«بايتەرەك» حولدينگى قىتايلىق ينۆەستورلارمەن كەلىسسوزدەر جۇرگىزدى

«بايتەرەك» ۇلتتىق باسقارۋشى حولدينگىنىڭ دەلەگاتسياسى قىتايدا ىسساپارمەن بولىپ, وسى ەلدىڭ ينۆەستورلارىمەن بىرقاتار ماڭىزدى كەلىسىمدەرگە قول جەتكىزدى. بۇل تۋرالى Egemen.kz ءتىلشىسى حابارلادى. حولدينگتىڭ باسقارما توراعاسى قۋاندىق بيشىمباەۆ باستاعان جۇمىس توبى قىتايدىڭ مەملەكەتتىك دامۋ بانكى, قحر ەكسپورتتىق-يمپورتتىق بانكى, قىتايدىڭ ەكسپورتتىق-نەسيەلىك ساقتاندىرۋ كورپوراتسياسى (SINOSURE) سىندى قارجى قۇرىلىمدارىنىڭ وكىلدەرىمەن كەزدەستى. قحر ەكسپورتتىق-يمپورتتىق بانكى پرەزيدەنتى لي رۋوگۋمەن شىمكەنت مۇناي وڭدەۋ زاۋىتىن جاڭعىرتۋ جانە قايتا قۇرىلىمداۋ ماسەلەسى تالقىلاندى. بۇل جوباعا قاتىستى مەموراندۋمعا مەملەكەت باسشىسى نۇرسۇلتان نازارباەۆتىڭ مامىر ايىندا  قىتاي حالىق رەسپۋبليكاسىنا مەملەكەتتىك ساپارى كەزىندە قول قويىلماق. «بايتەرەك» حولدينگىنىڭ دەلەگاتسياسى ساپار بارىسىندا لياونين پروۆينتسياسىنىڭ گۋبەرناتورى چەن چجەنگاو مىرزامەن جانە  جەرگىلىكتى ىسكەرلىك توپتارمەن كەزدەستى, سونداي-اق  «Shenyang Yuanda Group» حولدينگىنىڭ ءوندىرىسىن ارالادى. قازاقستان جاعى بۇل كومپانيامەن ليفت شىعاراتىن ءوندىرىس اشۋ ماسەلەسىن قاراستىرۋدا. حولدينگ دەلەگاتسياسىنىڭ ءىسساپارى ەلباسىنىڭ قىتاي حالىق رەسپۋبليكاسىنا مەملەكەتتىك ساپارىنا وراي الدىن الا ۇيىمداستىرىلدى.  قىتاي قارجى ۇيىمدارىنىڭ وكىلدەرىمەن وتكەن كەلىسسوزدەر ەكى مەملەكەت كوشباسشىلارىنىڭ تابىستى ديالوگىنا ءوز ۇلەسىن قوساتىنىنا سەنىمدىمىز. «بايتەرەك» حولدينگى جانە ونىڭ ەنشىلەس ۇيىمدارىنىڭ قىتايدىڭ جەتەكشى بانكتەرىمەن ىنتىماقتاستىعى ەلىمىزدەگى ۇدەمەلى يندۋستريالىق-يننوۆاتسيالىق دامۋ جونىندەگى مەملەكەتتىك باعدارلامانىڭ جوسپارلارىن ىسكە اسىرۋدىڭ, شەتەل كاپيتالىن تارتىپ, بيزنەستى جۇرگىزۋدىڭ جانە تەحنولوگيالاردىڭ قازىرگى زامان ۇلگىلەرىن قولدانۋ مۇمكىندىكتەرىن كەڭەيتەدى دەگەن ءۇمىت بار. نۇرباي ەلمۇراتوۆ. دەرەككوز: Egemen.kz. فوتو: «بايتەرەك» ۇلتتىق باسقارۋشى حولدينگى