ايماقتار • 11 ءساۋىر، 2022

ويىلعا سۋ كەلىپ جاتىر

368 رەت كورسەتىلدى

مۇنايلى ءوڭىر جۇرتشىلىعى جايىق، قيعاش، ويىل وزەندەرىندە سۋدىڭ مول بولعانىن قالايدى. الايدا ادامنىڭ قالاۋى ۇنەمى ورىندالا بەرمەيدى. بىرنەشە جىل قاتارىنان جايىق پەن ويىلدىڭ ارناسىنا جەتكىلىكتى سۋ جەتپەگەن ەدى.

جۇرت جايىق پەن ويىل وزە­نىنىڭ مۇشكىل احۋالىنا الاڭ­داپ وتىرعاندا، شاعىن وزەن قاتارىنداعى – نوعايتى توسىن مىنەز تانىتتى. اقتوبە وبلىسىنان باستاۋ الاتىن بۇل وزەن قىزىلقوعا اۋدانىنداعى ساعىز اۋىلى ارقىلى اعىپ، قوڭىرساي وزەنىنە قۇيىلادى. وبلىستىق توتەنشە جاعدايلار دەپارتامەنتى ءباسپاسوز قىز­مەتىنىڭ مالىمەتىنشە، 29 ناۋرىزدا 23.00-دە ساعىز اۋى­لىنىڭ تۇرعىنىنان نوعايتى وزەنىندە سۋ تاسۋ قاۋپى تونگەنى تۋرالى حابار تۇسكەن. ال 30 ناۋرىزدا ساعات 22.00 شاماسىندا وزەن تاسىپ، سۋ دەڭگەيى 3 مەترگە جەتكەن. وسىعان بايلانىستى قىزىلقوعا اۋدانىنىڭ اكىمى نۇرسۇلتان بيسەمبيەۆتىڭ جەتەكشىلىگىمەن قۇرىلعان ارنايى شتاب ساعىز اۋىلىنا كەلدى.

اۋدان اكىمدىگىنىڭ ءباسپاسوز قىزمەتى ءمالىم ەتكەندەي، ساعىز اۋىلىنداعى 20-دان استام ءۇيدى سۋ باسۋ قاۋپى تۋىنداعان ەدى. قاۋىپسىزدىك ءۇشىن سۋ باسۋى مۇمكىن ۇيلەردىڭ تۇرعىندارى №9 ورتا مەكتەپ پەن كوللەدجگە ەۆاكۋاتسيالاندى. جەرگىلىكتى اكىمدىكتىڭ ءتيىستى جۇمىستاردى جەدەل قولعا الىپ، تۇرعىن ۇيلەردى سۋ باسۋ قاۋپى جويىل­دى. وزەن جاعاسىن بەكىتۋ جۇ­مىستارىنا 20-عا جۋىق تەحنيكا تارتىلىپ، اكىمدىك قىز­مەتكەرلەرى، اۋىل تۇرعىندارى، وزگە دە مەكەمەلەر وكىلدەرى مەن ەرىكتىلەردەن قۇرالعان 200-دەن استام ادام جۇمىلدى. ساعىز اۋىل­ى تۇرعىندارىنىڭ ايتۋىن­شا، نوعايتى وزەنى بيىلعى اق­پاننان بەرى ءۇش رەت تاسىعان.

سوڭعى ءتورت-بەس كۇننەن بەرى ويىل وزەنىنە سۋ كەلىپ جاتىر. بولجامدى سۋ كولەمى 32-48 ملن تەكشە مەتردى قۇراۋى مۇمكىن. قازىر ەرالى سۋ تورابىنىڭ ءتورت قاقپاسى اشىلعان.

«بيىلعى 1 ساۋىردە «قازسۋشار» رمك قىزىلقوعا بولىمشەسىنىڭ باستىعى سايلاۋبەك تەمىرعاليەۆپەن بىرگە جاعدايدى باعالاپ، شەشىم قابىلداۋ ماق­ساتىندا ەرالى سۋ تورابى، ويىل وزەنىنىڭ اۋماعى كۇندەلىكتى با­قىلاۋعا الىندى. ميالى اۋىلىن­دا 1،5 شاقىرىم، جانگەلدين اۋىلىن­دا 2 شاقىرىم، جاسقايرات اۋىلىندا 1،4 شاقىرىم، اققورا اۋىلىنىڭ تۇسىندا 600 مەتر بوگەتتى تەگىستەۋ، قالپىنا كەل­تىرۋ جۇمىستارى جۇرگىزىلىپ جا­تىر. بۇل جۇمىسقا 11 تەحنيكا تارتىلدى. اۋىلداردىڭ تۇر­عىندارى، ەرىكتىلەر مەن جاس­تار بوگەت تۇرعىزۋ ءۇشىن 1 مىڭ­نان استام قاپشىققا قۇم تولتىردى. «قاينارمۇنايگاز»، «ساعىزپەترولەۋم» كاسىپورىن­دارى قوسىمشا تەحنيكالار ءبولدى»، دەپ حابارلادى اۋداندىق اكىمدىكتىڭ ءباسپاسوز قىزمەتى.

 

اتىراۋ وبلىسى

سوڭعى جاڭالىقتار

بۇعىبۇلاۋ

قازاقستان • كەشە

جۇزە ءبىلۋ – ءومىر

قوعام • كەشە

ولكەتانۋشى

قازاقستان • كەشە

كەبەنەك

تاريح • كەشە

ساۋكەلە

ونەر • كەشە

ۇقساس جاڭالىقتار