اسسامبلەيا توراعاسىنىڭ ورىنباسارى – حاتشىلىق مەڭگەرۋشىسى مارات ءازىلحانوۆ انالار كەڭەسىنىڭ جۇمىسى تۋرالى ايتا كەلە, حالىقتىڭ ءتۇرلى توپتارىن ماقساتتى قامتۋ ءۇشىن انالاردىڭ الەۋەتىن ارتتىرۋدىڭ ماڭىزدىلىعىنا نازار اۋداردى.
– اسسامبلەيانىڭ انالار كەڭەستەرى ساياسي رەفورمالار ستراتەگياسىن ىسكە اسىرۋعا, ەلدەگى بەيبىتشىلىك پەن كەلىسىمدى نىعايتۋعا, ازاماتتىق قوعاممەن بايلانىس ورناتۋدا ەڭبەك ەتەدى. انالار كەڭەسى بالالاردىڭ قۇقىقتارىن قورعاۋ, سۋيتسيدكە جول بەرمەۋ, قوعامداعى زورلىق-زومبىلىقتى ازايتۋ, وتباسىلىق-تۇرمىستىق قاتىناستار سالاسىنداعى قۇقىق بۇزۋشىلىقتاردىڭ الدىن الۋ بويىنشا جۇمىستارعا بەلسەندى ارالاسۋى كەرەك. ءبىز رەسمي تۇردە «مادەنيەتتى انا – مادەنيەتتى ۇلت» جوباسىن ىسكە اسىرۋدى باستايمىز. جوبا اجىراسۋ, ءسۋيتسيدتىڭ الدىن الۋ, سالاماتتى ءومىر سالتىن دارىپتەۋ, ءبىلىم مەن ەڭبەكسۇيگىشتىككە باۋلۋ بويىنشا مەملەكەتتىك ورگاندارمەن, ازاماتتىق قوعام ينستيتۋتتارىمەن بىرلەسە جۇمىس ىستەيدى, – دەدى م.ءازىلحانوۆ.
جاڭا جوبانى تولىعىراق تانىستىرعان قازاقستان حالقى اسسامبلەياسى رەسپۋبليكالىق انالار كەڭەسىنىڭ ءتورايىمى نازيپا شاناي ءار باعىتقا جەكە توقتالىپ, ورتالىق پەن جەرگىلىكتى جەرلەردە وتەتىن ءىس-شارالاردى باياندادى.
وتىرىس بارىسىندا اسسامبلەيانىڭ وڭىرلىك انالار كەڭەسىنىڭ جەتەكشىلەرى ءسوز سويلەپ, ەتنومادەني بىرلەستىكتەردىڭ قولداۋىمەن وڭىرلەردە جۇرگىزىلىپ جاتقان جۇمىستارعا توقتالدى.
