دەمالىس كۇندەرىنە جوسپارلانعان فەستيۆال «مۋزىكا الەمى» كونتسەرتىمەن باستالىپ, سەرگەي پروكوفەۆتىڭ «پەتيا مەن قاسقىر» سيمفونيالىق ەرتەگىسى, كاميل سەن-سانستىڭ «جانۋارلار كارناۆالى» زوولوگيالىق فانتازياسىمەن جالعاستى.
ايتا كەتەيىك, فەستيۆالدىڭ سالتاناتتى اشىلۋىندا بالالاردىڭ وزدەرى جۇرگىزۋشى بولىپ, تەاتر جۇلدىزدارىمەن ءبىر ساحنادا ونەر كورسەتتى. باعدارلاماعا ەنگەن كونتسەرتتەر مەن سپەكتاكلدەر قازاق جانە ورىس تىلدەرىندە ءوتتى.
– «بالالار اپتالىعىنا» قىزىعۋشىلار كوپ بولدى. تەاترعا بالالارىن الىپ كەلەتىن اتا-انالارعا مۋزىكاعا دەگەن ماحابباتتى بالالىق شاقتان باستاپ ءسىڭىرۋ كەرەكتىگىن تۇسىنگەندەرى ءۇشىن ريزامىز. فەستيۆال باعدارلاماسىنا بالالار تەاتر جۇمىسىن باستاعان ساتتەن-اق ۇناتقان كونتسەرتتەر مەن سپەكتاكلدەر ەندى. فەستيۆال تانىمال كومپوزيتور ت.بەيسەمبەكتىڭ «سامۇرىق كەلگەن تاڭ» مۋزىكالىق ەرتەگىسىنىڭ كورسەتىلىمىمەن جابىلدى. بۇل – كوكتەم, ناۋرىز, جاقسىلىق پەن كۇن, باقىت پەن بالا كۇلكىسى جايلى حيكايا. «بالالارعا ارنالعان كلاسسيكالىق مۋزىكا اپتالىعى» فەستيۆالى جىل سايىن وتكىزىلەدى دەگەن ۇمىتتەمىز ءارى ونىڭ باعدارلاماسىن جاڭا كونتسەرتتەرمەن بايىتۋعا دايىنبىز, – دەيدى ادەبي-مۋزىكالىق جۇمىس دەپارتامەنتىنىڭ ديرەكتورى مارجان جاكەنوۆا.
سونداي-اق ونىڭ ايتۋىنشا, فەستيۆال افيشاسىندا كورسەتىلگەن كونتسەرتتەر تىزىمىنە كۇلاش بايسەيىتوۆا اتىنداعى كامەرالىق زالدىڭ رەپەرتۋارىنداعى مۋزىكالىق باعدارلامالاردىڭ بارلىعى دەرلىك ەنبەگەن. ماسەلەن, اعارتۋشىلىق سيپاتتا, شامامەن 20 كونتسەرت وتكىزىلسە, سولاردىڭ اياسىندا بالالارعا اسپاپتاردىڭ ءتۇرلى توپتارى, وپەرا داۋىستارىنىڭ تۇرلەرى تانىستىرىلدى.
مەملەكەت باسشىسى قاسىم-جومارت توقاەۆ بالالار – مەملەكەتىمىزدىڭ جارقىن بولاشاعىنىڭ كەپىلى ەكەنىن تىلگە تيەك ەتىپ, ولارعا ايرىقشا كوڭىل ءبولۋ كەرەكتىگىن ايتقان بولاتىن. وسى ورايدا «استانا وپەرا» تەاترىندا باستاۋ العان جاڭا جوبا بالالاردىڭ ونەرگە دەگەن قىزىعۋشىلىعىن ارتتىرىپ, شىعارماشىلىق قىرلارىنىڭ اشىلۋىنا سەپ بولماق.
