پەتروپاۆلداعى زارەچنىي كەنتىنىڭ تۇرعىنى ەسىل وزەنىنىڭ قاراما-قارسى جارىندا سۇلاپ جاتقان ادامدى كورىپ, پوليتسياعا حابارلايدى. ادامنىڭ كىم ەكەنىن انىقتاۋ جانە وعان العاشقى كومەك كورسەتۋ سول ماڭدا پاترۋلدە جۇرگەن پەتروپاۆل قالاسى پوليتسيا باسقارماسىنىڭ ينسپەكتورلارى ەرىك جەتىباەۆ پەن تولەگەن الدابەرگەنوۆكە جۇكتەلەدى.
توپىراق قاتپاعان مۇنداي كەزدە جاردىڭ شەتىن باسۋعا بولمايدى. الايدا ەكسترەمالدى وقيعالاردى قىزىق كورەتىن جاستار جاردىڭ شەتىنە قاساقانا بارادى. «جەڭىس» ساياباعى ورنالاسقان ەسىلدىڭ جاعاسى دا وسىنداي ۋاقىتتا قاۋىپتى. بۇل جاعالاۋ ءبىرشاما بيىك جانە جارلاۋىتتى, قۇلاعان ادام ۇستىنەن كورىنبەيتىن كومەسكى تۇستارى كوپ. سوندىقتان وقيعا ورنىنا كەلگەن پوليتسەيلەرگە بەرگى جاعادا تۇرعان دابىل كوتەرۋشى جىگىت قالتافونمەن ادام جاتقان جەرگە قالاي ءوتۋدى ايتىپ تۇرعان. ايتپەسە قۇلاعان ادام جوعارىدان قۇتقارۋشىلارعا كورىنبەيدى.
«بىرنەشە مينۋت ىشىندە بيىكتىگى 30 مەتر بولاتىن جاردان ساتىلاپ وزەن جاعاسىنا تۇستىك. جاعادا جاتقان قىز بالا ەكەن. ول جاردىڭ شەتىنە دەيىن كەلۋگە قىزىعىپ, توپىراق وپىرىلىپ كەتكەندە جاعاعا قۇلاپ تۇسكەن كورىنەدى. جاتقانىنا ءبىراز ۋاقىت بولعانى قىزدىڭ دىرىلدەپ, قاتتى توڭعانىنان كورىنىپ تۇردى. ءبىز وعان ۇستىمىزدەگى سىرت كيىمدەرىمىزدى جاۋىپ, جىلىتتىق. الايدا جاعاداعى بالشىق اياق اتتاتپادى. جاعداي تۋرالى راتسيامەن جەدەل باسقارۋ ورتالىعىنا بايانداپ, قۇتقارۋشىلار مەن جەدەل جاردەم شاقىرۋدى سۇرادىق», دەيدى تولەگەن الدابەرگەنوۆ.
جەدەل كەلگەن قۇتقارۋشىلار قىزدى ارنايى پلاتفورماعا سالىپ, بارلىعىن بىرگە جار ۇستىندەگى قاۋىپسىز جەرگە الىپ شىققان. بۇل كەزدە مەديتسينا قىزمەتكەرلەرى دە كەلىپ, قاجەتتى كومەك كورسەتەدى.
ابىروي بولعاندا 18 جاستاعى بويجەتكەن قىز امان-ەسەن ءوزىنىڭ جاقىندارىنا ورالدى. ەگەر ەسىلدىڭ ارعى جاعاسىنداعى زارەچنىي كەنتى تۇرعىنىنىڭ قىراعىلىعى بولماسا ونىڭ ءتىرى قالۋى نەعايبىل ەدى. ويتكەنى ەسىن بىلمەي ءتۇنى بويى جاتسا, تۇنگى ىزعار قاتەرلى بولاتىن. ونى ءدال سول كەزدە ىزدەگەن دە ەشكىم بولماعان ەكەن.
پەتروپاۆل
