ەسكە سالا كەتەيىك, كەزەكتەن تىس ءححىى سەزدە Amanat پارتياسىنىڭ توراعاسى قاسىم-جومارت توقاەۆ پارتيا جانىنداعى قوعامدىق كەڭەستەردىڭ تيىمدىلىگىن ارتتىرۋ مىندەتىن قويعان ەدى. «قوعامدىق كەڭەستەردىڭ ءبىر-ءبىرىنىڭ جۇمىسىن قايتالاۋىنا جول بەرمەۋ جانە جۇمىس تيىمدىلىگىن ارتتىرۋ ماقساتىندا, پارتيا توراعاسىنىڭ كەلىسىمىمەن جانە ساياسي كەڭەس بيۋروسىنىڭ شەشىمىمەن ولاردىڭ سانى 14-تەن 9-عا دەيىن قىسقارتىلىپ, باسشىلارى بەكىتىلدى», دەدى پارتيانىڭ اتقارۋشى حاتشىسى اسحات ورالوۆ كەڭەستەردىڭ جاڭا توراعالارىمەن كەزدەسۋ بارىسىندا.
سونىمەن, مەملەكەتتىك باسقارۋدى دامىتۋ جانە سىبايلاس جەمقورلىققا قارسى ءىس-قيمىل جونىندەگى رەسپۋبليكالىق قوعامدىق كەڭەستى – ەرلان سايروۆ, ەكونوميكا, كاسىپكەرلىك جانە اگرارلىق سەكتور ماسەلەلەرى جونىندەگى كەڭەستى – امانجان جامالوۆ, وتباسى جانە حالىقتى الەۋمەتتىك قورعاۋ ماسەلەلەرى جونىندەگى كەڭەستى – دينارا زاكيەۆا, ءبىلىم بەرۋ جانە دەنساۋلىق ساقتاۋ ماسەلەلەرى جونىندەگى كەڭەستى – ساياسات نۇربەك, ازاماتتىق قوعام مەن مادەنيەتتى دامىتۋ جونىندەگى Miras قوعامدىق كەڭەسىن – امانجول ءالتاي, ەكولوگيالىق كەڭەستى – ەدىل جاڭبىرشين, وڭىرلىك دامۋ جونىندەگى كەڭەستى – ءامىرحان راحىمجانوۆ, جاستاردى قولداۋ جونىندەگى كەڭەستى ەلنۇر بەيسەنباەۆ باسقارادى. ال پارتيالىق باقىلاۋ كوميتەتىنە بۇرىنعىسىنشا ارتۋر پلاتونوۆ توراعالىق ەتەدى.
كەزدەسۋ بارىسىندا اتقارۋشى حاتشى كەڭەستەر جۇمىسىنىڭ جاڭا فورماتىن تانىستىردى. اتاپ ايتقاندا, جىل سوڭىندا سايلاۋالدى باعدارلامانىڭ ناقتى ينديكاتورلارىنىڭ ورىندالماۋىنا قاتىستى تاۋەكەلدەر انىقتالعان جاعدايدا, مەملەكەتتىك ورگانداردىڭ جاۋاپتى باسشىلارى كەڭەستەر وتىرىسىندا ەسەپ بەرەدى.
سونىمەن قاتار كەڭەستەر پارتيا توراعاسىنىڭ تاپسىرمالارىن جەمىستى جۇزەگە اسىرۋ ءۇشىن بەلسەندىلەر مەن ساراپشىلاردىڭ باسىن قوسادى. ء«بىزدىڭ كەڭەستەرىمىز پارتيالاستاردىڭ سەنىمىنە يە بەلسەندى دە بەدەلدى تۇلعالاردى تارتىپ, ولاردى ىلگەرىلەتۋ تەتىگىنە اينالۋعا ءتيىس. XXII سەزدە پارتيا توراعاسى: «پرايمەريز بارىسىندا پارتياعا بەلسەندى ادامدار كەلىپ, پارتياىشىلىك باسەكەلەستىك پايدا بولدى. بۇل قۇپتارلىق جاعداي», دەگەن بولاتىن. سوندىقتان كەڭەستەردىڭ جۇمىسىنا ەلدىڭ دامۋىنا ءوز ۇلەسىن قوسقىسى كەلەتىن كاسىبي مامانداردى تارتۋ قاجەت», دەدى ا.ورالوۆ.
وڭىرلىك دامۋ كەڭەسىنىڭ توراعاسى ءامىرحان راحىمجانوۆ الداعى جۇمىس جوسپارىمەن ءبولىستى. «اۋىل – ەل بەسىگى» باعدارلاماسىنا شامامەن 450 ملرد تەڭگە ءبولىندى. وسى اقشانىڭ ءتيىمدى جۇمسالۋىن باقىلاۋ – ءبىزدىڭ كەڭەستىڭ نەگىزگى مىندەتتەرىنىڭ ءبىرى. پارتيانىڭ سايلاۋالدى ۋادەلەرىن ناقتى ىسكە اسىرۋ وسىعان بايلانىستى», دەدى ول.
ءوز كەزەگىندە, پارتيالىق باقىلاۋ كوميتەتىنىڭ توراعاسى ارتۋر پلاتونوۆ, «بۇگىنگى تاڭدا ەلىمىزدە جانە الەمدە ورىن الىپ جاتقان وقيعالار پرەزيدەنت قويعان مىندەتتەردى بارىنشا جەدەل ورىنداۋدىڭ ماڭىزدىلىعىن كورسەتەدى. ەلىمىزدىڭ بولاشاعى, اۋماقتىق تۇتاستىعى, تاۋەلسىزدىگى جانە حالىقتىڭ ءال-اۋقاتى وسىعان بايلانىستى», دەدى.
ەكولوگيالىق كەڭەستىڭ توراعاسى ەدىل ءجاڭبىرشيننىڭ پىكىرىنشە, اماناتتىقتارعا ءوڭىر تۇرعىندارىمەن كوبىرەك كەزدەسۋلەر وتكىزۋ كەرەك. «حالىقپەن كەزدەسۋدە كوتەرىلەتىن ماسەلەلەردىڭ 80%-ى سول جەرگىلىكتى جەرلەردە شەشىلۋى ءتيىس. تەك 20-25% عانا زاڭناماعا وزگەرىستەر ەنگىزۋگە قاتىستى نەمەسە ورتالىق مەملەكەتتىك ورگانداردىڭ قۇزىرەتىنە كىرەدى. قالعان ماسەلەلەر اۋدان, وبلىس دەڭگەيىندە شەشىلۋى كەرەك», دەدى ە.جاڭبىرشين.
ايتا كەتەيىك, وتكەن جىلدىڭ قورىتىندىسى بويىنشا رەسپۋبليكالىق كەڭەستەر 80-نەن استام وتىرىس وتكىزدى. ولاردىڭ بارىسىندا 160-تان استام ماسەلە قارالىپ, ورتالىق جانە جەرگىلىكتى اتقارۋشى ورگاندارعا ءتيىستى ۇسىنىمدار جولداندى.
