قۇندى بۇيىمداردى توپتاستىرىپ, ەل نازارىنا ۇسىنعان كورمەگە ساحنا ساڭلاعىنىڭ ونەردەگى ۇزەڭگىلەستەرى, ارىپتەستەرى مەن جاقىن جولداستارى, زيالى قاۋىم وكىلدەرى قاتىستى. كينو جانە تەاتر ونەرىنىڭ مەترى ءاسانالى ءاشىموۆتىڭ مەرەيتويىن بارلىق مەكەمەلەر اراسىندا العاشقى بولىپ اتاپ ءوتىپ, جىل بويى وتەتىن تاعىلىمدى شارالاردىڭ شەرۋىن باستاپ, قىزىقتى كورمە ۇيىمداستىرعان الماتى مۋزەيىنىڭ سەرگەكتىگىنە ءمان بەرگەن قالا اكىمىنىڭ ورىنباسارى ارمان قىرىقباەۆ ۇلت مادەنيەتىنە ەڭبەگى سىڭگەن ابىزدى مەرەيتويىمەن قۇتتىقتاپ, كورمە جۇمىسىنا ساتتىلىك تىلەدى.
سونداي-اق م.اۋەزوۆ اتىنداعى ۇلتتىق دراما تەاترىنىڭ ديرەكتورى ەركىن جۋاسبەك, قازاقستاننىڭ حالىق ءارتىسى, پروفەسسور ەسمۇحان وباەۆ, اكادەميك تورەگەلدى شارمانوۆ, اقىن ءجۇرسىن ەرمان, كومپوزيتور التىنبەك قورازباەۆ سەكىلدى ونەر مەن ادەبيەتتىڭ ءىرى وكىلدەرى ءومىرى ونەگەگە, عۇمىرى عيبراتقا, تاعدىرى تاعىلىمعا اينالعان ساحنا سايىپقىرانى ءاسانالى اشىموۆكە اقجارما لەبىزدەرىن اقتاردى. امەريكانىڭ ايگىلى «سانتا-باربارا» تەلەسەريالىندا مەيسوننىڭ ءرولىن ويناعان لەين دەۆيس تە وسى شاراعا ارنايى قاتىسىپ: «قانداي ەل ەكەنىنە قاراماستان, ءبىز ءومىر ءسۇرىپ وتىرعان قوعامنىڭ ونەرىندە مىڭداعان جۇلدىز ءجۇر. بىراق سامساعان جۇلدىزدىڭ ىشىندە ءبىر جۇلدىز ەرەكشە جارقىرايدى. ول – ءاسانالىنىڭ جۇلدىزى. ءاسانالى سياقتى جۇلدىز – بىرەۋ عانا» دەگەن جۇرەكجاردى ءسوزى كوپتىڭ كوڭىلىن تولقىتتى.
الماتى مۋزەيى ۇيىمداستىرعان كورمەدە تەاتر كوريفەيىنىڭ جەكە قورىنان 200-گە جۋىق ەكسپوناتتى قىزىقتاۋعا بولادى. مازمۇندى كورمەگە كورىك بەرگەن جەكە بۇيىمداردىڭ اراسىندا ءوزى تۇسكەن فيلمدەردىڭ تسيفرلىق جيناعى, ەسكى جۋرنالدار مەن كىتاپتار, شەتەلدىك كينو كامەراسى, پورتسيگارلار, شاحمات تاقتالارى, بەلگىلى شەبەرلەردىڭ شابىتتى شىعارماشىلىعىنان تۋعان اۆتوپورترەتتەرى, مۇسىندەرى, ستەرەوپلاستينكالار, ماراپاتتارى مەن مەملەكەت باسشىلارىنىڭ قولى قويىلعان ماڭىزدى قۇجاتتار, كادەسىيلار, ساحنالىق كوستيۋمدەر ەرەكشە كوزگە تۇسەدى.
الماتى
