الەمدىك ارەنادا ەل نامىسىن قورعايتىن سپورتشىلار قاتارى دا ىرىكتەلدى. اتاپ ايتقاندا جاقىندا جۇزۋدەن قازاقستان چەمپيوناتى اياسىندا بيىلعى الەم بىرىنشىلىگىنە باراتىن سپورتشىلار انىقتالدى. وسىعان وراي Olympic.kz جۇزۋدەن قازاقستان چەمپيوناتىن ناتيجەسى مەن بيىلعى الەم چەمپيوناتىنا اتتاناتىن سپورتشىلار ەسىمدەرىن ۇسىنادى.
رەسپۋبليكالىق بىرىنشىلىك اقتوبە قالاسىندا ءوتتى. ەل بىرىنشىلىگىنىڭ ناتيجەسىندە جالپىكوماندالىق ەسەپتە ۇپاي سانى بويىنشا 43 714 ەنشىلەگەن الماتى قالاسىنىڭ قۇراماسى كوش باستادى. 35 266 ۇپايىن ەنشىلەگەن اقتوبە وبلىسىى ەكىنشى ورىننان كورىنسە, نۇر-سۇلتان قالاسىنىڭ كومانداسى 30 096 ۇپاي جيناپ, ۇزدىك ۇشتىكتى تۇيىندەدى.
اتالعان ەل بىرىنشىلىگىندە قازاقستان رەكوردى جاڭاردى. ونىڭ اۆتورى اقتوبە وبلىسىنىڭ وكىلى ديانا تاسجانوۆا. 1500 مەتردى ەركىن ادىسپەن 17:31,08 سەكۋندتا باعىندىرعان اقتوبەلىك ديانا تاسجانوۆاعا تيەسىلى.
چەمپيونات قورىتىندىسى بويىنشا #teamKZ ساپىنان بەس سپورتشىسى سۋ سپورتى بويىنشا 19-شى الەم چەمپيوناتىنىڭ ءنورماتيۆىن ورىنداپ, دۇنيەجۇزىلىك بىرىنشىلىككە قاتىسۋ مۇمكىندىگىنە يە بولدى. ولار:
1. ادىلبەك مۋسين
2. الەكساندر ۆاراكين
3. ايبەك قامزەنوۆ
4. ادەلايدا پچەلينتسەۆ
5. كسەنيا يگناتوۆا
«وتكەن اپتادا ءبىز اقتوبە قالاسىندا وتكەن ەل چەمپيوناتىن اياقتادىق. جارىس ءتورت كۇنگە سوزىلدى. بىراق ءبىزدىڭ كوماندا كليماتقا بەيىمدەلۋ ءۇشىن 14 كۇن ەرتە كەلىپ, وقۋ-جاتتىعۋ جيىنىنا قاتىستى. مەنىڭشە, ەل بىرىنشىلىگىندە بارلىعى جوعارى دارەجەدە ناتيجە كورسەتىپ, قازاقستان چەمپيوناتى جوسپارلاعاندا وتە جاقسى ءوتتى. اقتوبەلىك سپورتشى 1500 مەترگە ەركىن جۇزۋدەن رەسپۋبليكا رەكوردىن جاڭارتتى. ۇلتتىق قۇراما سپورتشىلارى دا ءوز كەزەگىندە وزدەرىنىڭ ۇزدىك ناتيجەلەرىنە قول جەتكىزدى. ال مەنىڭ وسى چەمپيوناتتاعى ناتيجەمە كوڭىلىم تولادى. وسىلايشا ءبىزدىڭ ماۋسىمدى اشىق دەپ جاريالايمىز.
بۇل جارىس ماۋسىم ايىنىڭ ورتاسىندا بۋداپەشتتە وتەتىن الەم چەمپيوناتىنا ىرىكتەۋ كەزەڭى بولعاندىقتان ماڭىزى وتە جوعارى بولدى. ۇلتتىق قۇرامانىڭ نەگىزگى قۇرامىنان بولەك, جارىسقا قاتىسۋ ءنورماتيۆىن ايبەك قامزەنوۆ (اقتوبە) پەن كسەنيا يگناتوۆا (قاراعاندى) ورىندادى. جاستار جارادى. ماڭىزدى دودادا وزدەرىن جاقسى قىرىنان كورسەتەدى دەپ ويلايمىن. بۇل وتە ۇلكەن مۇمكىندىك.
ۆەنگرياعا اتتانعانعا دەيىن شەبەرلىكتەرىمىزدى شىڭداپ, دايىندىقتارىمىزدى تىڭعىلىقتى پىسىقتاۋىمىز قاجەت. دايىندىقتىڭ كەلەسى كەزەڭى تالدىقورعان قالاسىندا, جۋىردا عانا بوي كوتەرگەن جاڭا سپورت كەشەنىندە وقۋ-جاتتىعۋ جيىنى رەتىندە وتەدى. ودان كەيىن ىستىقكولدە جوسپارلانعان جاتتىعۋ جيىنىندا دايىندىق كەزەڭىنە نۇكتە قويامىز», دەدى جۇزۋدەن قازاقستان قۇراماسىنىڭ مۇشەسى ادىلبەك مۋسين.
ايتا كەتەرلىگى, جۇزۋدەن الەم چەمپيوناتى 17 ماۋسىم مەن 3 شىلدە ارالىعىندا ۆەنگريا استاناسى بۋداپەشتتە وتەدى.
ايانا توعانبەك
