سامميتتە ناتو-نىڭ شىعىس ەۋروپاداعى ۇزاق مەرزىمدى ۇستانىمى باعالانادى. سارسەنبىدەن باستاپ بريۋسسەلدە مەملەكەت جانە ۇكىمەت باسشىلارى ەكىجاقتى كەزدەسۋلەر وتكىزدى. سامميتتەن كەيىن دە ناتو شتاب-پاتەرىندە ەكىجاقتى كەزدەسۋلەر جالعاسپاق.
سامميت باستالماس بۇرىن ناتو باس حاتشىسى يەنس ستولتەنبەرگ جيىندا ۋكرايناعا قاتىستى شەشىمدەر قابىلداناتىنىن, سونداي-اق اليانستىڭ تەجەۋ كۇشىن ارتتىرۋ شارالارى كەلىسىلەتىنىن ايتقان-دى.
ء«بىز بۇل داعدارىستى بىرگە شەشەمىز. ۋكرايناعا, ناتو-عا جانە بۇكىل حالىقارالىق ەرەجەلەرگە تونگەن قاۋىپپەن كۇرەسەمىز. مەملەكەتتەر باسشىلارى ۋكرايناعا قولداۋ كورسەتۋ ماسەلەسىن تالقىلايدى. وداق ۋكرايناعا بىرنەشە جىلدان بەرى قولداۋ كورسەتىپ كەلەدى. ءبىز ۋكراينانىڭ ءوزىن-ءوزى قورعاۋ قۇقىعىن ساقتاۋىنا كومەكتەسۋ ماقساتىندا اسكەري, قارجىلىق جانە گۋمانيتارلىق قولداۋ كورسەتۋدى كۇشەيتتىك», دەدى ي.ستولتەنبەرگ.
سونداي-اق ول بولگاريا, رۋمىنيا, ماجارستان جانە سلوۆاكيادا اليانستىڭ اسكەرى كوبىرەك ورنالاساتىنىن دا اتاپ ءوتتى. وسىعان بايلانىستى قورعانىس سالاسىنا كوبىرەك ينۆەستيتسيا جاسالاتىنىن جەتكىزدى.
سامميت اشىلعاننان كەيىن ناتو باس حاتشىسى يەنس ستولتەنبەرگ ءسوز سويلەپ, جيىننىڭ قاۋىپسىزدىك ماقساتىندا ءوتىپ وتىرعانىن حابارلادى. سونىمەن قاتار كرەملدىڭ نەگىزسىز اگرەسسياسىن ايىپتايتىنىن جەتكىزدى.
ء«بىز ۋكراينانىڭ ەگەمەندىگى مەن اۋماقتىق تۇتاستىعىن قولدايمىز. وسى سۇراپىل اتىستى اياقتاۋ ءۇشىن رەسەيگە شىعىن كەلتىرۋ ءىس-قيمىلىن جالعاستىرامىز. ۋكراين حالقىنىڭ جانە ۋكراينا قارۋلى كۇشتەرىنىڭ ءوز قۇقىقتارى مەن بوستاندىقتارى ءۇشىن كۇرەسۋ جولىنداعى اسقان ەرلىگىنە قۇرمەت كورسەتەمىز. سونداي-اق رەسەيدە اسكەري قاقتىعىسقا قارسى باتىل پىكىر بىلدىرگەندەردى قولدايمىز. ولاردىڭ داۋىسىن ەستيمىز. بۇل – وتە ماڭىزدى», دەدى يەنس ستولتەنبەرگ.
جيىن بارىسىندا ۋكراينا پرەزيدەنتى ۆولوديمير زەلەنسكي بەينە-ۇندەۋ جاريالادى. وندا ۆ.زەلەنسكي ناتو ەلدەرىنە رەنىشىن جەتكىزىپ, ەلدىڭ اۋە كەڭىستىگىن جابا الماعانىنا نارازىلىعىن ءبىلدىردى. سونىمەن قاتار ۋكراينا پرەزيدەنتى ناتو-دان ۇشاقتار مەن تانكتەر بەرۋدى سۇرادى.
