قوعام • 08 ءساۋىر، 2022

ولاردىڭ دا ونەرگە بار تالاسى

955 رەت كورسەتىلدى

ءار ادامنىڭ وزىندىك قابىلەتى بار. بالكىم، ءبىرىنىڭ ون ەكى مۇشەسى ساۋ، كەيبىرىنىڭ مۇمكىندىگى شەكتەۋلى شىعار. بىراق ەرەكشە قولداۋدى قاجەت ەتەتىن جانداردىڭ دا ومىرگە، ءتىپتى ونەرگە تالپىنىسىن قولداماۋعا بولا ما؟

وبلىستىق جۇمىسپەن قامتۋ­دى ۇيلەستىرۋ جانە الەۋمەتتىك باعدارلامالار باسقارماسىنىڭ باسشىسى ازامات مامبەتوۆتىڭ مالىمەتىنشە، مۇنايلى وڭىردە مۇمك­ىندىگى شەكتەۋلى 23 656 ادام بار. ونىڭ ىشىندە ءبىرىن­شى توپ­تا­عى مۇگەدەكتەر – 2 011، ەكىنشى توپتا – 9 480، ءۇشىنشى توپ ساناتىن  8 358 ادام العان. سونداي-اق مۇگەدەك با­لا­لاردىڭ سانى 3 807-ءنى قۇ­راپ وتىر. بىلتىر ولار الەۋ­مەت­تىك قىزمەتتەر پور­تا­لى ارقىلى تەحنيكالىق وڭال­تۋ قۇرالدارىنىڭ 55 تۇرىمەن، ساناتوري-كۋرورتتىق ەمدەۋ قىز­مەتى، جەكە كومەكشى مەن ىم­داۋ ءتىلى ماماندارىنىڭ كومە­گى­مەن قامتىلعان. ماسەلەن، پور­تال ارقىلى 16 434 ادامنىڭ ءوتىنىشى قابىلدانىپ، ونىڭ 14 798-ci قاجەتتى قۇرالدارمەن، تيفلو-تەحنيكالىق، سۋردو-تەح­ني­­­كالىق، گيگيەنالىق، پرو­تەز-ورتوپەديالىق جانە قىز­مەت­تەر­مەن قامتاماسىز ەتىلگەن. مەم­لەكەتتىك الەۋمەتتىك تاپسى­رىس شەڭ­بەرىندە 305 ادام 22 ين­ۆاتاكسيمەن 9 914 رەت تاسى­مال­دانعان.

ال «ازاماتتارعا ارنالعان ۇكىمەت» مەملەكەتتىك كورپورا­تسيا­سى» كەاق اتىراۋ فيليا­­لى­نىڭ ديرەكتورى مۇسا حاي­رۋل­ليەۆتىڭ ايتۋىن­شا، №1 حا­لىققا قىزمەت كور­سە­تۋ ور­تا­لىعىندا ەرەكشە قاجەت­تى­لىگى بار جاندار ءۇشىن تسيفر­­لىق قىزمەت بۇرىشى اشىل­­عان. ارنايى بۇرىشتا ەرەك­­شە قاجەتتىلىگى بار ادامدار مەم­­لەكەتتىك قىزمەتتەردى ءوز بەتىن­شە الۋىنا جاعداي جا­سالىپ وتىر. مۇندا ەستۋ جانە سوي­لەۋ قابىلەتى ناشار كليەنت­تەر­­دىڭ پايدالانۋىنا تولىق بە­يىمدەلگەن كومپيۋتەرلەر ورناتىلدى. كومپيۋتەرلەر قۇ­لاققاپتارمەن، ارنايى پەر­نە­تاقتامەن جابدىقتالدى. باع­­دار­لا­ما بارلىق قاجەتتى اقپا­رات­تى قۇلاققاپ ارقىلى جى­بە­رەدى. قا­زىر اتالعان فيليال­دا ەرەكشە قاجەتتىلىگى بار 25 ادام جۇ­مىس ىستەيدى. ولاردىڭ ارا­سىن­­دا ارنايى بۇرىش اشۋدى ۇسىنعان ايبەك يداياتوۆ پەن اينۇر مۇستاجاپوۆا دا بار.

ماسەلەن، سونداي جان­دار­دىڭ اراسىندا ەلىمىزگە عانا ەمەس، الەمگە تانىلعان اتى­راۋ­لىقتار بار. وتكەن جىلى اتىراۋ وبلىسىنان توكيودا وتكەن پارا­ليم­پيا­دا­عا التى دزيۋدوشى، ءبىر تاەكۆوندوشى مەن ءبىر ءجۇزۋشى قا­تىستى. ونىڭ ۇشەۋى – پارا­دزيۋ­­دوشىلار ءانۋار ساريەۆ، تەمىرجان داۋلەت پەن زارينا بايباتينا پاراليمپيادا ويىن­دا­رىنىڭ كۇمىس جۇلدەگەرى اتاندى.

ء«بىز دە ادامبىز» قورىن قۇر­عان گۇلناز قوسمۇرزيەۆا مۇم­كىندىگى شەكتەۋلىلەردىڭ دە قوعامنىڭ بەلدى مۇشەسى ەكەنىن ناسيحاتتاپ ءجۇر. ەندى ول ەرەكشە قاجەتتىلىگى بار ادامدارعا ارت-تەراپياسىن جۇرگىزۋ ءۇشىن ينكليۋزيۆتى تەاتر اشۋ جوباسىن قولعا الىپ وتىر.

– ينكليۋزيۆتى تەاتر – مۇم­كىن­دىگى شەكتەۋلى جانداردىڭ قا­تى­سۋىمەن وتەتىن ساحنالىق ارە­كەت. ءبىز قور رەزيدەنتتەرى اراسىندا ساۋالناما جۇرگىزىپ، اتىراۋ قالاسىندا مۇمكىندىگى شەكتەۋلى جانداردىڭ ۋاقىتىن وتكىزۋگە قولايلى ورىن جوق دە­گەن قورىتىندىعا كەلدىك. سو­دان سوڭ ينكليۋزيۆتى تەاتر اشۋ جونىندە يدەيا تۋىندادى. شىن­دىعىندا، ءتيىستى جاعداي جاسال­ماسا، مۇگەدەك ادامداردى الەۋ­مەتتەندىرۋ مۇم­كىن ەمەس. يدەيا تۋىنداعاننان كەيىن جوبا دايىنداپ، قار­جى­لاي كومەك كور­سەتەتىن دەمەۋشىلەردىڭ قول­داۋى­مەن العاشقى قادامعا كى­رىس­تىك. ءبىزدىڭ ويىمىزشا، ينكليۋزيۆتى تەاتردىڭ كو­مە­گىمەن مۇ­گەدەك جان­دارعا الەۋ­مەتتىك وڭال­­تۋ جۇر­­گىزىپ، ولار­دىڭ دا قو­عام­­نىڭ بەلسەندى مۇ­شەسى رەتىن­دەگى بەينەسىن قا­لىپ­­تاس­تى­رۋعا ىق­پال ەتەمىز، – دەيدى گۇلناز قوسمۇرزيەۆا.

جاڭا جوبانىڭ ۇيلەستىرۋ ءىسىن اربا ۇستىندەگى بيدەن قا­زاق­ستان­نىڭ بىرنەشە مارتە جەڭىم­پا­زى اتانعان ەسبولات بالا­با­ەۆ قولعا العان. ونىڭ ايتۋىنا قاراعاندا، ينكليۋزيۆتى تەاتر­دا ۆوكال، بي، اكتەرلىك شەبەرلىك، سويلەۋدى تۇزەۋ جانە دامىتۋ باعىتىندا ارنايى ۇيىرمە اشىلادى. تەاتر ارتىستەرى جىل سوڭىنا دە­يىن ەكى ساحنالىق قويىلىم مەن ەكى شى­عار­ماشىلىق كەش ۇيىم­داس­تى­رۋدى كوزدەپ وتىر.

– ءوزىمنىڭ تاجىريبەمە سۇ­يە­­­نىپ، شىعارماشىلىق جۇ­مىس­­تىڭ تەرىس ەموتسيالارمەن، وق­شاۋ­لا­نۋمەن، سونداي-اق دەپرەسسيا­مەن كۇرەسۋگە كو­مەك­تەسەتىنىن بى­لە­مىن. سول سەبەپتەن وسى جو­با­­نىڭ جۇزەگە اسى­رىلاتىن ءساتىن تا­عات­­سىز­دانا كۇتىپ ءجۇر­مىن. ەرە­ك­شە ارتىستەرىمىز شىعار­ما­شى­­لىق ارقىلى ءوزىن ءوزى ءتۇسىنۋ، وزگە­لەرمەن بايلانىس ورناتۋ سەكىل­دى قابىلەتىن جاقسارتادى. ويت­كەنى تاعدىردىڭ جازۋىمەن مۇگەدەكتىككە ۇرىنعان ادام­دار ءتۇرلى ستەرەوتيپكە بوي الدىرادى. ءسويتىپ، جاڭا الەۋ­مەت­تىك بايلانىس ورناتۋدان ال­شاقتايدى. بۇرىنعى تانىس­تا­رىمەن بايلانىسىن ۇزەدى. مۇنى قوعام مەن ادامداردىڭ وزدەرى جاساپ وتىرعان جاساندى كەدەرگىلەر دەۋگە بولادى. ءبىز­دىڭ ماقساتىمىز – وسىنداي كەدەرگىلەردى جويىپ، ەرەكشە جان­داردىڭ شىعارماشىلىق الە­ۋەتىن دامىتا الاتىن ورتا قا­لىپتاستىرۋ. ينكليۋزيۆتى تەاتر­دى تەراپيانىڭ ءبىر تۇرىنە اي­نالدىرساق دەگەن ويىمىز بار، – دەيدى ەسبولات بالاباەۆ.

 

اتىراۋ وبلىسى

سوڭعى جاڭالىقتار

قازاقستاندا قانشا ادام ۆاكتسينا الدى

كوروناۆيرۋس • بۇگىن، 10:42

ۇقساس جاڭالىقتار