ەر ەڭبەگى ەلەنسىن

سەناتور ءلاززات قيىنوۆ باستاعان ءبىر توپ حالىق قالاۋلىسى قازاقستان رەسپۋبليكاسى پرەمەر-ءمينيسترىنىڭ اتىنا دەپۋتاتتىق ساۋ­ال جولدادى. وندا بىلاي دەلىنگەن: «ەلباسىمىز ن.ءا.نازارباەۆ جالپى­­عا ورتاق ەڭبەك قوعامىن قۇرۋ ءمىن­دەتىن العا قويىپ وتىرعان قازىرگى كەزەڭدە ەڭبەك ادامىنىڭ قادىر-قاسيەتىن ارتتىرۋ, ولاردىڭ اراسىنان جۇزدەن جۇيرىك, مىڭنان تۇلپار شىققانداردى ارداقتاۋ ءارى ماڭىزدى, ءارى قاجەتتى. مەملەكەتىمىزدىڭ تاريحىندا اتى قانداي قۇرمەتتەۋگە دە لايىقتى تۇلعا­لار­دىڭ ءبىرى – سافي وتەباەۆ. توقساننىڭ سەگىزىنە كەلىپ ومىردەن وتكەن بۇل اسىل ادام جايىندا تانىمال جۋرناليست ساۋىتبەك ابدراحمانوۆ «ەگەمەن قازاقستان» گازەتىندە 2008 جىلعى 4 ساۋىردە جاريالانعان «مۇ­ناي­اتا» اتتى ماقالاسىندا: «جيىر­­ماسىنشى عاسىردا بىزدە حالىق شا­رۋا­شىلىعىنىڭ ءۇش سالاسىندا ءۇش تۇلعا ەرەكشە جارقىراپ كورىندى: ەگىنشىلىكتە – ىبىراي جاقاەۆ, مال­شى­لىقتا – جازىلبەك قۋانىشباەۆ, ونەر­كاسىپتە – سافي وتەباەۆ» دەپ جازدى. بۇل ءسوزدىڭ ەشقانداي ارتىقتىعى جوق. سافي وتەباەۆ تۋرالى قازاق­ستاننىڭ ەڭبەك ەرى ءابىش كەكىلباەۆ: «قيان تۇكپىر ماڭعىستاۋدا قالعان بالعىن بالا كەزىمىزدە ەسىمىن ەڭ كوپ ەستىگەن ادامىم ەدى. ول ماعان ۇشقىش چكالوۆتاي, پوليارشى پاپانيندەي, كومبات باۋىرجان مومىش ۇلىنداي, گەولوگ قانىش ساتباەۆتاي – ارمان ارحيپەلاگىنىڭ اقيىق تۇرعىنىنداي بولىپ ەلەستەيتىن. ويتكەنى, ول قازاق جەرىنەن تاياۋدا عانا تابىلىپ, ناپاقاسى قازاق اۋزىنا ەندى-ەندى تيە باستاعان ەڭ جاڭا ىرزىق – ۇلتتىق مۇناي ونەركاسىبىنىڭ ءىزاشارى, كوشباستارى ەدى» دەگەن بولاتىن. 1931 جىلى باكۋ مۇناي ينستيتۋتىنا وقۋعا ءتۇسىپ, ونى ۇزدىك ءبىتىرىپ, قازا­قتان شىققان تۇڭعىش كاسىبي مامان مۇنايشى اتانعان سافي اعا قازاق­ستان ونەركاسىبىندە وشپەس ءىزىن قال­دىردى. جاس كۇنىندە ەمبى, دوسسور, ماقات كەن ورىندارىن يگەرگەن, ماڭ­عىس­تاۋ مۇنايىن ءوندىرۋدى العاش باس­تاعان سافي وتەباەۆ 1957-1962 جىل­دارى گۋرەۆ وبلىستىق حالىق شارۋا­شىلىعى كەڭەسىنىڭ توراعاسى, 1962-1965 جىلدارى قۇرامىنا قازىرگى ءتورت وبلىس – اتىراۋ, ماڭعىستاۋ, باتىس قازاقستان, اقتوبە وبلىستارى كىرگەن باتىس قازاقستان ولكەلىك حا­لىق شارۋاشىلىعى كەڭەسىنىڭ توراعا­سى, كەيىننەن «قازاقستانمۇناي» ءبىر­لەستىگىنىڭ باسشىسى بولعان جىلدارىندا ەل ەكونوميكاسىن وركەن­دەتۋگە, اسىرەسە, مۇناي بايلىعىن يگەرۋ جولىندا ەرەسەن ەڭبەك ەتتى. سافي وتەباەۆتىڭ تىكەلەي قول استىندا جۇمىس ىستەگەن, تاربيەسىن كورگەن ازاماتتاردىڭ اراسىندا بولەكباي ساعىنعاليەۆ, راحمەت وتەسىنوۆ, سالامات مۇقاشەۆ, ماقاش بالعىنباەۆ, ناسىپقالي ماراباەۆ سياقتى ەلىمىزگە بەلگىلى تۇلعالار كوپ. ەل الدىن­داعى ەڭبەگى جوعارى باعالانىپ, «قۇرمەت بەلگىسى» وردەنىن, «وتان» وردەنىن, ءى دارەجەلى «بارىس» وردەنىن, لەنين وردەنىن, وكتيابر رەۆوليۋتسياسى وردەنىن, ەكى مارتە ەڭبەك قىزىل تۋ وردەنىن العان, كوزى تىرىسىندە-اق «قازاق مۇنايىنىڭ اتاسى» اتانعان ارداقتى تۇلعانىڭ, ەڭبەكقورلىقتىڭ, جاۋاپتىلىقتىڭ, بىلىكتىلىكتىڭ, كىسىلىكتىڭ, كىشىلىكتىڭ, تازالىقتىڭ ۇيرەنەرلىك ۇزدىك ۇلگىسىنە اينالعان ادامنىڭ ەسىمىن ەل ەسىندە ماڭگى قالدىرۋ ءجون ەكەندىگى تالاسسىز. اتاپ ايتقاندا, اتىراۋ مۇناي-گاز ينستيتۋتىنا ۇلتتىق ونەركاسىپ كادر­لارىن دايىنداۋ ىسىنە ولشەۋسىز ۇلەس قوسقان سافي وتەباەۆتىڭ ەسىمىن بەرۋ قاي جاعىنان قاراعاندا دا ورىندى بولادى دەپ ويلايمىز. ۇكىمەت باسشىسى تاراپىنان ءتيىستى تاپسىرما بەرىلگەن جاعدايدا ءبىزدىڭ بۇل ۇسىنىسىمىزدى اتىراۋ وبلىستىق اكىمدىگى, «قازمۇنايگاز» ۇلتتىق كومپانياسى» اكتسيونەرلىك قوعامى, ءبىلىم جانە عىلىم مينيسترلىگى, ونوماستيكالىق كوميسسيا قولدايدى دەپ سەنەمىز».