ءبىلىم جانە عىلىم مينسترلىگىنىڭ مالىمەتىنشە, بۇعان دەيىن عالىمداردىڭ جالاقىسى تۇراقتى ەمەس, كونكۋرستاردىڭ ناتيجەسىنە بايلانىستى بولاتىن. ەندى قابىلدانعان زاڭنامالىق تۇزەتۋلەردىڭ ارقاسىندا جەتەكشى عالىمداردىڭ ەڭبەكاقىسى (1200 ادام) بازالىق قارجىلاندىرۋعا قوسىلدى.
بۇل رەتتە عالىمدارعا تولەنەتىن قوسىمشا اۆتورلىق سىياقىنىڭ جالپى سوماسى –338 ملن تەڭگە بولدى. ال يننوۆاتسيالىق جوبالاردى ساتۋدان تۇسكەن كىرىس 16,3 ملرد تەڭگەگە جەتتى.
سونىمەن قاتار 2021 جىلى مينيسترلىك «ۇزدىك زەرتتەۋشى» بايقاۋىن وتكىزىپ, ونىڭ قورىتىندىسى بويىنشا 50 جەڭىمپازدىڭ ارقايسىسى 6 ميلليون تەڭگەدەن الدى. دوكتورانتتاردىڭ شاكىرتاقىسى 2019 جىلعى 82 000 تەڭگەدەن بيىل 195 000 تەڭگەگە دەيىن ءوستى.
«كەيىنگى ەكى جىلدا مينيسترلىك 130 جوبانى جۇزەگە اسىرسا, ونىڭ 120-سى ساتىلىمعا شىقتى. عالىمدارىمىزدىڭ عىلىمي ازىرلەمەلەرىن ەكسپورتتاۋ كولەمى 346 ميلليون تەڭگەدەن استى. وتاندىق عالىمداردىڭ جوباسى قازاقستاندا عانا ەمەس, قىتاي, رەسەي, تۇركيا, چەحيا جانە تاعى باسقا نارىقتا دا سۇرانىسقا يە», دەدى مينيسترلىك.
ءبىلىم جانە عىلىم مينيسترلىگى كادرلىق الەۋەتتى نىعايتۋعا, زەرتتەۋشى عالىمدارعا قاجەت جاعداي جاساۋعا باسا نازار اۋدارىپ وتىر. باسقارما عالىم ماماندىعىن قارجىلىق تۇرعىدان تارتىمدى ەتۋ جانە ماڭىزدى عىلىمي يدەيالاردىڭ تۇراقتىلىعى مەن جۇزەگە اسۋىنا كەپىلدىك بەرۋ بويىنشا جۇيەلى جۇمىس جۇرگىزەدى.
كەيىنگى ەكى جىلدا جاس عالىمداردىڭ سانى مىڭ ادامعا ءوستى. 2018 جىلى ولار 8 مىڭعا جۋىق ادام بولسا, 2021 جىلى عىلىم سالاسىندا 9200 جاس جۇمىسشى ەڭبەك ەتىپ ءجۇر.
ايتا كەتۋ كەرەك, قازاقستاندا بارلىعى 396 عىلىمي ۇيىم بار. ولاردا 22 665 ادام جۇمىس ىستەيدى. ولاردىڭ 54%-ى – ايەلدەر.
