوۆ جازۋشىنىڭ مەرەيتويىن اتاپ وتۋگە بارلىق ءوڭىر اتسالىسۋى قاجەتتىگىن اتاپ ءوتتى.
كەڭەس بارىسىندا ادەبيەتتانۋشىلار مەن جازۋشىلار تاراپىنان مەرەيتويدى اتاپ وتۋگە قاتىستى بىرقاتار ۇسىنىس ايتىلدى.
ۆيتسە-پرەمەر قوعامدىق ماڭىزى بار مادەني-بۇقارالىق, اقپاراتتىق-يميدجدىك, عىلىمي زەرتتەۋ, اعارتۋشىلىق ءىس-شارالاردىڭ جوعارى دەڭگەيدە ورىندالۋى ۇشىن بىرقاتار تاپسىرما بەردى. اتاپ ايتقاندا, مادەنيەت جانە سپورت مينيسترىلىگىنە جوسپار مەن مەرەيتوي لوگوتيپىن بارلىق مەملەكەتتىك ورگانعا ۋاقىتىلى جولداۋدى جانە ونىڭ ىسكە اسىرىلۋى تۋرالى ەسەپتىك اقپاراتتى ۇكىمەتكە توقسان سايىن ەنگىزۋدى تاپسىردى. سونىمەن قاتار مۇددەلى مەملەكەتتىك ورگاندار مەن ۇيىمدارعا جوسپاردىڭ ساپالى ورىندالۋىن قامتاماسىز ەتۋ قاجەتتىگىن ەسكەرتتى.
