بۇل بەلگىلى ارحەولوگ ج.قۇرمانقۇلوۆتىڭ جەتەكشىلىگىمەن 2004 جىلدان باستاپ كەشەندى تۇردە جۇرگىزىلىپ كەلە جاتقان شىرىك-رابات ارحەولوگيالىق ەكسپەديتسياسى ەڭبەگىنىڭ جەمىسى. عالىمداردىڭ زەرتتەۋى شىرىك-راباتتىڭ ساق داۋىرىندە ەلىمىزدەگى ەڭ ۇلكەن ەگىنشىلىك ءوازيسى بولعاندىعىن دالەلدەپ وتىر.
– وسى ماڭعا العاش زەرتتەۋ جۇرگىزگەن س.پ.تولستوۆ وتكەن عاسىردىڭ 50-60 جىلدارداعى زەرتتەۋلەر ناتيجەسىنە سۇيەنىپ, شىرىك-راباتتى ارال ماڭى ساقتارىنىڭ استاناسى دەپ اتاعانىن بىلەمىز, ال جاڭا زەرتتەۋلەر ونىڭ ءىرى پانتەون ەكەنىن, ءدىني-رۋحاني ورتالىق بولعاندىعىن كورسەتىپ وتىر. راباتتاعىلار ەگىنشىلىكپەن عانا شەكتەلىپ قالماي, جارتىلاي كوشپەلى مال شارۋاشىلىعىن دا جاقسى يگەرگەن,– دەيدى كىتاپتىڭ جاۋاپتى رەداكتورى, ارحەولوگ ءازىلحان تاجەكەەۆ.
شىرىك-رابات كەزەڭى مەن كەيىنگى ورتاعاسىرلىق داۋىرلەردە سىر بويىنداعى ديقاندار 2,5 ملن گەكتار جەر يگەرىپتى. وسى ماڭداعى قالالىق مادەنيەت ورتالىعى ءبابىش-مولا كەشەنى بولعان دەسەدى. بۇل كەشەنگە ءبابىش-مولا قالاشىعى, عيباداتحانا مەن قورىم, كوزەشىلەر اۋىلى, ەگىنشىلىكپەن اينالىسقان ديقاندار مەكەنى, ءىرى جاساندى سۋلاندىرۋ قۇرىلىستارى, ماگيسترالدى كانالدار مەن ەگىستىك القاپتار كىرەدى.
سولاردىڭ ىشىندەگى ەرەكشەسى – كوزەشىلەر اۋىلى. ماماندار ءىرى قىش كۇيدىرەتىن پەشتەر ارقىلى سىرتقى ساۋداعا دا بۇيىمدار ازىرلەنگەن دەگەن بولجام جاسايدى.
عالىمدار بۇل ەڭبەكتە كەشەندى زەرتتەۋلەردەن بولەك جاراتىلىستانۋ عىلىمدارىنىڭ ادىستەرى كەڭىنەن پايدالانىلعانىن ايتادى.
قىزىلوردا
