«كادرلىق الەۋەتتى تالداۋ اۋداندىق اۋرۋحانالاردا عانا ەمەس, قالالىق جانە وبلىستىق دەڭگەيلەردە دە كادر تاپشىلىعىن كورسەتتى. بىلىكتى ماماندارمەن قامتاماسىز ەتۋ ماقساتىندا جىل سايىن رەزيدەنتۋرادا كلينيكالىق ماماندىقتار بويىنشا كادرلار دايارلاۋعا مەملەكەتتىك ءبىلىم بەرۋ تاپسىرىسى بولىنەدى. 2021 جىلى مەملەكەتتىك ءبىلىم بەرۋ تاپسىرىسى اياسىندا 1500 ورىن ءبولىندى, ونىڭ ىشىندە 26 نەۆرولوگ, 200 انەستەزيولوگ-رەانيماتولوگ, 18 نەيروحيرۋرگ», دەدى ەرالى توعجانوۆ دەپۋتاتتىق ساۋالعا بەرگەن جاۋابىندا.
ونىڭ ايتۋىنشا, مەديتسينا كادرلارىنىڭ بىلىكتىلىك دەڭگەيىن ارتتىرۋ ءۇشىن جىل سايىن رەسپۋبليكالىق بيۋدجەتتەن مەديتسينا قىزمەتكەرلەرىنىڭ كاسىبي دەڭگەيىن ارتتىرۋعا قاراجات بولىنەدى. اتاپ ايتقاندا 2020 جىلى بىلىكتىلىكتى ارتتىرۋدان 10578 دارىگەر ءوتتى, ونىڭ ىشىندە 743 انەستەزيولوگ-رەانيماتولوگ, 269 نەۆرولوگ, 49 مەديتسينالىق رەابيليتولوگ, 34 نەيروحيرۋرگ.
«2021 جىلى جەرگىلىكتى بيۋدجەت شەڭبەرىندە شەتەلدە 161 مامان وقىدى, شەتەلدىڭ جەتەكشى ماماندارىنىڭ قاتىسۋىمەن ماستەر-كلاسستاردا 734 ادام وقىدى, ونىڭ ىشىندە 30 ادام «جۇمىس ىستەۋدىڭ حالىقارالىق جىكتەمەسى نەگىزىندە وڭالتۋ دياگنوزىن قويۋمەن ينسۋلت العان ناۋقاستاردى وڭالتۋداعى مۋلتيديستسيپلينارلىق ءتاسىل» (رف), 11 ادام «جۇمىس ىستەۋدىڭ حالىقارالىق جىكتەمەسى» تاقىرىبىندا وقىتىلدى. بيىل «ينسۋلت كەزىندە مەديتسينالىق كومەك كورسەتۋ» باعىتى بويىنشا 154 دارىگەر (نەۆرولوگ, مەديتسينالىق رەابيليتولوگ, نەيروحيرۋرگ) جانە 220 ورتا مەديتسينالىق قىزمەتكەر وقىتۋ كوزدەلگەن», دەپ تۇيىندەدى ءسوزىن پرەمەر-ءمينيستردىڭ ورىنباسارى.
