سۋعا كەتكەن ۇيلەردىڭ بارلىعى دا وزەن ارنالارىنىڭ بويىنا سالىنعان, باۋ-باقشا ۇجىمدارىنا قاراستى جەرلەر. ساياجاي ۇيلەرىنىڭ ورنىنا تۇرعىن ۇيلەر سالۋعا رۇقسات بەرگەنى ءۇشىن اقتوبە قالالىق جەر قاتىناستارى ءبولىمى, ساۋلەت جانە قالا قۇرىلىسى ءبولىمى, تۇرعىن ۇيلەردى جوبالاۋشىلار جاۋاپ بەرۋى ءتيىس.
سونداي-اق وبلىس اۋماعىنداعى رەسپۋبليكالىق ماڭىزى بار تاسجولداردىڭ بويىن ون جەردەن سۋ شايىپ, ءتورت اۋداننىڭ تۇرعىندارى زارداپ شەكتى. بۇگىندە جەتى ەلدى مەكەنمەن قاتىناس ءۇزىلىپ قالدى. ولار – بايعانين اۋدانىنىڭ ميالى مەن ويماۋىت, قوبدا اۋدانىنىڭ وتەك, ويىل اۋدانىنىڭ اقشاتاۋ, كوپتوعاي, مۇعالجار اۋدانىنىڭ بۇلاقتى, قۇمساي ەلدىمەكەندەرى. تاسقىن سۋ «اقتوبە –اتىراۋ – رف شەكاراسى (استراحان) رەسپۋبليكالىق تاسجولىنىڭ بايعانين اۋدانى جارلى اۋىلىنىڭ تۇسىندا سۋ وتكەلىن ج ۇلىپ اكەتتى. وسى تاسجول قۇرىلىسىن «استانا دورستروي» مەكەمەسى بىلتىر كۇزدە عانا پايدالانۋعا بەرگەن بولاتىن. سونداي-اق «اقتوبە-قاندىاعاش» تاسجولىنىڭ العا-قاندىاعاش بولىگىندەگى سۋ وتكەلى دە بۇزىلدى. ەكى تاسجولدى دا سالىپ جاتقان «استانا دورستروي» جشس-ءى.
جالپى, اقتوبە وبلىسىنىڭ تاسجولدار بويىنداعى وتكەلدەر مەن كوپىرلەردىڭ ءبارى دە بۇزىلدى. وسى جاعداي جول قۇرىلىسىن جوبالاۋشى جانە جول سالۋشى مەكەمەلەردىڭ جاۋاپسىزدىعىنىڭ كورىنىسى جانە قۇزىرلى مەكەمەلەردىڭ تاراپىنان قاداعالاۋدىڭ بولماعاندىعىن كورسەتەدى. اقتوبە مەن قاندىاعاش تاسجولىنا قاتىستى 70 ملرد تەڭگەنىڭ جول جوباسىن مەملەكەتتىك ساراپتامادان وتكىزگەندەر مەن كوپىر جانە وتكەل قۇرىلىستارىن جوبالاۋشىلار قاتەلىكتىڭ سەبەبى مەن سالدارىنا زاڭ الدىندا جاۋاپ بەرۋى ءتيىس.
اقتوبە وبلىسى
