قاسىم-جومارت توقاەۆقا جولداۋدا بەرىلگەن تاپسىرمالارىنىڭ ورىندالۋ بارىسى, مينيسترلىكتىڭ ءبىلىم جانە عىلىم جۇيەسىن جاقسارتۋعا باعىتتالعان باستامالارى جونىندە باياندالدى.
پرەزيدەنتكە بالالار قۇقىقتارىنىڭ بۇزىلۋ فاكتىلەرىن ازايتۋ ءۇشىن جەكەمەنشىك بالاباقشالاردىڭ جاۋاپكەرشىلىگىن ارتتىرۋعا جانە مەكتەپ باعدارلامالارى مەن وقۋلىقتاردى ازىرلەۋدىڭ جاڭا تاسىلدەرىنە قاتىستى ۇسىنىستار بەرىلدى.
اسحات ايماعامبەتوۆتىڭ ايتۋىنشا, مەملەكەت باسشىسىنىڭ جولداۋدا بەرگەن تاپسىرمالارى اياسىندا «عىلىم تۋرالى» زاڭعا وزگەرتۋلەر ەنگىزىلگەن. ەندى تاريح, قازاق ءتىلى, فيلوسوفيا, ارحەولوگيا, ماتەماتيكا, شىعىستانۋ جانە باسقا دا سالالار بويىنشا عىلىمي زەرتتەۋ جۇمىستارىمەن اينالىسىپ جۇرگەن 4 مىڭنان استام عالىم تۇراقتى ەڭبەكاقى الادى. عىلىمي جوبالاردى قارجىلاندىرۋ مەرزىمى بۇرىنعى 3 جىلدان 5 جىلعا دەيىن سوزىلدى. جاس عالىمداردى قولداۋ ءۇشىن پوستدوكتورانتۋراعا مىڭ گرانت ءبولىندى. ارنايى كونكۋرستار باستالدى. سونىڭ اياسىندا 2 مىڭنان استام جاس عالىم 17 ميلليارد تەڭگەنىڭ گرانتىن الدى. قاسىم-جومارت توقاەۆتىڭ تاپسىرماسى بويىنشا عالىمداردىڭ الەۋەتىن ارتتىرۋ شارالارى قابىلداندى. جىل سايىن 500 وتاندىق مامان رەسپۋبليكالىق بيۋدجەت ەسەبىنەن الەمنىڭ جەتەكشى عىلىمي ورتالىقتارىندا تاعىلىمدامادان وتەدى.
ءمينيستردىڭ ەسەبىن تىڭداعان پرەزيدەنت مەكتەپتەگى ءبىلىم بەرۋ ساپاسى مەن مۇعالىمدەردىڭ مارتەبەسىن ارتتىرۋ جونىندەگى ماقساتتى جۇمىستاردى كۇشەيتۋدى تاپسىردى. سونىمەن قاتار مەملەكەت باسشىسى جوعارى وقۋ ورىندارىنا ليتسەنزيا بەرۋ ءتارتىبىن جەتىلدىرۋ جانە ىرگەلى زەرتتەۋ جۇمىستارىن جۇرگىزەتىن ينستيتۋتتاردى قولداۋ قاجەت دەپ سانايدى.
