اۋقىمدى شارا ەكىنشى ۇستاز اتانعان عۇلاما ەسكەرتكىشىنە گۇل شوقتارىن قويۋمەن باستالدى. وعان ءال-فارابي اتىنداعى قازۇۋ-دىڭ باسقارما توراعاسى – رەكتور جانسەيىت تۇيمەباەۆ, وزبەكستان رەسپۋبليكاسىنىڭ الماتىداعى باس كونسۋلى ابرور فاتحۋللاەۆ جانە بەلگىلى فارابيتانۋشى عالىمدار, ەتنومادەني ورتالىق وكىلدەرى قاتىسىپ, بابا رۋحىنا تاعزىم ەتتى.
جينالعان كوپشىلىك ءال-فارابي كىتاپحاناسىنداعى قازاقستاندىق فارابيتانۋشىلار كىتابى قويىلعان كورمەنى ارالاپ, «تۇركى حالىقتارىنىڭ ءداستۇرلى قۇندىلىقتارى» اتتى كوركەمسۋرەت كورمەسىن تاماشالادى. ارنايى دايىندالعان «وركەنيەت شىراقشىسى» دەرەكتى ءفيلمى ۇلى ۇستاز جايلى قۇندى ماعلۇماتتار لەگىن تولىقتىرا ءتۇستى.
بيىل تۇڭعىش رەت حالىقارالىق دەڭگەيدە ۇيىمداستىرىلىپ وتىرعان فارابي فورۋمىن ءبىلىم ورداسىنىڭ باسشىسى جانسەيىت تۇيمەباەۆ قۇتتىقتاۋ سوزبەن اشتى.
ء«ال-فارابي فەنومەنى – شىن مانىندە تەڭدەسى جوق قۇبىلىس. ءال-فارابي – ۇلى ويشىل عانا ەمەس, ول – ادامزاتتىڭ رۋحاني ورلەۋىنە ىقپال ەتكەن پلانەتارلىق دەڭگەيدەگى عۇلاما عالىم. بۇگىنگى فورۋمنىڭ تاريحي ميسسياسى – فارابي ءىلىمى ارقىلى جاستاردىڭ وي-ءورىسىن كەڭەيتۋ. تاريحي جانە زاماناۋي قۇندىلىقتاردى توعىستىرۋ ارقىلى فارابيتانۋداعى جاڭا باعىتتاردى دامىتۋ, فارابي ءىلىمىن جان-جاقتى, سالا-سالاعا ءبولىپ تالقىلاۋ», دەپ اتاپ ءوتتى رەكتور.
جيىندا ءسوز العان وزبەكستان رەسپۋبليكاسىنىڭ الماتىداعى باس كونسۋلى ابرور فاتحۋللاەۆ تا عالىمنىڭ باعا جەتپەس باي مۇراسىنىڭ جالپىادامزاتتىق ماڭىزىن ءسوز ەتتى.
« ۇلى ءال-فارابي ءوز زامانىندا بارلىق عىلىم سالالارىنا ۇلكەن ۇلەس قوستى. ورتاعاسىرلىق ويشىلداردان العاشقى بولىپ الەۋمەتتىك ءومىر قۇرىلىمىنىڭ ەرەكشەلىكتەرى تۋرالى ءىلىمنىڭ نەگىزىن قالادى. ول شىن مانىندە الەم ادامى بولدى, ءتۇرلى رۋحاني قۇندىلىقتاردى بىرىكتىردى. ءال-فارابي شىعارمالارى ورتا عاسىرلار مەن قايتا ورلەۋ داۋىرىندە ەۋروپاداعى دۇنيەتانىم مەن عىلىمعا تىكەلەي اسەر ەتتى. الەم, گۋمانيزم جانە ادىلەتتىلىك تۋرالى دۇنيەتانىمى بۇگىنگى قيىن ۋاقىتتا, الەم جاڭا سىن-تەگەۋرىندەر مەن قاۋىپ-قاتەرلەرگە كەزىككەن كەزەڭدە اسا وزەكتى», دەي كەلە, باس كونسۋل ۇلى بابا مۇراسىن ۇلىقتاعان القالى جيىن ءۇشىن ۋنيۆەرسيتەت باسشىلىعىنا العىسىن جەتكىزدى.
سونداي-اق فورۋمنىڭ اشىلۋىندا ءال-فارابي اتىنداعى قازۇۋ فيلوسوفيا كافەدراسىنىڭ پروفەسسورى, ءال-فارابي ورتالىعىنىڭ عىلىمي كەڭەسشىسى جاقىپبەك التاەۆ, قر بعم عك فيلوسوفيا, ساياساتتانۋ جانە ءدىنتانۋ ينستيتۋتىنىڭ باس عىلىمي قىزمەتكەرى ناتاليا سەيتاحمەتوۆا, قوعام قايراتكەرى اسىلى وسمان, «احىسكا» تۇرىك ەتنومادەني ورتالىعى قب الماتى قالالىق فيليالى توراعاسىنىڭ ورىنباسارى قازاقباي قاسىموۆ, تۇرىكمەن قوعامدىق-مادەني ورتالىعىنىڭ ءتورايىمى گۇلنار انناكۋليەۆا جانە وزگە دە قوناقتار وي ءبولىستى. ولار ۇلى بابا مۇراسىنىڭ ۇلاعاتىن تىلگە تيەك ەتە وتىرىپ, ءال-فارابي ەڭبەكتەرىندە بايىپتالعان الەۋمەتتىك-فيلوسوفيالىق كوزقاراستاردىڭ نەگىزگى يدەيالارىن, تۇركى حالىقتارىنىڭ رۋحاني داستۇرلەرىنىڭ قازاقستاندىق مادەنيەتتىڭ دامۋىنداعى ماڭىزىن جانە ولاردىڭ الەمدىك فيلوسوفيالىق ويدىڭ, عىلىمنىڭ دامۋ ۇردىستەرىنە تيگىزگەن ىقپالىن تالقىلادى.
فارابي فورۋمىنىڭ اشىلۋ سالتاناتى ء«ال-فارابي جانە تۇركى حالىقتارىنىڭ رۋحاني داستۇرلەرى» اتتى حالىقارالىق كونفەرەنتسيامەن جالعاستى. وعان وتاندىق جانە شەتەلدىك بەلگىلى فارابيتانۋشى عالىمدار, وقىتۋشىلار مەن ءبىلىم الۋشى جاستار قاتىسۋدا.
حالىقارالىق فورۋم اياسىندا بىرنەشە عىلىمي كونفەرەنتسيا, سەمينارلار مەن دوڭگەلەك ۇستەلدەر وتكىزۋ جوسپارلانعان.
