ىرىكتەۋ كەزەڭىنىڭ جەرەبەسى بويىنشا جارىستى يۋليا پۋتينتسەۆا مەن الەمنىڭ بۇرىنعى ءبىرىنشى راكەتكاسى, «ۇلكەن دۋلىعا» ءتۋرنيرىنىڭ ءۇش دۇركىن چەمپيونى, ريو وليمپياداسىنىڭ كۇمىس جۇلدەگەرى انجەليكا كەربەر باستاپ بەردى. ەكى تەننيسشى دە بۇعان دەيىن ءبىر-بىرىمەن ەكى رەت كەزدەسىپ, ەكەۋىندە دە ا.كەربەردىڭ مەرەيى ۇستەم بولعان. كەزىندە ايەلدەر اراسىنداعى الەمدىك رەيتينگتە كوش باستاعان كەربەر 2018 جىلى ليۋكسەمبۋرگتە وتكەن تۋرنيردە يۋ.پۋتينتسەۆامەن العاش رەت كەزدەسىپ, ەكى سەتتە 6:3, 6:1 ەسەبىمەن جەڭىسكە جەتسە, اراعا جىل سالىپ ەكەۋى 2019 جىلى ينديان-ۋەللستە قايتا جولىقتى. جەرلەسىمىز بۇل جولى دا نەمىس قىزىنا ەش قارسىلىق كورسەتە المادى – 6:0, 6:2. ال ەلورداداعى ءۇشىنشى كەزدەسۋدە يۋليا پۋتينتسەۆا ءوز جانكۇيەرلەرىنىڭ الدىندا كەربەردى تىزە بۇكتىرىپ, ەكى جەڭىلىستىڭ ەسەسىن قايتاردى.
كەزدەسۋدىڭ ءبىرىنشى پارتياسىن قارسىلاستار برەيك الماسۋمەن باستادى. سودان كەيىن كەربەر قارقىنىن ارتتىرىپ, ء«ا» دەگەننەن ەسەپتى 5:1-گە جەتكىزدى. كەيىنگى ەكى گەيمدە يۋ.پۋتينتسەۆا برەيك جاساعانىمەن, ودان ارىگە شاماسى جەتپەدى – 6:3. ەسەسىنە ەكىنشى سەتتە جەرلەسىمىز تاماشا ويىن كورسەتىپ, ءبىرىنشى سەتتەگى قارسىلاسىنىڭ ناتيجەسىن قايتالادى. تابلوداعى ەسەپ 1:1 بولعان مەزەتتە يۋليا برەيك جاساي ءبىلدى. تاعى ءبىر برەيكپەن ءوزىنىڭ گەيمىن دە الدى – 5:1. بۇدان سوڭ انجەليكا ەسەپتى قىسقارتقانىمەن, قازاقستاندىق تەننيسشى سەتتى تاعى ءبىر برەيكپەن ءتامامدادى – 6:3. ءۇشىنشى, شەشۋشى سەتتە پۋتينتسەۆا قاتارىنان ءۇش گەيمدە جەڭىسكە جەتىپ, 3:0 ەسەبىمەن العا كەتتى. ءارى قاراي دا ويىندى ءوز باقىلاۋىندا ۇستاعان قازاقستاندىق تەننيسشى سەگىزىنشى گەيمدە برەيك جاساپ, ويىننىڭ نۇكتەسىن قويدى – 6:2. وسىلايشا, العاشقى كەزدەسۋدەن كەيىن قازاقستان قۇراماسى 1:0 ەسەبىمەن العا شىقتى.
ۇلتتىق قۇراما ساپىندا 15-ءشى جەڭىسىنە قول جەتكىزگەن يۋليا پۋتينتسەۆا قازاقستاندىق تەننيسشىلەر اراسىندا ەڭ كوپ جەڭىسكە جەتكەن سپورتشى اتانىپ, رەكورد جاڭارتتى. بۇعان دەيىنگى رەكورد قازاقستان ايەلدەر قۇراماسىنىڭ قازىرگى كاپيتانى ياروسلاۆا شۆەدوۆا مەن زارينا دياسقا تيەسىلى ەدى. ولار بۇگىنگە دەيىن ۇلتتىق قۇراما ساپىندا 14 مارتە جەڭىسكە جەتكەن بولاتىن. يۋليا بيللي دجين كينگ دوداسىندا 2014 جىلدان بەرى ونەر كورسەتىپ كەلەدى.
– ءبىرىنشى بولىپ سىنعا ءتۇسۋ قاشاندا قيىن. باستاپقىدا ابىرجىعاندىقتان, ءوز-وزىمە كەلە المادىم. ءبىرىنشى سەتتىڭ سوڭىندا سوققىنى سەزىنۋ كەرەكتىگىن ءتۇسىندىم. سوسىن انجەليكانىڭ وسال تۇسىن تابۋعا تىرىستىم. اشىق قالعان جەرلەردى كوزدەپ, ونى كوبىرەك جۇگىرتۋدى ويلادىم. بۇل تاكتيكام جۇزەگە استى. مۇنداي ماتچتا ءاربىر ۇپاي ماڭىزدى. ەرتەڭگى ويىندا دا بارىمىزدى سالامىز», دەدى يۋ.پۋتينتسەۆا ماتچتان كەيىن.
پۋتينتسەۆا-كەربەر كەزدەسۋى اياقتالعان سوڭ كورتقا قازاقستاننىڭ ءبىرىنشى راكەتكاسى ەلەنا رىباكينا مەن گەرمانيالىق لاۋرا زيگەمۋند شىقتى. 2019 جىلى اقش-تاعى جارىستاردا ە.رىباكينا قارسىلاسىن ەكى مارتە جەڭسە, 2021 جىلى گەرمانيالىق تەننيسشى دوحادا ءبىر مارتە ەلەناعا ەسە قايتارعان ەدى.
ە.رىباكينا ءۇشىن لاۋرا زيگەمۋندپەن وتكەن بۇل جولعى ماتچ ءوز كارەراسىنداعى اسا جەڭىل كەزدەسۋدىڭ ءبىرى بولدى دەسەك, قاتەلەسپەيتىن شىعارمىز. 34 جاستاعى ل.زيگەمۋند گەرمانيا قۇراماسىنداعى اسا تاجىريبەلى تەننيسشىنىڭ ءبىرى بولسا دا, وتانداسىمىزعا تەك ءبىر گەيمدە عانا قارسىلىق كورسەتە الدى. ەلەنا ءبىرىنشى پارتيادا قارسىلاسىنا بىردە-ءبىر گەيم بەرمەي, 22 مينۋتتا 6:0 ەسەبىمەن جەڭىسكە جەتتى. ال ەكىنشى سەتتى گەرمانيالىق سپورتشى برەيكپەن باستاعانىمەن, ەلەنا لەزدە تارازى باسىن تەڭەستىرىپ كەتتى. كەيىننەن قاتارىنان بەس گەيمدە ۇستەمدىك تانىتقان جەرلەسىمىز 6:1 ەسەبىمەن ويىندى اياقتادى. ءسويتىپ, ءبىرىنشى كۇنگى ەكى كەزدەسۋدە دە جەڭىسكە جەتكەن قازاقستان قۇراماسىنىڭ تەننيسشىلەرى 2:0 ەسەبىمەن العا شىقتى.
– جانكۇيەرلەر تابلوداعى ەسەپتى كورىپ, ويىن وڭاي بولدى دەپ ويلايتىن شىعار. بىراق ءوز ەلىمدە, جانكۇيەرلەرىمىزدىڭ الدىندا ءبىرىنشى رەت ويناعان سوڭ ازداپ قوبالجۋ بولدى. دەسە دە, بۇگىن سپورت كەشەنىنە جينالعان جانكۇيەرلەرگە جاقسى ويىن كورسەتە الدىم دەپ ويلايمىن. ارينە, لاۋرا جاراقاتىنان ايىعىپ, كورتقا ەندى ورالعاندىقتان, ول كۇشىن تولىق كورسەتە الماعان بولۋى كەرەك. يۋليا پۋتينتسەۆا مەن انجەليكا كەربەردىڭ ويىنىن كورە المادىم. بىراق كەربەردىڭ قالاي وينايتىنىن جاقسى بىلەمىن. ءبىز ءالى كۇنگە دەيىن كورتتا كەزدەسپەگەنبىز, ايتكەنمەن بىرگە جاتتىعىپ جۇردىك. ەرتەڭ جەڭىسكە جەتىپ, قازاقستاندىق تەننيس جانكۇيەرلەرىن قۋانتۋعا تىرىسامىن, – دەدى ە.رىباكينا.
ەرتەسى كۇنى كورتقا قازاقستان مەن گەرمانيانىڭ ءبىرىنشى راكەتكالارى ەلەنا رىباكينا مەن انجەليكا كەربەر شىقتى. ءوز ەلىنىڭ ۇزدىك تەننيسشىلەرى اراسىندا وتكەن ويىننىڭ ءبىرىنشى پارتياسىندا تارازى باسى جەتىنشى گەيمگە دەيىن تەڭسەلىپ تۇردى. جەتىنشى گەيمدە گەرمانيالىق تەننيسشى برەيك جاساپ, ەسەپتە العا شىقتى – 4:3. وسى قارقىنىن جوعالتپاعان ا.كەربەر ءبىرىنشى پارتيادا جەڭىسكە جەتتى – 6:4. ەكىنشى سەتتە كەربەردىڭ قاتەلىگىنەن كەيىن رىباكينا ەسەپتە العا شىعىپ قانا قويماي, بۇل پارتيانى ءوز ەنشىسىنە جازدى – 6:3. ءۇشىنشى, شەشۋشى سەتتە دە قارسىلاستار ۇزاق ۋاقىت ءبىر-ءبىرىنىڭ وسال تۇسىن تابا الماي, جەتىنشى گەيمگە دەيىن تەڭ وينادى – 3:3. سەگىزىنشى گەيمدە كەربەر ماتچقا دوپ بەرگەندە رىباكينا برەيك جاساپ العا شىقسا, كەيىنگى ەكى گەيمدە دە قاتەسىز ويناپ, 7:5 ەسەبىمەن قارسىلاسىنان جەڭىستى ج ۇلىپ الدى. ەلەنا رىباكينا مەن يۋليا پۋتينتسەۆانىڭ تاماشا جەڭىستەرىنەن كەيىن قازاقستان قۇراماسى تاريحتا ءبىرىنشى رەت بيللي دجين كينگ كۋبوگىنىڭ فينالدىق كەزەڭىنە شىقتى.
ال ەشتەڭە شەشپەيتىن جۇپتىق سىندا اننا دانيلينا مەن قۇراماعا العاش قوسىلعان جىبەك قۇلامباەۆا نەمىس قىزدارىنا 1:2 ەسەبىمەن ەسە جىبەردى.
قازاقستان قۇراماسىنان بولەك, اتالعان ءتۋرنيردىڭ فينالىنا جولداما العان 12 ەلدىڭ قاتارىندا اۋستراليا, پولشا, بەلگيا, سلوۆاكيا, كانادا, يسپانيا, چەحيا, شۆەيتساريا, يتاليا جانە اقش تەننيسشىلەرى بار. ال سوڭعى 12-ءشى جولدامانىڭ يەگەرى ءسال كەيىنىرەك قوسىمشا ويىندار ارقىلى انىقتالادى.
