رەسەيدىڭ بەيبىت تۇرعىندارى اراسىندا دا دۇربەلەڭ بار. رەسەيدەن كوشۋگە بەت العان حالىقتىڭ الدىمەن بەت الاتىن جەرىنىڭ ءبىرى قازاقستان ەكەنى داۋسىز. وسىعان وراي الەۋمەتتىك جەلىدە ءارتۇرلى قاۋەسەت قاپتاپ كەتتى. ولاردىڭ كوبىندە ءبىزدىڭ ەلدىڭ اۋماعىنا رەسەيلىكتەردىڭ كوپتەپ ەنگەنىنە قارسىلىقتار ايتىلادى. ونىڭ ۇستىنە قازىر رەسەي فەدەراتسياسى قازاقستان مەن موڭعولياعا جەرمەن وتەتىندەر ءۇشىن بارلىق كەدەرگىنى الىپ تاستادى. ال باسقا مەملەكەتتەرگە ءوتۋ ءالى دە شەكتەۋلى. الدىندا ەڭبەك جانە حالىقتى الەۋمەتتىك قورعاۋ ءمينيسترى ەرجان ءبىرجانوۆ 30 ناۋرىزداعى مالىمەتكە قاراعاندا قازاقستاندا 101 مىڭ رەسەيلىك جۇرگەنىن ايتقان ەدى.
وسىعان وراي ءبىز سولتۇستىك قازاقستان وبلىسى پد كوشى-قون قىزمەتى باسقارماسىنا حابارلاسىپ, كوشىپ كەلۋشىلەر تۋرالى مالىمەت العان ەدىك. مالىمەتتەرگە قاراعاندا, ماسەلە سونشالىقتى كۇردەلى ەمەس, قالىپتاعىدان سونشالىقتى اۋىتقۋ جوق.
سولتۇستىك قازاقستان وبلىسى پد كوشى-قون باسقارماسىنىڭ باستىعى, پودپولكوۆنيك ت.ابىلەۆتەن الىنعان مالىمەت بيىل جىلدىڭ 1 قاڭتار مەن 30 ناۋرىز ارالىعىندا رەسەي فەدەراتسياسىنان سولتۇستىك قازاقستان وبلىسىنا 915 رەسەيلىك ازاماتتىڭ وتكەنىن ايتادى. ال وتكەن جىلدىڭ سايكەس مەرزىمىندە بۇل سان 984 بولعان ەكەن. كەلگەندەر نە ماقساتپەن كىردى دەگەن ساۋالعا مىناداي جاۋاپ الدىق: جۇمىس بابىمەن – 581 ادام, وتباسىمەن بىرىگۋ ءۇشىن – 243 ادام, وقۋ ماقساتىمەن 26 جانە ت.ب. كەلگەن. ال تۇراقتى تۇرۋدى ماقسات ەتىپ كەلگەندەر سانى – 32. 2021 جىلدىڭ سايكەس مەرزىمىندە بۇل سان 39 بولعان. ارينە, كەلۋ ماقساتىن جاسىرىپ, تەرىس كورسەتەتىندەر كوپ بولادى. بىراق قالاي دەسەك تە, اتالعان مەرزىمدە كىرگەندەر سانى بىلتىرعىدان كوپ ەمەس ەكەنىن كورەمىز.
كوشى-قون قىزمەتى بىزگە ەۋرازيالىق ەكونوميكالىق وداققا قاتىسۋشى ەلدەر ازاماتتارىنىڭ قازاقستان رەسپۋبليكاسىندا بولۋىنا رۇقسات ەتىلگەن مەرزىم – 90 كۇن ەكەنىن ايتتى. ال بۇل مەرزىمنەن ءۇش كۇن اسقاندا ەسكەرتۋ جاسالادى, بەس تاۋلىك بولسا 10 اەك كولەمىندە, ال بەس تاۋلىكتەن اسىپ ون تاۋلىككە جەتسە 15 اەك مولشەرىندە ايىپپۇل سالىنادى ەكەن. ال ون تاۋلىكتەن اسسا 25 اەك مولشەرىندە ايىپپۇل سالىنىپ, اكىمشىلىك جولمەن شەكارادان كۇشپەن شىعارىپ جىبەرىلەدى.
كوشى-قون قىزمەتىنىڭ دەرەگىنە قاراساق, سولتۇستىك قازاقستان وبلىسىنان رەسەي فەدەراتسياسىنا 1 قاڭتار مەن 30 ناۋرىز ارالىعىندا تۇراقتى تۇرۋ ءۇشىن 363 ازامات كوشكەن. وتكەن جىلدىڭ سايكەس مەرزىمىندە بۇل سان 348 بولعان ەدى.
اتالعان مەرزىمدە رەسەيدەن كەلگەندەر اراسىنان قازاقستان رەسپۋبليكاسىنىڭ ازاماتتىعىن الۋعا 18 ادام ءوتىنىش جاساعان. ال بىلتىر وسى مەرزىمدە ءوتىنىش جاساعاندار سانى 27 بولعان. ايتا كەتەتىن جايت, 2021 جىلى سولتۇستىك قازاقستان وبلىسىنان رەسەي فەدەراتسياسىنا تۇراقتى تۇرۋعا بارلىعى 2 110 ازامات كەتكەن. ال رەسەيدەن سولتۇستىك قازاقستان وبلىسىنا تۇراقتى تۇرۋعا 329 ازامات تىركەلگەن. سونىمەن قاتار بىلتىر بارلىعى 110 ادام قازاقستان رەسپۋبليكاسىنىڭ ازاماتتىعىن العان.
دەرەكتەرگە قاراعاندا, «رەسەيلىكتەر سولتۇستىك قازاقستانعا قاپتاپ كەلىپ جاتىر» دەگەن دۇربەلەڭگە ەش نەگىز جوق. كوشەلەردە سىرتتان كەلىپ جاتقان بوتەن ادامدارعا كەزدەسپەدىك. سوندىقتان جەل سوزگە ەرمەي, سابىرلى بولايىق, اعايىن.
سولتۇستىك قازاقستان وبلىسى
