ايماقتار • 12 ءساۋىر، 2022

دالالىق وزەندەر تاسىپ جاتىر

44 رەت كورسەتىلدى

بۇگىندە اقتوبە قالاسىن باسقان قىزىل سۋدىڭ ەكپىنى قايتقانداي بولدى. ءساۋىردىڭ العاشقى كۇندەرى قالا ىرگەسىندەگى پەچانكا، ەلەك، سازدى وزەندەرىنىڭ كۇرت كوتەرىلۋىنەن باۋ-باقشا ۇجىمىنا قاراستى بىرنەشە تۇرعىن ءۇيدى سۋ باسقان ەدى.

ازىرگە بەلگىلىسى، سول كۇندەرى 136 ءۇيدى سۋ شايىپ، ءۇش ءۇي قۇلاپ قالدى. ۇيلەرىن سۋ باسقان تۇر­عىندار قالانىڭ ءۇش مەكتەبىنە ورنالاستىرىلدى. قازىر №47 مەكتەپتە – 96، №26 مەكتەپتە – 40، №50 مەكتەپتە 20 ادام ۋاقىتشا پانالاپ وتىر. سۋ تاسقىنىنان زارداپ شەككەن تۇرعىندارعا كومەك بەرۋ ماقساتىندا كوميسسيا قۇرىلىپ، اقتوبە قالالىق ءماسليحاتى دەپۋتاتتارى مەن قالالىق اكىمدىك قىزمەتكەرلەرىنەن قۇرالعان توپ سۋ باسقان ءار ءۇيدى ارالاپ، شىعىن كولەمىن ەسەپتەپ جاتىر. ازىرگە سۋ تاسقىنىنان كەلگەن زيان كولەمى انىقتالعان جوق.

سۋ باسقان ۇيلەردىڭ كوپشىلىگى تۇرۋعا جارامسىز، ورتان بەلدەن لاي بالشىق باسقان، ءۇي ءىشى ىلعال، تۇرعىنداردىڭ تۇرمىستىق تەحنيكالارى مەن جيھاز-م ۇلىكتەرى جارامسىز بولىپ قالعان. سوعان قاراماستان مەكتەپتى ۋاقىتشا پانالاعان تۇرعىندار كۇندىز ۇي­لەرىنە بارىپ، ۇيلەرىن تازارتۋعا كىرىستى. ولارعا ۆولونتەرلەر كو­مەككە كەلدى.

وسى كۇندەرى اقتوبە قالاسى­نىڭ ىرگەسىندەگى اقتوبە، سازدى، قارعالى سۋ قويمالارى سۋعا  تولدى. ءتورت جىلدان بەرى قۋاڭ­شىلىققا ۇشىراعان ءوڭىر ءۇشىن بۇل جاقسى جاڭالىق. قازىرگى ۋاقىتتا ارناسىنان اسقان سازدى قويماسىنىڭ سۋى سازدى وزەنىنە بىرتىندەپ جىبەرىلدى. وتكەن اپتا­نىڭ سوڭىندا باستاۋى­ن مۇعال­جار قىراتتارىنان الاتىن ويىل، ساعىز، جەم، ور، ىر­عىز وزەندەرى تاسي باستادى. ويىل وزەنى ارناسىنان شىعىپ، جا­عا­سىنداعى ەكپەتال مەن قارا­تال اۋىلىنا قاۋىپ ءتوندىردى. تو­تەنشە جاعدايلار دەپارتامەنتى قىز­مەتكەرلەرى ەكپەتال اۋىلىنىڭ سۋ باسۋ قاۋپى تونگەن 74 تۇرعىنىن اۋدان ورتالىعىنا كوشىردى. قازىر ەكپەتال ەلدى مەكەنىندە قاۋىپ با­سەڭدەپ، اعىنى قاتتى ويىل سۋى اتىراۋ وبلىسىنىڭ قىزىلقوعا اۋدانىنا جەتىپ، ول جاقتا سۋ تاسىپ جاتىر. وسىلايشا ءتورت جىلدان بەرى ارناسى ابدەن كەپكەن ويىل وزەنىنىڭ ارناسى سۋعا تولىپ، تابيعات شارۋا ادامىنا قولايلى جاعداي تۋعىزدى. سول سياقتى ىرعىز، جەم، ساعىز، تەمىر وزەندەرى دە تاسىدى. ىرعىز اۋدا­نىنىڭ تۇرعىندارى بىلتىر قۋاڭشىلىقتان قاتتى زارداپ شەگىپ، جاڭبىر بولماعاندىقتان، ءشوپ شىقپاي، شىلدە تۋا ءشوپ كۇيىپ كەتكەن بولاتىن. ەندى ىرعىزدىڭ سۋى اقشي ەلدى مەكەنىنىڭ تۇسىنا كەلىپ بوگەتكە تىرەلدى. بىراق تاس­قىن سۋ ءارى قاراي جايىلماعا جىبە­رىلمەگەندىكتەن، نۇرا، جاي­ساڭ­باي، قۇيىلىس جاعىنا سۋ بارماي جاتىر. ىرعىزدىڭ ارعى جا­عىنداعى قۇتيكول، جايساڭباي اۋىلدارىنىڭ تۇرعىندارى سۋدى قانشاما جىلدان بەرى كۇتىپ وتىر. ول جاقتىڭ تۇرعىندارى سۋدى بو­گەۋگە بولمايدى، ءارى قاراي جى­بەرۋ كەرەك دەپ شاعىم ايتىپ جاتىر.

جىل سايىن تورعاي تاسىسا، سۋ بەرى قاراي نۇراعا قۇيىلاتىن. تورعاي ءسال كەشىرەك تاسيدى. الايدا ىرعىز بەن تورعايدىڭ ارناسى قوسىلاتىن قۇيىلىسقا سۋ كەلمەگەلى دە بىرنەشە جىل. بۇگىندە ول جاقتا سۋ كەلمەگەندىكتەن، شا­عىن كولدەر تارتىلىپ، ىرعىز وزەنىنىڭ تورعايمەن قوسىلاتىن سالالارى ابدەن كەۋىپ قالدى. ونىڭ ۇستىنە، تورعايدان دا سۋ كوپ بوگەلەدى. اۋىل تۇرعىندارى ول جاققا قاراي سۋ توقتاۋسىز جى­بەرىلسىن دەگەن پىكىردە. ەگەر تا­بيعاتتىڭ بەرگەن سىيى – تاسقىن سۋدى وزەن ارنالارىندا ۇستاپ قالساق، بيىلعى جازدا مالدىڭ ازىعى مەن ەگىسكە ىلعال مول بو­لادى. بيىلعى سۋ تاسقىنى دالا­­لىق وزەن ارنالارىنداعى ەسكى بوگەتتەردى جاڭارتۋدىڭ قاجەت­تىگىن كۇن تارتىبىنە قويدى.

ر

 

اقتوبە وبلىسى

سوڭعى جاڭالىقتار

تاعى 1650 قازاقستاندىق ىندەت جۇقتىردى

كوروناۆيرۋس • بۇگىن، 09:00

سوفيادان ولجالى ورالدى

سپورت • بۇگىن، 08:40

جاس تەننيسشىلەر جارادى

تەننيس • بۇگىن، 08:32

تۇتىنۋشى قۇقىعىن قورعايدى

قازاقستان • بۇگىن، 08:27

ۇقساس جاڭالىقتار