بۇگىندە تۇرعىنداردى جۇمىسپەن قامتۋ ماسەلەسى ۇكىمەتتىڭ ءبىرىنشى كەزەكتەگى مىندەتى سانالادى. مەملەكەت باسشىسى قاسىم-جومارت توقاەۆ وسى ماقساتتا ەڭبەك جانە حالىقتى الەۋمەتتىك قورعاۋ مينيسترلىگىنىڭ الدىنا بىرقاتار ايقىن مىندەتتەردى قويعان بولاتىن.
– بيىل پرەزيدەنت «جاستار پراكتيكاسى» جانە «العاشقى جۇمىس ورنى» جوبالارىنا قاتىسۋ كەزەڭى مەن وسى جوبالارعا قاتىسۋشىلاردىڭ جالاقىسىن ارتتىرۋ, سونداي-اق بيزنەس-يدەيالاردى دامىتۋ ءۇشىن گرانت مولشەرىن 400 اەك-كە دەيىن ۇلعايتۋدى تاپسىردى. سونداي-اق پرەزيدەنتتىڭ وڭىرلەردە جىل سايىن 10 مىڭ تۇرعىنعا 100 تۇراقتى جۇمىس ورنىن قۇرۋ تاپسىرماسى بار. حالىق سانىنىڭ ءوسۋىن ەسكەرە وتىرىپ, نەگىزىنەن 2025 جىلعا دەيىن 780 مىڭ جۇمىس ورنى اشىلادى. سونىمەن قاتار ۇلتتىق قوعامدىق سەنىم كەڭەسىنىڭ ءتورتىنشى وتىرىسىندا مەملەكەت باسشىسى وڭىرلىك جۇمىسپەن قامتۋ كارتالارى ارقىلى جۇمىس ورىندارىن قۇرۋ مونيتورينگىن قامتاماسىز ەتۋدى تاپسىردى. 2020 جىلدان باستاپ ۇستازداردىڭ جالاقىسى كەزەڭ-كەزەڭمەن ارتا باستادى. 2021 جىلدان بەرى مەديتسينالىق جانە الەۋمەتتىك قىزمەتكەرلەردىڭ جالاقىسى كوتەرىلدى. ناتيجەسىندە, 2023 جىلعا قاراي ولاردىڭ جالاقىسى 2 ەسەگە ارتادى. ال 2022 جىلعى 1 قاڭتاردان باستاپ ەڭ تومەنگى جالاقى مولشەرى 41%-عا ءوستى. وسىلايشا, 1 ملن 650 مىڭ ادامنىڭ تابىسى ارتا ءتۇستى, – دەدى ۆيتسە-مينيستر.
ونىڭ ايتۋىنشا, مەملەكەت باسشىسىنىڭ تاپسىرمالارىن ىسكە اسىرۋ شەڭبەرىندە 2022 جىلعى اقپاندا اتالعان ۆەدومستۆو ءتيىستى نورماتيۆتىك-قۇقىقتىق اكتىلەرگە وزگەرىستەر ەنگىزدى. وسىلايشا, «جاستار پراكتيكاسىنا قاتىسۋ كەزەڭى 6 ايدان 12 ايعا دەيىن, «العاشقى جۇمىس ورنى» جوباسى بويىنشا 12-دەن 18 ايعا دەيىن ۇزارتىلدى.
– جاستار پراكتيكاسىنا قاتىسۋشىلاردىڭ جالاقىسى 20%-عا, ياعني 25-تەن 30 اەك-كە دەيىن, «العاشقى جۇمىس ورنى» جوباسىنا قاتىسۋشىلاردىڭ جالاقىسى 50%-عا, ياعني 20-دان 30 اەك-كە دەيىن ءوستى. ول 90 مىڭ تەڭگە كولەمىندەگى قاراجات. بۇل مەملەكەت تاراپىنان بولىنەتىن قارجى. سونىمەن قاتار جۇمىس بەرۋشى قوسىمشا تولەم جاساسا, بۇل كورسەتكىش 100 مىڭ تەڭگەدەن اسۋى مۇمكىن. سونداي-اق جاڭا بيزنەس-يدەيالاردى ىسكە اسىرۋعا ارنالعان گرانت مولشەرى 200-دەن 400 اەك-كە, ياعني 1,2 ملن تەڭگەگە دەيىن 2 ەسەگە ۇلعايدى, – دەدى ە.ءبىرجانوۆ.
2021 جىلعى قازاندا مەملەكەت باسشىسىنىڭ تاپسىرماسىنا سايكەس جوبالىق باسقارۋ جۇيەسىن ەنگىزە وتىرىپ, «ەڭبەك» مەملەكەتتىك باعدارلاماسى جاڭا كاسىپكەرلىكتى دامىتۋ جونىندەگى ۇلتتىق جوبا رەتىندە قايتا فورماتتالدى. جوبا بويىنشا وڭىرلەردە جاڭا جۇمىس ورىندارى قۇرىلىپ, جىل سايىن 700 مىڭ ادامدى جۇمىسقا جاردەمدەسۋ شارالارىمەن تارتۋ كوزدەلدى.
– سونىڭ ىشىندە 36 مىڭ ادام كاسىپتىك وقىتۋمەن قامتىلادى. 50 مىڭ ادامعا كاسىپكەرلىك باستاماشىلىققا جاردەمدەسۋ بويىنشا قولداۋ شارالارى كورسەتىلەدى. 97,6 مىڭ ادام سۋبسيديالاناتىن جۇمىس ورىندارىنا جۇمىسقا ورنالاستىرىلادى. بيىلعى 2 ايدىڭ قورىتىندىسى بويىنشا 115,6 مىڭ ادام وسى شارالارعا تارتىلدى. سونىڭ ىشىندە 31,6 مىڭ ادام تۇراقتى جۇمىس ورىندارىنا ورنالاستىرىلدى. 36,4 مىڭ ادام قوعامدىق جۇمىستارعا تارتىلدى. بۇل – مەملەكەت تاراپىنان قارجىلاندىرىلاتىن جۇمىس. 8 مىڭ ادام الەۋمەتتىك ورىندارعا جۇمىسقا تارتىلدى. 3,3 مىڭ ادام جاستار پراكتيكاسىنا, ال 326 ادام «العاشقى جۇمىس ورنى» جانە «ۇرپاقتار كەلىسىمشارتى» جوبالارى اياسىندا جۇمىسقا ورنالاستىرىلدى, – دەدى سپيكەر.
ەڭبەك مينيسترلىگى حالىقتىڭ تابىسىن 2025 جىلعا دەيىن ارتتىرۋ جونىندەگى باعدارلاما شەڭبەرىندە جاڭا جۇمىس ورىندارىن قۇرۋ, حالىقتى جۇمىسپەن قامتۋعا جاردەمدەسۋ, ەڭبەك رەسۋرستارىنىڭ داعدىلارىن جەتىلدىرۋ جانە جاستاردى كاسىپتىك باعدارلاۋ جۇمىسىن قولعا الىپ كەلەدى. باعدارلامانىڭ 38 ءىس-شاراسى ۆەدومستۆونىڭ قاتىسۋىمەن ىسكە اسادى. سونىڭ 17-ءىن مينيسترلىك تىكەلەي جۇزەگە اسىرادى.
– ءبىرىنشى كەزەكتە ءىس-شارالار جۇمىس ورىندارىن قۇرۋعا جانە ءوزىن ءوزى جۇمىسپەن قامتىعان ادامداردى كولەڭكەدەن شىعارۋعا باعىتتالدى. بۇگىندە قىزمەت كورسەتۋ سالاسىندا 900 مىڭعا جۋىق ادام جۇمىس ىستەيدى. ولاردىڭ ءبىر بولىگى زاڭنان تىس قىزمەت كورسەتەدى. ياعني ولار كوبىنەسە ءبىر رەتتىك قىزمەت كورسەتىپ, كوپ جاعدايدا تاپسىرىس بەرۋشىدەن قورعالمايدى. بۇل رەتتە ءبىز «پلاتفورمالىق جۇمىسپەن قامتۋ» اتتى باعدارلامالىق ءونىمدى جاساپ شىعاردىق. بۇگىندە بۇل باعدارلاما تەستىلەۋدەن ءوتىپ جاتىر. بيىل ەنگىزىلەتىن بولادى. بۇل مىسالى, ءۇي تازارتۋ, قورعاۋ, ازىق-ت ۇلىك جەتكىزۋ سياقتى قىزمەت كورسەتەتىن ادامدارعا وسى قوسىمشادا تىركەلىپ, تەز ءارى ىڭعايلى تاپسىرىس تابۋعا مۇمكىندىك بەرەدى. قوسىمشادا تاراپتاردىڭ قۇقىقتارى مەن مىندەتتەرى, ورىنداۋشىنىڭ ەڭبەك قۇقىقتارىن قورعاۋ كوزدەلەتىن قىسقارتىلعان شارت كوزدەلەدى. بۇل كولەڭكەدەگى ادامدارعا كاسىپكەرلىك ورتانى قالىپتى دەڭگەيگە شىعارۋعا جانە اۋدارۋعا مۇمكىندىك بەرەدى. وسىلايشا, ولار وڭاي تىركەلىپ, سالىق تولەي الادى», دەدى سپيكەر.
سونداي-اق 3-ءشى جانە 4-ءشى سانات بويىنشا شەتەلدىك جۇمىس كۇشىن تارتۋعا كۆوتا 4,7 مىڭ ادامعا قىسقارتىلادى. بۇل شارالار حالىقتىڭ جۇمىسپەن قامتىلۋ دەڭگەيىن ارتتىرۋعا ءارى ىشكى ەڭبەك نارىعىن قورعاۋعا مۇمكىندىك بەرەدى.
