ءسويتىپ قازىرگى زاماننىڭ دا وزىندىك مال قورعاۋ ءادىسى تابىلىپ جاتىر. ءبىر كەزدە مال يەلەرى جىلقىلاردىڭ موينىنا قوڭىراۋ تاعىپ قوياتىن. ۇرى اكەتىپ بارا جاتقان مالدىڭ قوڭىراۋى شىلدىرلاپ قويا بەرگەندە جىلقىشى ونىڭ قولدى بولعانىن بىردەن سەزە قوياتىن. ءتىپتى ۇيىردەن ءبولىنىپ كەتىپ, تەرىس جايىلعان مالدى تابۋعا دا قوڭىراۋدىڭ پايداسى كوپ تيەتىن ەدى. سول سياقتى قازىر مال شۇعىل قۋىلىپ نەمەسە جايىلىم اۋماعىنان شىعىپ بارا جاتسا ەلەكتروندى چيپ ارقىلى سمارتفونعا قوڭىراۋ تۇسەدى. ار جاعى بەلگىلى, مال يەلەرى, جىلقىشى – ءبارى دەرەۋ دابىل شىققان جاققا اتتانادى...
قازىر سولتۇستىك قازاقستان وبلىسىندا بىرنەشە فەرمەر مالدى وسىلاي باقىلاۋعا العان. سونىڭ ىشىندە ءۋاليحانوۆ اۋدانىندا جىلقى وسىرەتىن ەكى ازامات وسىناۋ زاماناۋي تەحنولوگيالاردى پايدالانۋدا. ولاردىڭ بىرىندە 40 باس, ەكىنشىسىندە 60 باس جىلقى بار. ەكەۋى دە GPS-ترەكەرلەردىڭ پايداسى كوپ ەكەنىنە كوزىن جەتكىزىپ وتىر. تابىنداعى ءبىر جىلقىعا ارنايى ەلەكتروندى باۋ تاعىلسا, تۇتاستاي ءبىر ءۇيىردىڭ قايدا جۇرگەنىن باقىلاۋعا بولادى دەيدى ولار.
پوليتسەيلەر دە GPS-ترەكەرلەردى ورناتۋ – مالدى قىلمىستىق قول سۇعۋدان قورعاۋدىڭ ءتيىمدى جولدارىنىڭ ءبىرى ەكەنىن ايتىپ وتىر. ءتارتىپ ساقشىلارى مال ۇرلىعىن بولدىرماۋ بويىنشا پروفيلاكتيكالىق جۇمىستى اۋىل تۇرعىندارىمەن ۇنەمى جۇرگىزىپ وتىرادى.
«مال ۇرلىعىن بولدىرماۋ – نەگىزگى مىندەتتەرىمىزدىڭ ءبىرى. اۋدانداعى ءىرى شارۋاشىلىقتاردىڭ بارلىعى مالدى ۇيىمداسىپ باعىپ, بىرنەشە باقتاشى جالداعان. ولار كەزەكپەن باعىپ, مال قاراۋسىز قالدىرىلمايدى. قازىرگى ۋاقىتتا حالىقپەن جينالىستار وتكىزىلەدى, وندا تۇرعىندار, باقتاشىلار جانە ۋچاسكەلىك پوليتسيا ينسپەكتورلارى ءىرى قارا مالدىڭ جايىلۋىن ۇيىمداستىرۋ ماسەلەلەرىن شەشەدى. ۋچاسكەلىك پوليتسيا ينسپەكتورلارى باقتاشىلارمەن اڭگىمەلەر جۇرگىزەدى, ۇرلىقتىڭ الدىن الۋعا, جولدىڭ ۇستىنە شىققان جانۋارلاردىڭ كەسىرىنەن ورىن الاتىن جول-كولىك وقيعالارىن بولدىرماۋعا ىقپال ەتەتىن ەرەجەلەردى تۇسىندىرەدى», دەيدى پوليتسيا ءبولىمىنىڭ باستىعى پودپولكوۆنيك رۋسلان ءاليجانوۆ.
وسىنداي جۇمىستار وبلىستىڭ بارلىق اۋماعىندا جۇرگىزىلۋدە. سونىڭ ناتيجەسىندە, مال ۇرلىعىنىڭ سانى جىل سايىن ازايىپ كەلەدى. ەگەر 2019 جىلى 92 مال ۇرلىعى تىركەلسە, 2020 جىلى – 47, 2021 جىلى 29 فاكتى تىركەلدى. بيىل 3 ايدا 3 مال ۇرلىعى بولدى.
سولتۇستىك قازاقستان وبلىسى
