قاراتوبە اۋدانىنىڭ ەلدىمەكەندەرىندە قار سۋىنىڭ مەيلىنشە ەرۋى جانە سۋ تاسۋ قاۋپى جاعدايىنا بايلانىستى باتىس قازاقستان وبلىستىق توتەنشە جاعدايلار دەپارتامەنتىندە جەدەل شتاب قۇرىلدى.
دەپارتامەنتتىڭ ءباسپاسوز قىزمەتىنىڭ حابارلاۋىنشا, 2022 جىلعى 31 ناۋرىزدا ساعات 20.40-تا داعدارىس ورتالىعىندا وبلىس اكىمىنىڭ ورىنباسارى ت.مەڭدىعاليەۆتىڭ توراعالىعىمەن ازاماتتىق قورعاۋ ورگاندارى قىزمەتى باسشىلارىنىڭ قاتىسۋىمەن جەدەل شتاب وتىرىسى وتكەن. وتىرىستا شىڭعىرلاۋ, قاراتوبە اۋداندارىنداعى جولداردى سۋ شايۋ ماسەلەسى تالقىلانعان.
باتىس قازاقستان وبلىستىق توتەنشە جاعدايلار دەپارتامەنتى باستىعىنىڭ ورىنباسارى پولكوۆنيك ا.توقانوۆتىڭ باستاۋىمەن قاراتوبە اۋدانىنا اۆاريالىق-قۇتقارۋ, ەۆاكۋاتسيالىق جانە شۇعىل جۇمىستار ءۇشىن كۇشتەر مەن قۇرالداردىڭ جيىنتىعى جولعا شىقتى.
قازىرگى ۋاقىتتا دەپارتامەنت جانە وبلىس باسشىلىعى جاعدايدى باعالاۋ ماقساتىندا تىكۇشاقپەن سۋ تاسقىنى قاۋىپتى اۋماقتارعا اتتانعان. شالعىن اۋىلىندا سۋ كىرگەن 25 تۇرعىن ءۇيدىڭ تۇرعىندارى مادەنيەت ۇيىنە كوشىرىلگەن. «تۇرعىنداردى كوشىرۋ ماسەلەسى قاراستىرىلۋدا. شالعىن اۋىلى قاتاڭ باقىلاۋدا» دەپ حابارلايدى دەپارتامەنتتەگىلەر.
ايتا كەتەيىك, وسىدان ءبىر كۇن بۇرىن قاراتوبە اۋدانىنىڭ اقتايساي اۋىلى تۇسىندا ەرىگەن قار سۋى اۋدان ورتالىعىمەن بايلانىساتىن جول مەن بوگەتتى بۇزىپ كەتكەن ەدى. اتالعان اۋىلمەن جول بايلانىسى توقتاعان.
شىڭعىرلاۋ اۋدانىندا دا قاردىڭ قارقىندى ەرۋىنەن «شىڭعىرلاۋ-اقشات-سەگىزساي» قارا جولىنىڭ بىرنەشە جەرىن ەرىگەن سۋ جىرىپ وتكەن. توتەنشەلىكتەردىڭ ايتۋىنشا, بۇل باعىتتا ەلدى مەكەندەرگە قاۋىپ ءتونىپ تۇرعان جوق.
«جەرگىلىكتى اتقارۋشى ورگانداردىڭ كۇشىمەن تاۋلىك بويى كەزەكشىلىك ۇيىمداستىرىلدى, قازىرگى ۋاقىتتا سۋ دەڭگەيىنىڭ تومەندەۋى بايقالادى. جولدى قالپىنا كەلتىرۋ جۇمىستارىن ەرىگەن سۋ ازايعاننان كەيىن جۇرگىزۋ جوسپارلانۋدا» دەيدى اتالمىش مەكەمەنىڭ ءباسپاسوز حاتشىسى باكيزات ماعزەنوۆا.
وسى كۇندەرى تەرەكتى اۋدانىنا قاراستى توڭكەرىس اۋىلى تۇرعىندارىنىڭ دا مەملەكەت باسشىسى قاسىم-جومارت توقاەۆقا جولداعان بەينە-ۇندەۋى جەلىگە تاراپ جاتىر. بۇل اۋىل تۇرعىندارى دا جول, اۋىز سۋ تاپشىلىعىنا نارازى.
سوڭعى اقپاراتتارعا قاراعاندا, شىڭعىرلاۋ اۋدانىنداعى الماز اۋىلىنىڭ كىرەبەرىسىندەگى كوپىردى دە سۋ شايىپ كەتكەن.
بايتەرەك اۋدانىنداعى وركەن اۋىلىنا دا سۋ كىرىپ, ءبىر-ەكى اۋلانى باسقانى, ءبىر ءۇيدىڭ مونشاسىنا سۋ كىرگەنى حابارلاندى. بىراق بۇل اۋىلعا تونگەن قاۋىپ سەيىلگەن.
