ايتا كەتەيىك, بۇل – تەاتردىڭ بيىلعى العاشقى پرەمەراسى. تەاتر ديرەكتورىنىڭ ايتۋىنشا, الەمنىڭ ايگىلى تەاترلارى چەح فيلوسوف-حورەوگرافىنىڭ بالەتىن رەپەرتۋارىنا قوسۋعا اسىق. «كيليان تۋىندىسىنىڭ رەپەرتۋارىمىزعا ەنگەنى ءبىز ءۇشىن زور قۇرمەتپەن قاتار, وراسان جاۋاپكەرشىلىك ءارى بالەت ترۋپپاسىنىڭ كاسىبي شەبەرلىگىن مويىنداۋدىڭ بەلگىسى. ونىڭ ونەر تۋىندىلارى ينتەرناتسينالدى ءارى وزەكتىلىگىن جويماعان, زاماناۋي دۇنيەلەر», دەدى الەكساندر سوۆوستيانوۆ.
«جولدان تايعاندار» تۋىندىسىندا, داۋىلپاز سوققىسىمەن ساحناعا اتىپ شىققان بيشىلەر وسى ىرعاقتىڭ اسەرىمەن قيمىلداپ, كورەرمەن قاۋىمدى ۇيىتىپ اكەتەدى. داۋىلپازدىڭ ءار سوققىسى – ىشكى يمپۋلس ىسپەتتى. داۋىلپازدىڭ سان سوققىسىنىڭ ىشىنەن ءبىر ىرعاقتى تاپقانداي كورىنگەندە, ول ءۇزىلىپ كەتىپ, باسقا اۋەن باستالادى.
«اتاقتى حورەوگرافتىڭ اسسيستەنتى ستەفان جەرومسكيدىڭ جەتەكشىلىگىمەن تەاتر ارتىستەرى قىسقا مەرزىم ىشىندە وزىندىك «كيليان ءستيلىن» مەڭگەرىپ الدى. ول كلاسسيكالىق شەڭبەردەن تىس شىعىپ, ءبىزدىڭ ارتىستەر ءۇشىن ۇيرەنشىكتى ءبيدىڭ فورماسىنان اسىپ تۇسكەن. بيشىلەر كۇردەلى حورەوگرافيانى مەڭگەرىپ قانا قويعان جوق, وزدەرىنىڭ دەربەس كەلبەتىن دە ساقتاي الدى», دەيدى تەاتردىڭ كوركەمدىك جەتەكشىسى نۇرلان كانەتوۆ.
ال ستەفان جەرومسكي بۇل بالەت ايەل تابيعاتىن جان-جاقتى زەرتتەيدى دەپ سانايدى. «ولاردىڭ ارەكەتىن بولجاۋ قيىن, مىنەزدەرى سان-قيلى, ىشكى بولمىسى دا ءتۇرلى. بۇل قويىلىم دەربەستىك تۋرالى. سەبەبى «جولدان تايعان» پەرىشتە نە ىستەسە دە ءوز ەركى. ولار الدەبىرەۋلەردىڭ سۇرانىسىن, ولاردىڭ قالاۋىن ورىنداۋعا, سوعان سايكەس بولۋعا مىندەتتى ەمەس. مەنىڭشە, كورەرمەن قاۋىم دا بيشىلەردى وزگە قىرىنان تانىپ, كورگەنىنە, وسى ارقىلى قويىلىمدى دا باعالاي العانىنا ىشتەي قۋانىپ وتىردى», دەدى ول.
ايتا كەتەيىك, ءىس-شارا مادەنيەت جانە سپورت مينيسترلىگىنىڭ قولداۋىمەن جۇزەگە اسىرىلدى.
