شىڭعىرلاۋ اۋدانى
كوكتەمگى سۋ تاسقىنىنىڭ زاردابى الدىمەن وسى اۋداندا بايقالدى. ناۋرىز ايىنىڭ 31-ءى كۇنى جەرگىلىكتى ۋاقىت 09.40-تان 20.45 ساعات ارالىعىندا اۋداندىق ماڭىزى بار «شىڭعىرلاۋ-اقشات-سەگىزساي» اۆتوجولىن 9 جەرىنەن سۋ شايىپ كەتكەن. وسىنىڭ كەسىرىنەن توپىراق ۇيىلگەن گرەيدەر جولدىڭ بىرنەشە جەرىنەن ۇزىندىعى 8 مەترلىك, تەرەڭدىگى كەي جەردە 1,5 مەترگە جەتەتىن شۇڭقىر پايدا بولعان. توتەنشەلىكتەردىڭ حابارلاۋىنشا, ەلدى مەكەندەرگە تونگەن قاۋىپ جوق. جولدىڭ ب ۇلىنگەن جەرلەرىنە ارناۋلى بەلگىلەر ورناتىلىپ, ساقتاندىرعىش لەنتالارمەن قورشالعان, كەزەكشىلىك ۇيىمداستىرىلعان. ازىرگە اتالعان جول جابىق, قالپىنا كەلتىرۋ جۇمىسى ەرىگەن سۋدىڭ دەڭگەيى تومەندەگەن سوڭ قولعا الىنباق.
ءساۋىردىڭ 1-ءى كۇنى تۇنگى 23.00-دەن باستاپ اۋداندىق ماڭىزى بار «شىڭعىرلاۋ-شوقىباي», «شىڭعىرلاۋ-تالدىساي» اۆتوجولدارىن دا قارعىن سۋ جىرىپ كەتكەن. قازىر بۇل جولدار دا جابىق. ەلدى مەكەندەرگە قاۋىپ جوق.
1 ءساۋىر كۇنگى سۋ اعىنى الماز اۋىلىنا كىرەتىن جولدىڭ سۋ وتكىزۋ قۇبىرىنا سىيماي, توپىراق بوگەت-كوپىردى بۇزىپ كەتتى. قازىر اۋىلعا اپاراتىن جول جوق. وسى اۋىلدىڭ ءبىر ءۇيىنىڭ قوراجايى قۇلاپ, 3 قوي, 12 قوزى شىعىن بولعانى حابارلاندى.
شىڭعىرلاۋ اۋدانىنىڭ قايىڭدى كەنتىندە دە جەرگىلىكتى ماڭىزى بار كىرەبەرىس جول شايىلىپ كەتكەن. بۇل اۋىلدا 27 ءۇي بار, 95 تۇرعىننىڭ 20-سى – بالا. «سۋ باسقان تۇرعىن ءۇي جوق. سۋدى بۇرۋ بويىنشا جۇمىس جۇرگىزىلۋدە, 350 دانا قاپ توسەلدى», دەپ حابارلادى جەدەل شتاب ءباسپاسوز قىزمەتى.
3 ساۋىردەگى مالىمەتكە قاراعاندا, اۋدان اۋماعىنداعى شىڭعىرلاۋ وزەنىنىڭ دەڭگەيى كۇرت كوتەرىلگەن. قازىر وندا تۇراقتى كەزەكشىلىك ۇيىمداستىرىلىپ, 30 سيىر, 50 جىلقى, 15 ۇساق جاندىقتى قاۋىپسىز جەرگە كوشىرگەن.
قاراتوبە اۋدانى
قاراتوبە اۋدانى قوسكول اۋىلدىق وكرۋگىنە قاراستى شالعىن اۋىلىنداعى جاعدايدى بۇدان بۇرىن جازعان بولاتىنبىز. اۋەلى ەرىگەن قاردان, كەيىن ءشيلى وزەنىنىڭ تاسۋىنان شالعىن اۋىلىندا 29 ءۇي, 2 الەۋمەتتىك نىسان – ورتالاۋ مەكتەپ پەن فەلدشەرلىك امبۋلاتوريا عيماراتىن سۋ باسىپ كەتتى. سۋ دەڭگەيى كەي جەردە 60 سم-گە جەتكەن. 45 قوي-ەشكى ولگەن. ايتا كەتەيىك, شالعىن اۋىلىندا بارلىعى 45 ءۇي بولعان, تۇرعىندار سانى – 190 ادام.
وڭىردەگى ناقتى جاعدايدى باعالاۋ ءۇشىن باتىس قازاقستان وبلىسىنىڭ اكىمى عالي ەسقاليەۆ پەن وبلىستىق توتەنشە جاعدايلار دەپارتامەنتىنىڭ باستىعى ارمان توقانوۆ تىكۇشاقپەن وقيعا ورىندارىن ارالاپ, حالىقپەن جۇزدەسكەن. شالعىن اۋىلىندا مەديتسينالىق بەكەت اشىلىپ, حالىققا مەديتسينالىق جانە پسيحولوگيالىق كومەك كورسەتىلىپ جاتقانى حابارلاندى. تۇرعىندار ىشىنەن جۇكتى ايەلدەر قوسكول اۋىلىنا كوشىرىلگەن.
ءبورلى اۋدانى
بۇل اۋداندا دا 1 ءساۋىر كۇنى ساعات 23:55-تە اقساي قالاسىنىڭ ىرگەسىندەگى قىزىلتال اۋىلىنىڭ 12 ءۇيىن ەرىگەن قار سۋى باسىپ كەتتى. سۋ باسقان ۇيلەردەن 8 ادام, ونىڭ ىشىندە 4 بالا اقساي قالاسىنىڭ №7 مەكتەبىنە ەۆاكۋاتسيالاندى. قالعان تۇرعىندار ەۆاكۋاتسيادان باس تارتىپ, تۋما-تۋىستارىن ساعالاعان.
2 ءساۋىر كۇنى 16.30 ساعاتتا وبلىستىق ماڭىزى بار ء«بورلى-اقساي-جىمپيتى» اۆتوجولىنىڭ 0-159 كم ارالىعىندا قار كۇرت ەرىپ, جولدىڭ ەكىنشى بەتىنە اعا باستاعان. وسى جولعا قىزمەت كورسەتۋشى مەكەمە قاۋىپتى بولىككە كەزەكشىلىك قويىپ, كولىك قوزعالىسىن توقتاتقان. ەلدى مەكەندەرگە قاۋىپ جوق.
3 ءساۋىر كۇنى تۇنگى ساعات 02.00-دە «قازگيدرومەتتىڭ» جەرگىلىكتى فيليالى ءبورلى اۋدانىنداعى شىڭعىرلاۋ-كەڭتۇبەك وزەنى سۋ بەكەتىندە سۋ دەڭگەيى قاۋىپتى بەلگىگە جاقىنداپ, 685 سم-گە جەتكەنىن حابارلادى. سۋدىڭ قاۋىپتى دەڭگەيى بۇل جەردە - 700 سم.
وسى كۇنى ساعات 03.00 شاماسىندا ءبورلى اۋدانى, كەڭتۇبەك اۋىلدىق وكرۋگىنە قاراستى باقتىارال اۋىلىنىڭ تۇرعىن ۇيلەرىن شىڭعىرلاۋ وزەنىنىڭ سۋى باسىپ قالا جازدادى. وقيعا ورنىنا جەدەل كەزەكشىلىك ۇيىمداستىرىلىپ, توتەنشەلىكتەر ارنايى تەحنيكا, ينەرتتى ماتەريالدار مەن قاپتاردى جۇمىلدىردى. باقتىارال اۋىلىندا 23 تۇرعىن ءۇي بار, 50 ادام تۇرادى. ابىروي بولعاندا كۇندىزگى ساعات 10.25-تە وزەن سۋى تومەندەپ, قاۋىپ ۋاقىتشا سەيىلدى.
سوڭعى مالىمەتتەرگە قاراعاندا, كەڭتۇبەك اۋىلى تۇسىندا شىڭعىرلاۋ وزەنى ارناسىنان اسىپ, «اقساي-كەڭتۇبەك» جولىن باسىپ كەتكەن.
تەرەكتى اۋدانى
كوكتەمگى سۋ تاسقىنى قاۋپى سەيىلمەي وتىرعان ءوڭىردىڭ ءبىرى – تەرەكتى اۋدانى. اۋداننىڭ ءبىراز بولىگىندە ءالى قار تولىق ەرىگەن جوق. ال وڭتۇستىككە قاراي ءسارىومىر-دۋانا اۋىلدارى ارالىعىندا ەرىگەن قار سۋى جەرگىلىكتى ماڭىزى بار جولدى ەكى جەرىنەن جىرىپ كەتكەن. قازىر بۇل جول جابىلىپ, كولىكتەر اينالما جولدى پايدالانۋدا. ەلدى مەكەندەرگە تونگەن قاۋىپ جوق.
جانىبەك اۋدانى
سوڭعى ساتتەردە الاڭداتارلىق حابار جانىبەك اۋدانىنداعى جاقسىباي, تالوۆ اۋىلدارىنان كەلىپ جاتىر. جەدەل شتابتىڭ حابارلاۋىنشا, 2 ءساۋىر كۇنى كەشكىسىن قار سۋى جەرگىلىكتى ماڭىزى بار «جانىبەك-تالوۆكا» اۆتوجولىنىڭ 80, 106 جانە 117 شاقىرىمدارى تۇسىن بۇلدىرگەن.
ءساۋىردىڭ 2-ءسى كۇنى تۇنگى ساعات 23.00-دە جانىبەك اۋدانىنىڭ سولتۇستىك بولىگى – رەسەي فەدەراتسياسىمەن شەكارالاس دالا ايماعىنان ەرىگەن قار سۋى اعىپ كەلىپ, تالوۆ اۋىلىنىڭ بىرنەشە كوشەسىن, تۇرعىن ۇيلەردى سۋ باسۋ قاۋپى تۋىنداعانى تۋرالى حابارلاما كەلىپ تۇسكەن. «وقيعا ورنىنا قۇرامىندا 5 ادام بار وبلىستىق تجد كۇشتەرى مەن قۇرالدارى, 1 موتوپومپا, ۇقك شەكارا قىزمەتىنەن 9 ادام جانە 2 بىرلىك تەحنيكا, جاو 2 ادام, 1 موتوپومپا شىقتى. جانىبەك اۋىلىنان تالوۆ اۋىلىنا دەيىنگى قاشىقتىق – 128 كم, ونىڭ 90 شاقىرىمى – جولسىز», دەپ حابارلادى جەدەل شتاب. سوڭعى مالىمەتتەرگە قاراعاندا, بۇل اۋىلدىڭ ەكى ۇيىنە سۋ كىرگەن, وندا تۇراتىن 8 ادام قاۋىپسىز جەرگە – تۋىستارىنىڭ ۇيىنە كوشىرىلگەن.
3 ءساۋىر كۇنى جاقسىباي اۋىلىندا 170 ءۇي سۋ استىندا قالىپ, 637 ادام قاۋىپسىز جەرگە كوشىرىلدى. ونىڭ ىشىندە 89 بالا, 216 ەرەسەك ادام م.ىقسانوۆ اتىنداعى مەكتەپ عيماراتىنا ورنالاستىرىلدى. قالعان 332 ادام تۋما-تۋىستارىنىڭ ۇيىندە تۇرىپ جاتىر, بۇلاردىڭ 70-ءى – بالا. ازىرگە ءتىلسىز جاۋدان ەڭ كوپ زارداپ شەككەن وسى اۋىل بولىپ تۇر, ەلدى مەكەننىڭ 60 پايىزى سۋدا قالدى. اۋىل تۇرعىندارىنىڭ ەسەپتەۋىنشە, شىعىن بولعان ءىرىلى-ۇساقتى مالدىڭ سانى 100-دەن اسىپ كەتكەن.
تاسقالا اۋدانى
باتىس قازاقستان وبلىسىندا كوكتەمگى تاسقىن سۋ قاۋپى جىل سايىن سەيىلمەيتىن تاسقالا اۋدانىندا ءالى قار ەري قويعان جوق. سوندىقتان دا توتەنشە جاعدايلار دەپارتامەنتىنىڭ باستىعى بيىل ماڭعىستاۋ وبلىسىنان كومەككە كەلگەن قۇتقارۋ توبىن تاسقالا اۋدانىنا شوعىرلاندىرۋ تۋرالى شەشىم قابىلداپتى. قۇرامىندا 17 ادام, 2 ارنايى كولىك, ءجۇزۋ جانە سۋ سورعىش قۇرالدارى بار ماڭعىستاۋلىق قۇتقارۋشىلار قازىر كەزەكشىلىك ورنىنا بەت العان.
«قازگيدرومەت» مەكەمەسىنىڭ جەرگىلىكتى فيليالى وبلىس اۋماعىنداعى وزەندەردىڭ سۋ دەڭگەيىندەگى اقپاراتتى تاۋلىگىنە ەكى مارتە مالىمدەپ, قاۋىپتى وزگەرىستەردى تۇراقتى حابارلاپ وتىر. سوڭعى مالىمەتتەرگە قاراعاندا, ەلەك, شىڭعىرلاۋ, دەركول جانە ولەڭتى وزەندەرىنىڭ سۋ دەڭگەيى قاۋىپتى شەككە دەيىن كوتەرىلگەن.
بەت قاتتالىپ جاتقاندا: باتىس قازاقستان وبلىسىنداعى جاعداي ءسات سايىن كۇردەلەنە تۇسۋدە. وڭىرگە قازاقستان رەسپۋبليكاسىنىڭ توتەنشە جاعدايلار ۆيتسە-ءمينيسترى مارات كۇلدىكوۆ ۇشىپ كەلدى. ءدال قازىر وبلىس اكىمى عالي ەسقاليەۆپەن بىرگە سۋ تاسقىنى بويىنشا جەدەل شتابتىڭ وتىرىسى وتۋدە.
سونداي-اق اتىراۋ وبلىسىنىڭ توتەنشە جاعدايلار دەپارتامەنتىنەن قوسىمشا باتىس قازاقستان وبلىسىنا مي-8 تىكۇشاعى, قاجەتتى قۇرال-جابدىقتارمەن قوسا 12 قۇتقارۋشى, جەكە قۇرامنان 34 ادام جانە 4 بىرلىك تەحنيكا جىبەرىلگەن.
اۋا رايىن بولجاۋشىلار جاقىن كۇندەرى باتىس قازاقستان وبلىسىنىڭ سولتۇستىك-باتىسىندا جاڭبىر جاۋاتىنىن, وڭتۇستىكتەن, وڭتۇستىك-باتىستان 9-14, وبلىستىڭ باتىسى مەن وڭتۇستىك-شىعىسىنان 15-20 م/س جەل سوعىپ, اۋا تەمپەراتۋراسى تۇندە 7-12, كۇندىز 17-22 گرادۋس جىلى بولاتىنىن ەسكەرتۋدە.
2-6 ءساۋىر ارالىعىندا وبلىستىڭ وزەن باسسەيندەرىندە قار ەرىپ, اعىن سۋ كۇشەيىپ, مۇز ءتۇسۋى, سۋ دەڭگەيى كوتەرىلۋى كۇتىلۋدە.
باتىس قازاقستان وبلىسى
