«جۇمىس بەرۋشىلەردىڭ كوبى ءالى كۇنگە دەيىن قىزمەتكەرلەردەن ەڭبەك كىتاپشاسىن, جەكە پاراق پەن ءومىرباياندى جازباشا تاپسىرۋدى تالاپ ەتەدى. ازاماتتاردىڭ بۇعان نارازىلىق ءبىلدىرۋى ورىندى. مۇنداي ەسكى تاسىلدەردەن ارىلۋ قاجەت», دەدى پرەزيدەنت قاسىم-جومارت توقاەۆ ۇلتتىق قوعامدىق سەنىم كەڭەسىنىڭ VI وتىرىسىندا.
ەنگىزىلگەن سەرۆيس ارقىلى الەۋەتتى قىزمەتكەردىڭ تۇيىندەمەسىن قاراۋ جانە ونى ودان ءارى رەسىمدەۋ كەزىندە جۇمىس بەرۋشى قىزمەتكەردىڭ جەكە ءىسىن ەلەكتروندىق فورماتتا الۋ ءۇشىن ەڭبەك شارتتارىن ەسەپكە الۋدىڭ بىرىڭعاي جۇيەسىنە (ەشەبج) سۇراۋ سالۋدى جۇزەگە اسىرا الادى. جۇمىس بەرۋشى ەڭبەك كودەكسىندە سيپاتتالعان شارتتار شەڭبەرىندە مىناداي كەز كەلگەن اقپاراتتى: جەكە كۋالىك دەرەكتەرىن, فوتوسۋرەت, ءبىلىمى جانە وتباسى مۇشەلەرى تۋرالى اقپارات, ۆاكتسينالاۋ, ەشەبج-دان جۇمىس تاجىريبەسى تۋرالى اقپاراتتى سۇراتۋعا قۇقىلى. بۇدان باسقا, مىناداي ەلەكتروندى انىقتامالاردى الۋعا بولادى:
– سوتتىلىقتىڭ بولماۋى/بولۋى تۋرالى;
– پسيحونەۆرولوگيالىق, ناركولوگيالىق جانە تۋبەركۋلەزگە قارسى ديسپانسەرلەردە ەسەپكە الۋ تۋرالى;
– 0/75ۋ انىقتاما;
– مۇگەدەكتىك تۋرالى انىقتاما.
بۇل رەتتە جۇمىسكەرگە سمس-حابارلاما ارقىلى نەمەسە ەلەكتروندى ەڭبەك بيرجاسى پورتالىنداعى جەكە كابينەتكە الەۋەتتى جۇمىس بەرۋشىگە ءوز دەرەكتەرىن ۇسىنۋعا سۇراۋ كەلەدى. وڭ جاۋاپ العاننان كەيىن, ەشەبج جەكە ىسكە قول جەتكىزۋگە مۇمكىندىك بەرەدى. ونىڭ نەگىزىندە جۇمىس بەرۋشى قىزمەتكەردى جۇمىسقا قابىلداۋ جانە ونىمەن ەڭبەك شارتىن جاساسۋ تۋرالى شەشىم قابىلدايدى. وسى جەردە ەلەكتروندى ەڭبەك شارتىنىڭ جوباسىن جاساۋعا بولادى.
ەشەبج قىزمەتكەردىڭ ساۋالعا جاۋابىن كۇنتىزبەلىك 7 كۇن ىشىندە كۇتەتىنىن اتاپ وتكەن ءجون. باس تارتىلعان نەمەسە جاۋاپ بولماعان جاعدايدا, جۇمىس بەرۋشىگە دەرەكتەردى ۇسىنۋدان باس تارتىلادى. كەلىسىم اقپارات سۇراعان ۇيىمداعى بارلىق جۇمىس مەرزىمىنە جارامدى بولادى. ەگەر كەلىسىم جاسالماسا نەمەسە بۇزىلسا, كەلىسىم اۆتوماتتى تۇردە زاڭسىز بولىپ سانالادى.
«ەلەكتروندى جەكە ءىس» سەرۆيسى قۇجاتتاردى قولدان جاساۋ تاۋەكەلىن بولدىرمايدى جانە ەڭبەك شارتتارىن جاساسۋ كەزىندە قاعاز قۇجاتتاردى ۇسىنۋدان باس تارتۋ ارقىلى جۇمىسقا ورنالاستىرۋدى جەدەلدەتۋگە مۇمكىندىك بەرەدى.
قازىرگى ۋاقىتتا جۇمىس بەرۋشىلەر سەرۆيستى ەەب نەمەسە كاسىپورىنداعى كادرلىق ەسەپتىڭ اقپاراتتىق جۇيەلەرى ارقىلى پايدالانا الادى. بۇدان ءارى بۇل فۋنكتسيونال ازىرلەنىپ جاتقان ەڭبەك رەسۋرستارى پورتالىندا قولجەتىمدى بولادى.
قىزمەتكەردىڭ جەكە ءىسىن ۇسىنۋ سەرۆيسى شەڭبەرىندە ەشەبج ەڭبەك جانە حالىقتى الەۋمەتتىك قورعاۋ, ادىلەت, ءبىلىم جانە عىلىم, دەنساۋلىق ساقتاۋ مينيسترلىكتەرىنىڭ اقپاراتتىق جۇيەلەرىمەن, سونداي-اق باس پروكۋراتۋرانىڭ قۇقىقتىق ستاتيستيكا جانە ارنايى ەسەپكە الۋ كوميتەتىمەن بىرىكتىرىلگەن.
