وتكەن جىلى وتباسى مۇشەلەرىنىڭ جاۋاپكەرشىلىگىن ارتتىرۋ, بالا تاربيەسىن كۇشەيتۋ, مەكتەپ پەن اتا-انا اراسىنداعى بايلانىستى نىعايتۋ ماقساتىندا «سەنىمەن بولاشاق» رەسپۋبليكالىق اتا-انالار قوعامدىق بىرلەستىگى قۇرىلعان بولاتىن. جارتى جىلدان استام ۋاقىت ىشىندە 13 مىڭنان استام اتا-انانى يگى ىسكە جۇمىلدىرا بىلگەن بىرلەستىكتىڭ الماتى قالاسىندا دا وكىلدىگى اشىلىپ, قوعام قايراتكەرلەرى, ۇستازدار سانالى ۇرپاق تاربيەلەۋ ماسەلەسىن تالقىلاۋ ءۇشىن باس قوستى.
ۇلتتىق كىتاپحانادا وتكەن جيىندى بىرلەستىك توراعاسى راقىمبەك جولاەۆ اشىپ, وڭىرلەردە اتا-انالارمەن تىعىز بايلانىس ورناتۋ ماقساتىنداعى ءىس-شارالارعا توقتالىپ ءوتتى.
ر.جولاەۆتىڭ ايتۋىنشا, تاجىريبە كورسەتكەندەي, قوعامدا بالانىڭ بولاشاعىنا الاڭدايتىن, ءبىلىم سالاسىنا جاناشىر, بەلسەندى اتا-انالار از. ال توقسان پايىزعا جۋىعى بالا تاربيەسىن ءبىلىم بەرۋ ۇيىمدارىنا ىسىرىپ قويعاندى ءجون كورەدى. تابىس تابۋ, الەۋمەتتىك ماسەلەلەرگە بايلانىستى بالا تاربيەسىنە جەتكىلىكتى كوڭىل بولە المايتىن وتباسىلار بار. سونىڭ سالدارىنان بۋللينگ, سۋيتسيد, وتباسىنداعى اگرەسسيا سياقتى قوعام ومىرىنە قاۋىپتى جايتتار بەلەڭ الۋدا.
جيىندا «سەنىمەن بولاشاق» رەسپۋبليكالىق اتا-انالار قوعامدىق بىرلەستىگىنىڭ قۇرىلتايشىسى نۇركەن اسانوۆ, ادام قۇقىقتارى جونىندەگى زاڭگەر, PhD حاليدا اجىعۇلوۆا, تاعى دا باسقا ماماندار وزەكتى تاقىرىپقا وراي وي ءبولىستى.
كوپشىلىكتى ساپالى تۇلعا تاربيەسىنە قوعام بولىپ اتسالىسۋعا شاقىرعان سەنات دەپۋتاتى دانا نۇرجىگىت وتباسىنداعى زورلىق-زومبىلىقتى, مەكتەپ پەن اتا-انانىڭ بالا تاربيەسىندەگى كەمشىن تۇستارىن ءسوز ەتتى. دەپۋتات بۋىنى قاتىپ ۇلگەرمەگەن بالالاردى اقپاراتتىق اگرەسسيادان قورعاۋ, ءتيىمدى ديالوگ قۇرۋ ماسەلەسىنىڭ قوعامدا وتكىر تۇرعاندىعىن جەتكىزدى.
ال سەناتور دينار نوكەتاەۆا ءبىلىم مەن تاربيەنى قاتار الىپ جۇرگەندە عانا ناتيجەلى ءىس بولاتىنىن جەتكىزدى.
بۇگىندە ەلىمىزدە زاماناۋي بالاباقشالار, مەكتەپتەر, وقۋ ورىندارى جەتكىلىكتى. الايدا بالاعا تەك ساپالى ءبىلىم عانا ەمەس, تاربيە دە كەرەك. ءال-فارابي ايتقانداي, «تاربيەسىز بەرىلگەن ءبىلىم – ادامزاتتىڭ قاس جاۋى».
بالا تاربيەسىندە ۆەدومستۆولىق ورگانداردىڭ ارقايسىسى ءوز ىسىنە جاۋاپتى بولۋى كەرەكتىگىن العا تارتقان پارلامەنت ءماجىلىسىنىڭ دەپۋتاتى يرينا سميرنوۆا بالالاردىڭ ءبىلىمى مەن تاربيەسى قوعامعا ورتاق مىندەت ەكەنىن اتاپ ءوتىپ, اتا-انالاردىڭ بالا تاربيەسىندەگى ءرولىنىڭ جوعارى ەكەندىگىنە توقتالدى.
الايدا وتباسىنداعى زورلىق-زومبىلىققا قاتىستى تۇيتكىلدى ماسەلەلەر تىيىلماي تۇر. بۇل باعىتتا اگرەسسورمەن كۇرەس مەحانيزمدەرىن جۇزەگە اسىراتىن ورگاندار جۇمىسىن جەتىلدىرۋ ۋاقىت كۇتتىرمەيدى. ويتكەنى ومىرلىك قيىن جاعدايدا قالعان بالالاردىڭ تاعدىرى الاڭداتادى. ال بىرلەسكەن ىستە ءاربىر ءتيىستى مەكەمە ءوز مىندەتىنە جاۋاپتى بولۋعا ءتيىس.
وسى ورايدا «سەنىمەن بولاشاق» رەسپۋبليكالىق اتا-انالار قوعامدىق بىرلەستىگىنىڭ ماماندارى قوعام بولىپ اتسالىساتىن ماڭىزدى ماسەلەلەردەن شەت قالماۋعا شاقىردى.
الماتى
