وسى جول كارتاسىنىڭ 22 تارماعىنا سايكەس اگەنتتىكتىڭ قىزىلوردا وبلىسى بويىنشا دەپارتامەنتىنىڭ قىزمەتكەرلەرى قوعام بەلسەندىلەرىمەن بىرلەسە وتىرىپ مەملەكەتتىك ساتىپ الۋ باعاسىن قولدان كوتەرگەندەردى انىقتاپ, سىبايلاس جەمقورلىق تاۋەكەلدەرىن انىقتاۋعا مۇمكىندىك بەرەتىن «بىرىڭعاي ساتىپ الۋ تەرەزەسى» ۆەب-پورتالى ارقىلى وبلىس كولەمىندە جاريالانىپ جاتقان نەمەسە جوسپارلانىپ وتىرعان مەملەكەتتىك ساتىپ الۋلارعا تۇراقتى تۇردە مونيتورينگ جۇرگىزىپ كەلەدى.
وتكەن جىلى مەملەكەتتىك ساتىپ الۋ جوسپارلارىنا جۇرگىزىلگەن مونيتورينگ قورىتىندىسىمەن 80-نەن اسا مەملەكەتتىك مەكەمەگە ۇسىنىس جولدانىپ, 3,3 ملرد تەڭگە مەملەكەت قارجىسى ۇنەمدەلىپتى. وسى باعىتتاعى جۇمىستار بارىسىن بايانداعان سىبايلاس جەمقورلىققا قارسى ءىس-قيمىل اگەنتتىگى قىزىلوردا وبلىسى بويىنشا دەپارتامەنتى باسشىسىنىڭ ءبىرىنشى ورىنباسارى عاليا الىمقۇلوۆا بيىل دا مەملەكەتتىك ساتىپ الۋدا زاڭ شەگىنەن اتتاپ كەتكەندەر ازايماي وتىرعانىن جەتكىزدى.
مىسالى, مەملەكەتتىك رەتتەۋ بەلگىلەنگەن بولشەك ساۋدادا وتكىزىلەتىن مۇناي ونىمدەرىنە شەكتى باعالار بەلگىلەۋ تۋرالى ەنەرگەتيكا ءمينيسترىنىڭ 2015 جىلعى 19 مامىرداعى №361 بۇيرىعىنا ەنگىزىلگەن وزگەرىستەر نەگىزىندە 1 ليتر ديزەل جانارمايى 230, اي-92 ماركالى بەنزين 182 تەڭگەدەن اسپاۋى قاجەتتىگى كورسەتىلگەن. وسىعان قاراماستان وبلىستاعى 11 مەملەكەتتىك مەكەمە ديزەل جانارمايىنىڭ 1 ءليترىن 280 تەڭگەگە دەيىنگى باعادا, ال اي-92 ماركالى بەنزيندى 205 تەڭگەدەن ساتىپ الۋدى جوسپارلاپ, مۇناي ونىمدەرىنە كەتەتىن شىعىننىڭ جالپى سوماسى 110 865 522 تەڭگەگە جەتكەن. سىبايلاس جەمقورلىققا قارسى ءىس-قيمىل اگەنتتىگىنىڭ وبلىس بويىنشا دەپارتامەنتى مەملەكەتتىك ساتىپ الۋ لوتتارىن قايتا قاراۋ تۋرالى ۇسىنىم جولداپ, بيۋدجەتتىڭ باقانداي 38 243 349 تەڭگەسىن ۇنەمدەۋگە قول جەتكىزدى.
مونيتورينگ بارىسىندا قارماقشى اۋدانىنداعى №275 ورتا مەكتەبى مەملەكەتتىك ساتىپ الۋ پورتالىندا بالالارعا الىناتىن 1 كۇرتەنى 1 670 143 تەڭگەگە باعالاپ, 125 كۇرتەنى 208 767 875 تەڭگەگە ساتىپ الۋدى جوسپارلاعانى بەلگىلى بولدى. بۇل كەمشىلىك بويىنشا دا ۇسىنىس جولدانىپ, 1 كۇرتەنىڭ باعاسى 16 701 تەڭگەگە ءتۇسىرىلىپ, 206 680 197 تەڭگە مەملەكەت قاراجاتى كەرى قايتارىلدى.
شيەلى اۋداندىق ءبىلىم ءبولىمى قارماقشىلىق ارىپتەستەرىنەن دە اسىرا سىلتەپ جىبەرىپتى. ولار 1 ليتر تابيعي ءسۇتتى ارتىق-كەمى جوق 14 577 000 تەڭگەگە باعالاعان. باعالاردى قايتا قاراۋ كەزىندە ارتىق نولدەر ازايتىلىپ, باعا 223 تەڭگەگە ءتۇستى.
دەپارتامەنتتەگىلەر وسى جىلدىڭ 2 ايىندا 17 مەكەمەگە جولدانعان ۇسىنىستاردىڭ ناتيجەسىندە, جالپى سوماسى 351 230 304 تەڭگەنىڭ ۇنەمدەلگەنىن ايتىپ وتىر.
وقيعاعا بايلانىستى الەۋمەتتىك جەلىدە پىكىر ايتۋشىلار كوبەيە باستاعان سوڭ وبلىستىق ءبىلىم باسقارماسى ماسەلەنىڭ ءمان-جايىن تۇسىندىرگەن جازبا جاريالادى. باسقارما جاۋابىندا ەكى ءبولىم تاراپىنان دا تەحنيكالىق قاتە كەتكەندىگى ايتىلادى. سونىمەن قاتار ولار كوتەرىڭكى باعا بويىنشا ەشقانداي مەملەكەتتىك ساتىپ الۋ جۇرگىزىلمەگەنىن ەسكەرتە كەتىپتى.
قىزىلوردا
