مازمۇندى ءىس-شارا ورتاعاسىرلىق تاريحتى زەرتتەۋدىڭ وزەكتى ماسەلەلەرىن تالقىلاۋ, تاريحي-مادەني مۇرا ەسكەرتكىشتەرىن قايتا قۇرۋ جانە ولاردى ناسيحاتتاۋدا حالىقارالىق تاجىريبەلەردى زەردەلەۋگە ارنالدى.
بۇگىندە قازاقستان مەن تۇركيا اراسىنداعى دوستىق, باۋىرلاستىق ەكى ەل اراسىنداعى ساياسي جانە ساۋدا-ەكونوميكالىق قاتىناستاردى عانا ەمەس, مادەني-گۋمانيتارلىق بايلانىستاردى دامىتۋعا دا ءمان بەرىلگەن. اسىرەسە بۇعان تۇركىتىلدەس حالىقتاردىڭ تاريحي تامىرى مەن مادەني قۇندىلىقتارى ورتاقتىعىنىڭ ىقپالى مول. سوندىقتان قوس مەملەكەت عالىمدارى اراسىنداعى بايلانىس تاريحي-مادەني مۇرانى زەرتتەۋ, ساقتاۋ جانە رەپرەزەنتاتسيالاۋ ماسەلەلەرىن شەشۋدە ۇلكەن ءرول اتقارادى.
سەميناردا مادەنيەت جانە سپورت مينيسترلىگى مادەنيەت كوميتەتى توراعاسىنىڭ ورىنباسارى ماقسات ارعىنبەكوۆ جيىننىڭ ماقساتىنا توقتالا كەلىپ, «بوزوق» جوباسىنىڭ ەلىمىزدىڭ تاريحي-مادەني مۇراسىن دامىتۋداعى بولاشاعى زور ەكەنىن ايتىپ, ونى ۇكىمەت تاراپىنان مادەنيەت جانە سپورت مينيسترلىگى قولدايتىنىن اتاپ ءوتتى. سونداي-اق «بوزوق» مۋزەي-قورىعىنىڭ ديرەكتورى ساۋلە بۋرباەۆا اشىق اسپان استىنداعى «بوزوق» ۇلتتىق پاركىن قۇرۋ جوباسىن تانىستىرسا, تۇركيا مادەنيەت جانە تۋريزم مينيسترلىگى كوللەكتسيالار باسقارماسى فيليالىنىڭ ديرەكتورى ازيمە ەۆرەنسەل «بوزوق» جوباسىنىڭ بىرەگەيلىگىنە تاڭعالىپ, تاريحي-مادەني مۇرانى ساقتايتىن وسىنداي اۋقىمدى جوبالار الەمدە سيرەك كەزدەسەتىندىگىن ءسوز ەتتى. قازاقستانداعى تىكا ۇيلەستىرۋشىسى حيكمەت وزدەنوۋلۋ تۇركيا تاراپىنان جوبانى ىسكە اسىرۋدا ىنتىماقتاستىققا دايىن ەكەندىگىن ايتىپ, تاجىريبە الماسۋ ءۇشىن تۇركيانىڭ مۋزەي ءىسىنىڭ جەتەكشى ماماندارىن قازاقستانعا جىبەرۋ تۋرالى ۇسىنىسىن جەتكىزدى.
ءىس-شارا بارىسىندا قازاقستاننىڭ مۋزەي قىزمەتكەرلەرى ءۇشىن تۇركيانىڭ جەتەكشى مادەني جانە عىلىمي ورتالىقتارىنا تاعىلىمداما ۇيىمداستىرۋ, سول ەلدىڭ الدىڭعى قاتارلى عىلىمي جانە مۋزەي ورتالىقتارىنىڭ رەستاۆراتسيالاۋداعى, كونسەرۆاتسيالاۋداعى حالىقارالىق جۇمىس تاجىريبەسىن زەردەلەۋ مەن مادەني مۇرا سالاسىنداعى جەتىستىكتەرىن جۇرتشىلىققا تانىتۋ ماسەلەلەرى قوزعالدى. سونىمەن قاتار «بوزوق» جوباسىن ىسكە اسىرۋدا اشىق اسپان استىنداعى مۋزەيلەردەگى تاريحي-مادەني مۇرانى رەپرەزەنتاتسيالاۋ جونىندەگى ۇسىنىم تالقىلاندى.
