ونەر • 24 ناۋرىز، 2022

ايدانانىڭ دەبيۋتى

24 رەت كورسەتىلدى

قازاقستاننىڭ تۇڭعىش پرەزيدەنتى – ەلباسى كىتاپحاناسىنىڭ كوركەم گالەرەياسىندا سۋرەتشى ايدانا ءمىنايداروۆانىڭ «كۇن شاپاعى» اتتى جەكە كورمەسى اشىلدى. ءىس-شارا كىتاپحانانىڭ «تاۋەلسىزدىكتىڭ مادەني نەگىزى» جوباسى اياسىندا ۇيىمداستىرىلدى.

ايتا كەتەيىك، اتالعان كورمە – جاس سۋرەتشىنىڭ شىعارماشىلىق جولىن­دا­عى العاشقى دەبيۋتى، وعان اكۆارەل جانە مايلى بوياۋمەن ورىندالعان 50-دەن اسا جۇمىسى قويىلدى.

قىلقالام شەبەرى كوبىنەسە ادام­دار­دىڭ سىرتقى كەلبەتىن عانا ەمەس، ولاردىڭ جان-دۇنيەسىنە ءۇڭىلىپ، ءىس-ارەكەتىن بەينەلەۋگە ءمان بەرەدى. تۋىن­دىلارىنىڭ بوياۋى قانىق، كوز تارتىپ تۇرادى. اسىرەسە، ونىڭ شىعار­ما­شى­لى­عىن­دا بالالاردىڭ پورترەتتەرى ەرەكشە ورىن الادى.

ءىس-شارانىڭ اشىلۋىندا ەلباسى كىتاپحاناسىنىڭ ديرەكتورى باقىتجان تەمىربولات مەملەكەت باسشىسى جاريالاعان بيىلعى «بالالار جىلىنا» بايلانىستى ءوتىپ وتىرعان كور­مە­نىڭ ماڭىزىنا توقتالىپ، تالانتتى سۋ­رەت­شى­گە شىعارماشىلىق تابىس تىلەدى.

كورمەگە اۆتوردىڭ ەكى ايدا سالعان جۇمىستارىنىڭ دەنى قويىلعان.

«عالامتوردى وشىرگەن كەزدە، گادجەتتەردەن باس المايتىن ادامدار اينالاسىنا زەر سالا باستادى. مەن دە جان-جاعىمداعى بارلىق جانعا نازار اۋدارىپ، جۇرەگىمە جاقىن دۇنيەنى عانا ەمەس، قورشاعان ورتاعا قىمبات بارلىق نارسەنى بەينەلەدىم»، دەيدى ول.

ايدانا ءمىنايداروۆا − قالالىق، رەسپۋبليكالىق جانە حالىقارالىق كورمەلەردىڭ بەلسەندى قاتىسۋشىسى. 2017 جىلى جاعاسى مەن ورامالىنىڭ اۆتورلىق سۋرەتى بار اكسەسسۋارلار جەلىسىن شىعاردى. سول جىلى سۋرەتشى ارنايى ميلانداعى كورمە ءۇشىن AV برەندىمەن بىرگە ديزاينەرلىك كوزىل­دىرىكتەردى ورنەكتەدى. 2019 جىلى نۇر-سۇلتان، الماتى جانە تايلاندتاعى EURASIAN FASHION WEEK حالىق­ارالىق الاڭىندا NOSI MOYO قازاقستاندىق برەندىمەن بىرگە كيىم توپتاماسىن جاساۋ بويىنشا سۋرەتشى ءارى ديزاينەر بولىپ ونەر كورسەتتى.

سونداي-اق ءىس-شارا اياسىندا كورمە يەسىنىڭ پورترەت ورىنداۋدان شەبەرلىك ساعاتى ءوتتى.

سوڭعى جاڭالىقتار

تاعى 1650 قازاقستاندىق ىندەت جۇقتىردى

كوروناۆيرۋس • بۇگىن، 09:00

ۇقساس جاڭالىقتار