Kazakh Invest ۇلتتىق كومپانياسىنىڭ مالىمەتىنشە, Škoda Transportation جانە Elektrotechnika كومپانيالارىنىڭ وندىرىستىك قۋاتىن قازاقستاندا ورنالاستىرۋ مۇمكىندىگى تالقىلاندى.
كەزدەسۋگە Škoda Transportation وڭىرلىك ديرەكتورى رومان سوركين مەن Elektrotechnika بيزنەستى دامىتۋ جونىندەگى ديرەكتورى ليبور نوۆاك قاتىستى. قوس كومپانيا دا ينۆەستيتسيالىق ىنتىماقتاستىقتى دامىتۋعا مۇددەلى.
Kazakh Invest ۇلتتىق كومپانياسىنىڭ باسقارما توراعاسى مەيىرجان يۋسۋپوۆ ماشينا جاساۋ سالاسىنداعى ينۆەستيتسيالىق جوبالاردى قولداۋعا دايىن ەكەنىن اتاپ ءوتتى.
«چەح كومپانيالارى ستراتەگيالىق جانە تەحنولوگيالىق ينۆەستورلار رەتىندە قازاقستاندا تروللەيبۋستار مەن ەلەكتروبۋستار ءوندىرىسىن وقشاۋلاۋ مۇمكىندىگىن زەردەلەپ جاتىر», دەلىنگەن حابارلامادا.
چەح كومپانيالارىنىڭ وكىلدەرى الماتى مەن نۇر-Cۇلتانعا بارىپ, اكىمدىكتەردە كەزدەسۋ وتكىزگەن.
سونداي-اق «قازاقستان تەمىر جولى» ۇلتتىق كومپانياسىنا دا بارعان.
ايتا كەتەيىك, Škoda Transportation – كومپانياسى مەترو, ترامۆايلار, تروللەيبۋستار, تەمىرجول ۆاگوندارى, ەلەكتر پويىزدارى جانە ەلەكتر اۆتوبۋستارى سياقتى كولىك تۇرلەرىنىڭ جەتەكشى ەۋروپالىق وندىرۋشىلەرىنىڭ ءبىرى.
Elektrotechnika مەترو مەن تەمىر جول كولىگىنە, ترامۆاي جانە تروللەيبۋس جەلىلەرىنە ارنالعان ءارتۇرلى تيپتەگى تارتقىش جۇيەلەردىڭ ءىرى ءوندىرۋشىسى رەتىندە تانىمال.
