قادىرلى وتانداستار!
بارشاڭىزدى كۇللى مۇسىلمان بالاسى اسىعا كۇتەتىن قاسيەتتى رامازان ايىنىڭ كەلۋىمەن شىن جۇرەكتەن قۇتتىقتايمىن! ءار شاڭىراققا باقىت پەن بەرەكە, مىقتى دەنساۋلىق تىلەيمىن!
ءبىز تالاي سىندارلى ساتتەردى باستان كەشىپ كەلە جاتقان حالىقپىز. يمانىمىز بەن بىرلىگىمىزدىڭ ارقاسىندا قيىندىقتى ەڭسەرىپ, ءوسىپ-ونگەن ەلمىز. اللاعا شۇكىر, ەلدىگىمىزدى كورسەتىپ, كەشەگى «قاسىرەتتى قاڭتار» وقيعاسىن ەڭسەردىك. ەكى جىلعا سوزىلعان پاندەميالىق جاعداي كەزىندە دە بىرلىگىمىزدى كورسەتتىك.
اللا تاعالا قاسيەتتى قۇراندا: «شىن مانىندە, قيىندىقپەن بىرگە جەڭىلدىك بار» («شارح» سۇرەسى, 6-ايات) دەيدى. مىنە, بۇگىندە قاسيەتتى رامازان ايىندا جاماعاتپەن اۋىز اشىپ, كوپشىلىكپەن بىرگە قۇلشىلىق جاساۋعا مۇمكىندىك الدىق. وسى كۇنگە جەتكىزگەن جانە وسىنداي ۇلى مۇمكىندىكتى ءناسىپ ەتكەن جاراتۋشى جاببار يەمىزگە سانسىز شۇكىرلەر ايتامىز.
رامازان – تاربيە مەن تاعىلىم ايى. ەندەشە بەرەكەلى ايدا كوبىرەك ساۋاپتى امال جاساۋعا اسىعايىق, اعايىن. اتا-انامىزدىڭ, قازىنالى قارتتارىمىزدىڭ دۇعاسى مەن العىسىن الۋعا تىرىسايىق. مۇمكىندىككە قاراي مۇقتاج جاندارعا قولۇشىن بەرىپ, ناۋقاستىڭ كوڭىلىن سۇراپ, ساۋاپ الايىق.
پايعامبارىمىز مۇحاممەد (وعان اللانىڭ سالاۋاتى مەن سالەمى بولسىن): «كىمدە-كىم باۋىرىنىڭ قاجەتىن وتەسە, اللا ونىڭ قاجەتىندە بولادى. كىمدە-كىم مۇسىلماننىڭ ءبىر قايعىسىن سەيىلتسە, اللا ونىڭ قايعى-قاسىرەتتەرىنىڭ ءبىرىن سەيىلتەدى», دەگەن.
رامازان – راببىمىزدىڭ مەيىرىم-ماحابباتىنا بولەنەتىن اي. بەرەكەلى ايدىڭ بەرەكەتىنەن قۇر قالمايىق, حالايىق. ساۋابى ەسەلەنىپ جازىلاتىن ايدا ءاربىر ىزگى امالىمىز قابىل بولعاي. اللا تاعالا ۇستاعان ورازامىزدى, قوعام ءۇشىن جاسالعان قايىرلى ىستەرىمىزدى مول ساۋاپتان جازعاي. ەلىمىز امان, جەرىمىز تىنىش, تاۋەلسىزدىگىمىز باياندى بولعاي. ءامين!
ناۋرىزباي قاجى تاعان ۇلى,
قازاقستان مۇسىلماندارى ءدىني
باسقارماسىنىڭ توراعاسى, باس ءمۇفتي
