ايماقتار • 04 ءساۋىر، 2022

ەرىگەن قار سۋى ەلدىڭ ەسىن شىعاردى

140 رەت كورسەتىلدى

ناۋرىزدىڭ سوڭعى كۇنى اقتوبە وبلىسىندا كۇننىڭ كۇرت جىلىنۋىنان قار بىردەن ەرىپ، اقتوبە قالاسىنىڭ باتىس، اۋەقالاشىق، سەلماش اۋداندارى، اقتوبە حروم قوسىندىلارى زاۋىتىنا قاراستى باۋ-باقشا ۇجىمدارىنداعى تۇرعىن ۇيلەردى، قۇراشاساي ەلدى مەكەنى مەن قاناعات، باۋىرلاستار تۇرعىن ءۇي الابىن سۋ باسىپ قالدى.

توتەنشە جاعدايلار دەپارتامەنتى قىزمەتكەرلەرى مەن ۇلتتىق گۆارديا ۇلان­دارى سۋ باسۋ قاۋپى بار جەرلەردەن 100 ادامدى قاۋىپسىز جەرگە كوشىردى. قوبدا اۋدا­نىنىڭ سارىبۇلاق جانە وتەك اۋىلدارى، بايعانين اۋدانى قاراۋىلكەلدى مەن جارلى ەلدى مەكەندەرىنە، مارتوك اۋدا­نىنىڭ ورتالىعىنداعى ۇيلەرگە سۋ كىردى.

رەسپۋبليكالىق ماڭىزى بار «اقتوبە-اتىراۋ – رف شەكاراسى (استراحان)» تاسجولىنىڭ بايعانين اۋدانى جارلى اۋىلىنىڭ تۇسىنداعى بولىگىن تاسقىن سۋ شايىپ كەتىپ، ەكى تاۋلىك بويى كۇرە جولدا قاتىناس توقتاپ قالدى.

2 ساۋىرگە قاراعان ءتۇنى ەلەك وزەنىنىڭ ءبىر سالاسى جىڭىشكە مەن پەسچانكا وزەن­دەرىنىڭ دەڭگەيى كۇرت كوتەرىلىپ، اقتوبە حروم قوسىندىلارى زاۋىتى باۋ-باقشا ۇجىمىنا قاراستى 15 ءۇيدى سۋ باستى. توتەنشە جاعدايلار قىزمەتى وسى اۋماقتان 32 ادامدى، ونىڭ ىشىندە 10 بالانى الىپ شىقتى. مۇنىمەن ءبىر كەزدە ماعادجان ورمان شارۋاشىلىعى مەكەمەسىنە قاراستى باۋ-باقشا ۇجىمىنداعى تۇرعىن ۇيلەردەن 22 ادام قاۋىپسىز جەرگە كوشىرىلدى. وسى اۋماقتىڭ ءبارى دە اقتوبە قالاسىنىڭ ىرگەسىنەن وتەتىن ەلەك وزەنىنە وتە جاقىن ورنالاسقان بۇرىنعى ساياجاي اۋماعى. بۇل ەلەك وزەنىنىڭ سوڭعى ون جىلدان بەرى تاسۋى. ەلەك وزەنى سوڭعى رەت 2011 جىلى ارناسىنان اسا تاسىپ، وسى توڭىرەكتەگى ۇيلەردىڭ ءبارى سۋعا كەتكەن ەدى.

وبلىستىق توتەنشە جاعدايلار دەپار­تامەنتىنىڭ حابارلاۋىنشا، وبلىس اۋماعىندا ناۋرىزدىڭ سوڭعى كۇنى اۋا تەمپەراتۋراسى كۇرت جوعارىلاپ، جەردىڭ بەتكى قاباتىنداعى توڭنىڭ ءجىبىپ ۇلگەر­مەۋىنەن قار سۋى جەرگە سىڭبەي، توڭىرەككە تۇگەل جايىلعان. تۇرعىندار وبلىس ورتا­لىعىن ەرىگەن قار سۋىنىڭ باسۋىنا قاردىڭ ۋاقتىلى شىعارىلماۋى، جاڭادان سالىنعان شاعىناۋدانداردا سۋاعارلاردىڭ بولماۋى جانە وزەن-كولدەردىڭ ارناسى تازارتىلماي، سۋدىڭ تابيعي ارنالارىنداعى وتكەلدەردىڭ قوقىسقا تولۋى سەبەپ دەيدى.

كەشە تۇندە قالا ىرگەسىندەگى سازدى وزەنى دەڭگەيى جوعارىلاپ، اقتوبە قالاسىنىڭ ورتاسىنداعى كىشى سازدى وزەنىن دە تولتىرىپ جاتىر. سازدى وزەنى باستاۋىن سازدى قويماسىنان الادى. سوڭعى ءتورت جىلدان بەرى وبلىستاعى ەلەك، قارعالى، سازدى، ور، ىرعىز، جەم، تەمىر وزەندەرىنىڭ ارناسى تارىلىپ، ءتىپتى كەي جەرلەرى ءبولىنىپ-ءبولىنىپ، كەۋىپ قالعان ەدى. ايتا كەتۋ كەرەك، ەكى كۇننىڭ ىشىندە اقتوبە وبلىسىنداعى دالالىق وزەندەردىڭ سۋى كوتەرىلىپ، ارناسىنان اسىپ، جايىلىپ كەتتى. ادەتتە اقتوبە وبلىسىندا جىل سايىن سۋ تاسۋ مەرزىمى ءساۋىردىڭ 12-13-نە سايكەس كەلەتىن ەدى. بۇل جولى وزەندەر ارناسى ەرتەرەك كوتەرىلىپ بارادى.

 

اقتوبە وبلىسى

سوڭعى جاڭالىقتار

اقجايناق استانا

ەلوردا • كەشە

ديماش پەن دجەكسون

ونەر • كەشە

ۇقساس جاڭالىقتار