ەلوردادا قازاقستانداعى جاپونيا ەلشىلىگى جاپون يمپەراتورىنىڭ تۋعان كۇنى قۇرمەتىنە سالتاناتتى قابىلداۋ وتكىزدى. نۇر-سۇلتاندا وتكەن سالتاناتتى جيىنعا قازاقستان رەسپۋبليكاسى سىرتقى ىستەر ءمينيسترىنىڭ ءبىرىنشى ورىنباسارى شاحرات نۇرىشەۆ, قازاقستاندىق دەپۋتاتتار مەن ەلىمىزدەگى ديپلوماتيالىق ميسسيا وكىلدەرى قاتىستى.
جاپونيانىڭ ۇلتتىق مەيرامىن تويلاۋ كەزىندە قازاقستان مەن جاپونيا اراسىنداعى ديپلوماتيالىق قاتىناستاردىڭ ورناۋىنا 30 جىل تولعانى اتاپ ءوتىلدى.
اشىلۋ راسىمىندە قازاقستان ءانۇرانىن مۋزىكالىق اسپاپتا ورىنداعان جاپونيانىڭ قازاقستانداعى ەلشىسى دجۋن يامادا ەكى ەل اراسىنداعى تىعىز بايلانىستى, دوستىق قارىم-قاتىناستى ەرەكشە اتاپ ءوتتى. ءىس-شارا بارىسىندا «كاگاميۆاري» دەپ اتالاتىن جاپوننىڭ ۇلتتىق ساكەسى قۇيىلعان بوشكەنى جارۋ سالتاناتى وتكىزىلدى. قاتىسۋشىلار جاپون حالقىنىڭ مادەنيەتىمەن جاقىنىراق تانىسۋعا مۇمكىندىك الدى.
جالپى, قازاقستان مەن جاپونيانىڭ ديپلوماتيالىق قارىم-قاتىناس ورناتۋىنا 30 جىل تولۋى كەڭ كولەمدە اتالىپ ءوتىپ جاتقانىن ايتا كەتۋ كەرەك. ناۋرىز مەيرامى قارساڭىندا جاپونياداعى قازاقستان ەلشىلىگى جاپونيالىق ارىپتەستەرىنىڭ قاتىسۋىمەن دوڭگەلەك ۇستەل ۇيىمداستىردى.
دوڭگەلەك ۇستەل بارىسىندا قازاقستان پرەزيدەنتى قاسىم-جومارت توقاەۆتىڭ قازاقستان حالقىنا جولداۋىنىڭ نەگىزگى تۇستارى تالقىلاندى. قاتىسۋشىلارعا جۇزەگە اسىرىلىپ جاتقان ساياسي جانە الەۋمەتتىك-ەكونوميكالىق رەفورمالاردىڭ بارىسى تۋرالى باياندالدى. قازاقستاندى ودان ءارى دامىتۋعا جانە قوعامىمىزدى دەموكراتيالاندىرۋعا ىقپال ەتەتىن سۋپەرپرەزيدەنتتىك فورمادان كۇشتى پارلامەنتتىك رەسپۋبليكاعا كوشۋ سياقتى ماڭىزدى ساياسي باستامالارعا ەرەكشە نازار اۋدارىلدى.
ءوز كەزەگىندە, قاتىسۋشىلار ەكىجاقتى ىنتىماقتاستىقتىڭ جاي-كۇيى مەن بولاشاعىن تالقىلاپ, قازاقستان مەن جاپونيا اراسىنداعى ءوزارا ىقپالداستىقتى كەڭەيتۋدىڭ جاڭا باعىتتارىن بەلگىلەدى.
سونىمەن قاتار قازاقستان پرەزيدەنتى ق.توقاەۆتىڭ جارلىعىمەن حح عاسىردىڭ باسىنداعى قازاق زيالىلارىنىڭ تاريحىن زەرتتەۋشى, حوككايدو ۋنيۆەرسيتەتىنىڭ پروفەسسورى توموحيكو ۋياماعا ءىى دارەجەلى «دوستىق» وردەنى جانە 1993-1996 جىلدار ارالىعىندا قازاقستاندا قىزمەت اتقارعان جاپونيانىڭ قازاقستانداعى تۇڭعىش ەلشىسى اكيرا ماتسۋيگە «قازاقستان تاۋەلسىزدىگىنە 30 جىل» مەرەيتويلىق مەدالى تاپسىرىلدى.
ال قازاقستانداعى جاپونيا ەلشىلىگى ەلىمىزدە ءتۇرلى مادەني ءىس-شارالار ۇيىمداستىرىپ, ءوزارا بايلانىستاردى نىعايتۋعا اتسالىسىپ كەلەدى. جاقىندا قازاق ۇلتتىق حورەوگرافيا اكادەمياسى, ەلىمىزدەگى جاپونيا ەلشىلىگى جانە جاپونيا ۇكىمەتىنىڭ مادەنيەت ىستەرى اگەنتتىگى بىرلەسىپ, زاماناۋي بيدەن ءدارىس وتكىزدى. ونلاين ءىس-شارا ەكى ەل اراسىنداعى مادەني بايلانىستى ارتتىرىپ, قازاقستان مەن جاپونياداعى زاماناۋي ءبيدىڭ قازىرگى دامۋىن تالقىلاۋعا ارنالدى.
جاپونيانىڭ زاماناۋي ءبيى تۋرالى جاپون مادەنيەتىنىڭ وكىلى, پروفەسسور اكيكو كيتامۋرا ايتىپ بەردى. ال ونەرتانۋ عىلىمدارىنىڭ كانديداتى, قازاق ۇلتتىق حورەوگرافيا اكادەمياسى رەجيسسەرلىك كافەدراسىنىڭ اعا وقىتۋشىسى انۆارا سادىقوۆا قازاق ءبيىنىڭ قالىپتاسۋى مەن دامۋى تۋرالى باياندادى. وسىلايشا, ەكى ەل اراسىنداعى مادەني بايلانىس تەرەڭدەي ءتۇسىپ, بي ونەرىنىڭ دامۋى جايلى قۇندى ماعلۇمات بەرىلدى.
ءبىلىم بەرۋ سالاسى مەن جوعارى وقۋ ورىندارى اراسىنداعى بايلانىستى نىعايتۋ باعىتىنداعى ءىس-شارالار مۇنىمەن شەكتەلمەدى. ناۋرىز ايىندا قازاقستان جاپون ءتىلى مۇعالىمدەرى قاۋىمداستىعى مەن جاپونيانىڭ قازاقستانداعى ەلشىلىگى بىرلەسىپ, 23-ءشى قازاقستاندىق جاپون ءتىلى بويىنشا شەشەندىك ونەر بايقاۋىن وتكىزدى. بايقاۋعا ءال-فارابي اتىنداعى قازاق ۇلتتىق ۋنيۆەرسيتەتى, ابىلاي حان اتىنداعى حالىقارالىق قاتىناستار جانە الەم تىلدەرى ۋنيۆەرسيتەتى, ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى, يچيكاۆا جاپون ءتىلى مەكتەبى جانە قازاقستان-جاپونيا ادامي دامۋ ورتالىعىنان 16 ستۋدەنت قاتىسىپ, جاپون تىلىندە بايانداما جاسادى. تسۋكۋبا ۋنيۆەرسيتەتى ءىس-شارانىڭ دەمەۋشىسى رەتىندە ءسوز سايىسىنا قاتىسۋشىلارعا سىيلىق تابىس ەتتى. قازاقستاندا جاپون ءتىلىن ۇيرەنۋشىلەردىڭ تاجىريبە الماسۋىنا جول اشقان ءىس-شارا ەكى ەلدىڭ ءبىلىم بەرۋ سالاسىنداعى ءوزارا بايلانىسىن ارتتىرا ءتۇستى.
وسىلايشا, قازاقستان مەن جاپونيا اراسىنداعى ءتۇرلى سالاداعى ءوزارا ىنتىماقتاستىق جاڭاشا سيپات الۋدا.
