الەۋمەتتىك جەلىنىڭ باعى جانىپ تۇر دەگەنىمىزبەن, گازەت-جۋرنالعا دەگەن ەل ىقىلاسى سۋىماعان ەكەن. كوزىمىزبەن كورىپ, كوڭىلىمىز توعايدى. شاراعا قاتىسقان قاۋىم ىشىندە اسىرەسە, اعا بۋىننىڭ قاراسىنى مول. رەسپۋبليكالىق باسىلىمداردان باستاپ, وبلىستىق, قالالىق مەرزىمدىك باسىلىمدار تۋرالى, ولاردا ۇزدىكسىز جاريالانىپ جاتقان, وقىرمانداردىڭ رۋحاني جان-دۇنيەسىنە تەلەگەي-تەڭىز ءنار بەرەتىن ماتەريالدار حاقىندا, جالپى ءار باسىلىمنىڭ ۇستانىمى, الدىنا قويعان اسقارالى مىندەتى, بەت الىسى, كوزدەگەن كوكجيەگى, قاۋزاعان دۇنيەسى تۋرالى كەسەك-كەسەك وي ايتىلدى. وسى جولداردىڭ اۆتورى, ءجۇز جىلدىق تاريحى بار ەل گازەتى – «ەگەمەننىڭ» بۇگىنگى باعىتى تۋرالى ءسوز ونەرىن قادىر تۇتاتىن قاۋىمعا ەگجەي-تەگجەيلى ءتۇسىندىرىپ, تاراتىپ ايتىپ بەردى.
ءبىزدىڭ ءسوزىمىزدى تىرىلتكەن ەل اقساقالدارىنىڭ ءبىرى, بايىرعى جۋرناليست سايلاۋ كوشكەنوۆ باس باسىلىمدا جاريالانىپ جاتقان تولىمدى تاقىرىپتاردى قامتيتىن تاريحي ماتەريالداردىڭ, ۋاقىت توزاڭى تۇمشالاعان شاڭىنان ارشىپ الىپ, الاش بالاسىنىڭ تۇپكى تاريحىنا قاتىستى تۇگەل ءسوزدىڭ توركىنىن سيپاتتايتىن تاماشا دۇنيەلەردى مىسال ەتە وتىرىپ, ءوز ويىن ءبىلدىردى. جىل باسىندا جازىلۋعا مۇمكىندىگى بولماي قالعاندار ءوز وكىنىشتەرىن دە ايتىپ, وسى جارتىجىلدىقتان باستاپ جازىلعالى كەلگەندىكتەرىن جەتكىزىپ جاتتى. ىقىلاستارىنا قاراعاندا, باس باسىلىمعا جانە وزگە دە بۇقارالىق اقپارات قۇرالدارىنا دەگەن وڭ كوزقاراس بار ەكەن. جازعان ءسوزىمىزدىڭ دىتتەگەن جەرىنە جەتەتىندىگىن تۇيسىنگەن سايىن كوڭىل ءوسىپ, قالامىڭدى قۇشىرلانا سىلتەگىڭ كەلەدى ەكەن.
– وتكەن جىلدىڭ سوڭىندا قارجى تاپشىلىعىنا بايلانىستى جازىلا الماپ ەدىك, – دەدى وبلىس ورتالىعىنداعى جوعارى وقۋ ورنىنىڭ باسشىسى, – بيىل ناۋبەت جىلدارىنداعى ەل باسىنان كەشىرگەن الاپات وقيعانى سيپاتتايتىن ءبىر ماتەريالدى ىزدەپ, قانشاما اۋرە بولدىق. ەندى ۋاقىتىندا جازدىرىپ الۋعا ۇمتىلىپ وتىرمىز.
«ەگەمەننىڭ» ەل ىزدەپ ءجۇرىپ وقيتىن باسىلىم ەكەندىگىن وسى ءبىر جالعىز اۋىز ءسوزدىڭ استارىنان اڭعارۋعا بولادى. ءارى بۇگىنگى باعىتى كوپشىلىكتىڭ كوكەيىندەگى سۇرانىستى ءدوپ باسىپ وتىر.
جيىن بارىسىندا جەرگىلىكتى گازەت-جۋرنالدارعا تەگىن جازۋ ۇيىمداستىردى. لوتورەيا ويناتىلدى. رەسپۋبليكالىق «كازاحستانسكايا پراۆدا» گازەتىنىڭ ءتورت سىيلىعى ۇتىس ويىندارىندا باعى جانعان وبلىس ءوڭىرىنىڭ ءار تۇكپىرىندە تۇراتىن جازدىرىپ الۋشىلارعا جونەلتىلدى. سىباعالى سىيلىقتىڭ ىشىندە ىقشام, ادەمى قولسومكە دە بار ەكەن. سىرتىنا باسىلىمنىڭ اتاۋى جازىلىپتى. كادىمگىدەي كوزتارتارلىق. قولىنا ۇستاپ جۇرگەن ادام جاياۋ ءجۇرىپ جارناما جاساپ بارا جاتاتىنداي. ەڭ باستىسى, ەل ىقىلاسى ەسكەرىلدى. باسىلىم مەن وقىرمان اراسىنداعى نازىك بايلانىستىڭ ارقاۋىن بەكىتە تۇسكەندەي.
– وتكەن جىلعى باسىلىمدارعا جازىلۋ ناۋقانى اۋىرلاۋ ءوتتى, – دەيدى «قازپوشتا» اكتسيونەرلىك قوعامىنىڭ وبلىستىق فيليالىنىڭ باسشىسى قايرات بەكەنوۆ, – بىراق, ءبىز باسىلىمنىڭ وكىلدەرىمەن بىرلەسە وتىرىپ, قاجىرلى جۇمىس ىستەدىك. قالاي بولعان كۇندە دە ادامدار گازەت وقۋى كەرەك قوي. قازىر شالعايداعى شاعىن اۋىلدارداعى پوشتا جۇمىسىن جانداندىرۋعا كۇش سالىپ جاتىرمىز. پوشتا قىزمەتكەرلەرىنىڭ ەڭبەكاقىسى دا ءوستى.
كوپ بولىپ يلەگەن ءبىر تەرىنىڭ پۇشپاعى كوزدەگەن ماقساتىنا جەتسە, زامانداستارىمىزدىڭ رۋحاني الەمىن جارقىراتاتىن, نارلەندىرەتىن ازىقتىڭ ۋىزى مولايا تۇسپەك. سوعان جازسىن دە...
كوكشەتاۋ قالاسى.
