سۋرەتتى تۇسىرگەن تۇرار قاعانعاپوۆ
وسىدان ءبىر اپتا بۇرىن كيشينەۆتەگى «زيمبرۋ» ستاديونىندا ۇيىمداستىرىلعان العاشقى كەزدەسۋ 2:1 ەسەبىمەن قازاقستان قۇراماسىنىڭ پايداسىنا اياقتالعان ەدى. وسىلايشا, ەكى ويىننىڭ قورىتىندىسى بويىنشا 2:2 ەسەبىمەن تەڭ ءتۇسىپ, ماتچ سوڭىنداعى پەنالتي سەرياسىندا مولدوۆانى قاپى قالدىرعان قازاقستان قۇراماسى ەكىنشى جىل قاتارىنان ۇلتتار ليگاسىنىڭ «س» ليگاسىندا ونەر كورسەتەتىن بولدى.
اۋا رايىنىڭ اسا قولايسىزدىعىنا قاراماستان «استانا ارەناعا» كەلگەن 12 مىڭنان استام جانكۇيەردىڭ قولداۋىمەن وتكەن قارىمتا كەزدەسۋدە قازاقستان قۇراماسىنىڭ باس باپكەرى مىندەتىن اتقاراتىن اندرەي كارپوۆيچ ويىنعا تاكتيكالىق وزگەرىس جاساماعانىمەن, الاڭعا ەكى جاڭا فۋتبولشى شىعاردى. كيشينەۆتەگى ماتچتا ونەر كورسەتكەن جارتىلاي قورعاۋشى دۋمان نارزىلداەۆ پەن شابۋىلشى الەكسەي ششەتكيننىڭ ورنىنا يسلامبەك قۋات پەن ابات ايىمبەتوۆتى ءبىرىنشى مينۋتتان باستاپ ويىنعا ارالاستىردى. ال مولدوۆا قۇراماسىنىڭ باس باپكەرى سەرگەي كلەششەنكونىڭ ءبىرىنشى ويىنعا قاراعاندا ازداعان تاكتيكالىق وزگەرىس ەنگىزگەنىن بايقادىق. العاشقى كەزدەسۋدە كلەششەنكو ەكى شابۋىلشى شىعارعان بولسا, بۇل جولى تەك ءبىر شابۋىلشىعا يەك ارتىپ, قورعانىسقا باسا ءمان بەرگەنگە ۇقسادى.
ءبىرىنشى تايمنىڭ 10-مينۋتىنا دەيىن ماتچ ءبىزدىڭ جىگىتتەردىڭ باسىمدىعىمەن ءوتىپ جاتقان ەدى. الايدا از ۋاقىت ىشىندە جاساندى الاڭعا بوي ۇيرەتكەن قوناقتار كەزدەسۋدىڭ نەبارى 13-مينۋتىندا يگور شاتسكي قورعاعان قاقپادان ساڭىلاۋ تاپتى. كەزەكتى ستاندارت ساتىندە قاجەتتى ورىننان تابىلا بىلگەن مولدوۆا قۇراماسىنىڭ قورعاۋشىسى يگور ارماش «قايشى» ادىسىمەن تاماشا گول سوقتى – 0:1. مولدوۆالىقتار گول سوققاننان كەيىن قارقىنىنا قارقىن قوسىپ, ءبىرىنشى تايمنىڭ سوڭىنا دەيىن قاقپاشىمىز بەن قورعاۋشىلارىمىزدى ابدەن ساستىردى. ابىروي بولعاندا قارسىلاستار ءوز مۇمكىندىكتەرىن ءتيىمدى پايدالانا المادى.
مولدوۆاداعى ءبىرىنشى ويىنداعىداي ءبىزدىڭ جىگىتتەر بۇل جولعى ەكىنشى تايمدا دا بەلسەندى بولدى. العاش 63-مينۋتتا ابات ايىمبەتوۆتە باسپەن گول سوعاتىن تاماشا مۇمكىندىك بولسا, ارادا از ۋاقىت وتكەندە اسحات تاعىبەرگەننىڭ الىستان باعىتتاعان سوققىسى قاقپادان ءسال قيىس كەتتى. ال 82-مينۋتتا قورعاۋشى ءنۇرالى ءالىپتىڭ ايىپ الاڭىنىڭ ىشىنەن تەپكەن دوبىن بۇل جولى قاقپاشى دوريان رەيليان قايتاردى. مولدوۆالىق فۋتبولشىلار ەكىنشى تايمدا دا قاراپ قالعان جوق. ولاردا دا ەسەپتى ەسەلەيتىن ءبىر-ەكى تاماشا مۇمكىندىك بولدى. بىراق قىراعى قاقپاشى شاتسكي ەكىنشى تايمدا قاقپاسىن گولدان امان ساقتاپ قالدى.
ماتچتىڭ نەگىزگى ۋاقىتى 0:1 ەسەبىمەن (ەكى ويىننىڭ قورىتىندىسى بويىنشا ەسەپ – 2:2) اياقتالعان سوڭ, كەزدەسۋ قوسىمشا تايمعا ۇلاستى. 15 مينۋتتان تۇراتىن ەكى ەكسترا تايمدا دا فۋتبولشىلار ءبىر-ءبىرىنىڭ قاقپاسىنا گول سوعا الماي, جەڭىمپاز كوماندا ويىن سوڭىنداعى پەنالتي سەرياسىندا انىقتالاتىن بولدى. فۋتبول لوتەرەياسى سانالاتىن پەنالتي باسەكەسىن ءساتتى باستاعان قوناقتار ءا دەگەننەن 3:1 ەسەبىمەن العا شىعىپ, جەڭىسكە ءبىر تابان جاقىنداي ءتۇستى. دەگەنمەن 11 مەترلىك نۇكتەگە كەلگەن كەيىنگى فۋتبولشىلارىمىز ءوز مۇمكىندىكتەرىن ءساتتى پايدالانىپ, تارازى باسىن تەڭەستىرىپ ۇلگەردى. ستاديونداعى جانكۇيەرلەردىڭ قيقۋى مولدوۆالىقتارعا قاتتى اسەر ەتكەن بولۋى كەرەك, ولار كەيىنگى ەكى مۇمكىندىگىندە ءمۇلت كەتىپ, 5:4 ەسەبىمەن جەڭىلىس تاپتى. وسىلايشا, قازاقستان «س» ليگاسىنداعى ورنىن ساقتاپ قالسا, مولدوۆالىقتار «D» ليگاسىنا سىرعىدى.
ەندى فۋتبولدان قازاقستان قۇراماسى الداعى ماۋسىم ايىندا باستالاتىن ۇلتتار ليگاسىنىڭ ءۇشىنشى ماۋسىمىندا «س» ليگاسىنىڭ ءتورتىنشى توبىندا وينايدى. بىلتىر نوندا (شۆەيتساريا) وتكەن جەرەبە تارتۋ راسىمىندە قازاقستان – مولدوۆا جۇبىنىڭ جەڭىمپازى سلوۆاكيا, بەلارۋس جانە ازەربايجان قۇرامالارىمەن باق سىنايتىنى بەلگىلى بولعان ەدى.
ءبىزدىڭ جىگىتتەر بۇگىنگە دەيىن بەلارۋس جانە ازەربايجان قۇرامالارىمەن ءار جىلدارداعى الەم جانە ەۋروپا بىرىنشىلىكتەرىنىڭ ىرىكتەۋ كەزەڭدەرىندە, ۇلتتار ليگاسىندا ءجيى كەزدەستى. ياعني ەكى ەلدىڭ فۋتبول دەڭگەيى دە, فۋتبولشىلارى دا ءبىزدىڭ ويىنشىلار مەن جانكۇيەرلەرگە جاقسى تانىس. ال سلوۆاكيامەن حالىقارالىق تۋرنيرلەردە تۇڭعىش رەت كەزدەسپەك. ءتىپتى ەكى ەلدىڭ فۋتبولشىلارى جولداستىق كەزدەسۋ دە وتكىزبەگەن.
سلوۆاكيا قۇراماسى ۇلتتار ليگاسىنىڭ بىلتىرعى ماۋسىمىندا «ۆ» ليگاسىنىڭ ءۇشىنشى توبىندا چەحيا, شوتلانديا جانە يزرايلمەن بىرگە ونەر كورسەتىپ, كوش سوڭىندا قالىپ قويدى. التى ويىننىڭ بىرەۋىندە شوتلانديانى جەڭىپ (1:0), بىرەۋىندە يزرايلمەن تەڭ (1:1) وينادى. ال قالعان ويىننىڭ بارىندە قارسىلاستارىنا جول بەردى. ءسويتىپ ءوز توبىندا ءتورتىنشى ورىن العان سلوۆاكيالىقتارى «ۆ» ليگاسىنان «س» ليگاسىنا سىرعىدى.
ازەربايجان فۋتبولشىلارى بىلتىر چەرنوگوريا, ليۋكسەمبۋرگ جانە كيپر قۇرامالارىمەن «س» ليگاسىنىڭ ءبىرىنشى توبىندا باق سىنادى. سىرت الاڭدا كيپردى 1:0 ەسەبىمەن جەڭىپ, سوڭعى ءۇش ويىندا تەڭ تۇسكەن ازەربايجان 6 ۇپايمەن ءۇشىنشى ورىنعا يە بولدى. ايتا كەتەيىك, قازاقستان مەن ازەربايجان قۇرامالارى بۇگىنگە دەيىن 8 رەت جاسىل الاڭدا جولىعىپ, سونىڭ تورتەۋىندە قازاقستاندىق فۋتبولشىلاردىڭ مەرەيى ۇستەم بولعان. ەكى ماتچتا ازەربايجان جەڭىسكە جەتسە, ەكى ويىندا كوماندالاردىڭ كۇشتەرى تەڭ بولدى.
ال بەلارۋس قۇراماسى قازاقستان, البانيا, ليتۆا فۋتبولشىلارىمەن ءبىر توپتا سىنعا ءتۇستى. التى ماتچتىڭ ۇشەۋىندە جەڭىسكە جەتىپ (ونىڭ ەكەۋىندە قازاقستان قۇراماسىنان باسىم ءتۇستى), ءبىر كەزدەسۋدە تەڭ وينادى. ەكى كەزدەسۋدە جەڭىلگەن بەلارۋس البانيادان ءبىر ۇپاي كەم جيناپ,10 ۇپايمەن ەكىنشى ورىنعا تابان تىرەگەن بولاتىن.
