نۇر-سۇلتان قالاسى مادەنيەت جانە ءبىلىم باسقارمالارىنىڭ قولداۋىمەن وتكەن شارانى «Astana Polytechnic» جوعارى كوللەدجى ۇيىمداستىردى.
استانا كونتسەرت زالىندا وتكەن ءان دوداسىنا جوعارى وقۋ ورىندارى مەن تەحنيكالىق جانە كاسىپتىك ءبىلىم بەرۋ ۇيىمدارىنان 16 جۇپ ونەرپاز قاتىستى. بايقاۋ بارىسىندا سايىسكەرلەر ءان ايتىپ قانا قويماي, تەاترلاندىرىلعان كورىنىس پەن حورەوگرافيالىق قويىلىم دا كورسەتتى.
قازىلار القاسى ارنايى شاقىرىلعان بىلىكتىلىگى جوعارى, ونەر سالاسىنىڭ مايتالماندارىنان قۇرالعان. اتاپ ايتقاندا, قر كومپوزيتورلار وداعىنىڭ توراعاسى سەرىكجان ءابدىنۇروۆ, ە.راحماديەۆ اتىنداعى مەملەكەتتىك اكادەميالىق فيلارمونياسى ەسترادالىق جانە كلاسسيكالىق ۆوكال ءبولىمىنىڭ كوركەمدىك جەتەكشىسى ارايلىم راقىمقىزى, قر «ۇلتتىق ۇلان» ءانسامبلىنىڭ كوركەمدىك جەتەكشىسى دارحان راحىمعاليەۆ, بەيبىتشىلىك جانە كەلىسىم سارايىنىڭ ديرەكتورى ناريما مۇحامبەتالينا جانە ە.راحماديەۆ اتىنداعى مەملەكەتتىك اكادەميالىق فيلارمونيانىڭ ءانشىسى, رەسپۋبليكالىق جانە حالىقارالىق بايقاۋ جۇلدەگەرى ايدىن جۇماباەۆ تورەلىك ەتتى.
بايقاۋ ناتيجەسىندە ءى ورىنعا «Astana Polytechnic» جوعارى كوللەدجى, ءىى ورىنعا «شيپاگەر» مەديتسينالىق كوللەدجى, ءىىى ورىنعا استانا حالىقارالىق ۋنيۆەرسيتەتىنىڭ پەداگوگيكالىق كوللەدجى يە بولدى. جەڭىمپازدار قارجىلاي سىيلىققا يە بولدى.
