دامحاناعا كىرىپ ساماۋرىننىڭ ءمان-جايىن سۇراستىرىپ كورىپ ەدىك, ەشكىم ماردىمدى جاۋاپ بەرە المادى. قالالىق مۋزەي قىزمەتكەرلەرىنە حابارلاسىپ ەدىك, ول كىسىلەر سۇراستىرىپ ءجۇرىپ, اقىرى جەرگىلىكتى كاسىپورىنداردىڭ بىرىنە تيەسىلى ەكەنىن انىقتاپ بەردى.
«اراي حولدينگ» كومپانياسىنا ەنشىلەس كاسىپورىندا كادر ءبولىمىنىڭ باسشىسى بولىپ جۇمىس ىستەيتىن يرينا كاحوۆسكايانىڭ ايتۋىنشا, الىپ ساماۋرىن پولشاداعى تاڭداۋلى ۇستاحانالاردىڭ بىرىندە ارنايى تاپسىرىسپەن جاسالىپتى. تۇتاستاي مىستان قۇيىلعان. ساماۋرىننىڭ قاقپاعى اشىلادى, شۇمەگى دە بۇرالادى. ىشىنە سۋ تولتىرىپ كادىمگىدەي شاي قويۋعا بولادى. ءبىر ەرەكشەلىگى, كومىرمەن جانادى ەكەن.
– مىس ساماۋرىن تۇرعان جەر بۇگىندە ليساكوۆ قالاسىنىڭ كورنەكى ورىندارىنىڭ بىرىنە اينالدى دەسەك بولادى. الىستان كەلگەن قوناقتاردى سول جاققا اپارامىز. جول بويى ارلى-بەرلى تولاسسىز ءوتىپ جاتقان كولىكتەر دە ءبىر ساتكە ايالداپ, ساماۋرىننىڭ تۇبىندە تۇرىپ سۋرەتكە ءتۇسىپ كەتەدى. ءبىر سوزبەن ايتقاندا, اشىق اسپان استىنداعى جالعىز ەكسپوناتتى مۋزەي سياقتى عوي, – دەدى ي.كاحوۆسكايا.
يرينا ۇيدەي ساماۋرىنعا نەشە ليتر سۋ كەتەتىنىن تاپ باسىپ ايتىپ بەرە المادى. الايدا قالا تۇرعىندارى 400-450 ليتردەي سۋ قايناتۋعا بولادى دەپ شامالايدى. ياعني ءبىر قايناعاندا ءبىر جارىم مىڭنان استام ادامعا شاي بەرۋگە بولادى ەكەن. ءداۋ ساماۋرىن وڭايلىقپەن سۋىمايتىن كورىنەدى, ىشىندەگى قايناعان سۋ ءبىر ساعاتتىڭ ىشىندە نەبارى 2-اق گرادۋسقا تومەندەيدى ەكەن.
قوستاناي وبلىسى,
ليساكوۆ قالاسى
