ناۋرىز مەيرامىن تويلاۋ بارىسىندا شەڭگەلدى اۋىلدىق وكرۋگىنە قاراستى قوسقۇدىق اۋىلىندا «الامان», «توپ», «تاي», «قۇنان» بايگەلەرى ءوتتى.
جارىس بارىسىندا قاپشاعاي ءوڭىرىنىڭ اكىمى نۇرلان ورىنباسار ۇلى حالىقتى ءاز-ناۋرىز مەرەكەسىمەن قۇتتىقتادى. سونداي-اق, اۋىل اقساقالدارى سايىس باستالار الدىندا اتبەلگىلەرگە جىلى لەبىزدەرىن ايتىپ, اق باتاسىن بەردى.
«بىزدە جاستار قوعامى بار, سولار بايگە وتكىزسەك دەگەن ۇسىنىس جاسادى. ءبىز قولداپ, سىي-سياپات جاعىنان كومەكتەستىك. شارادان تۇسكەن قاراجاتتى جاستار قوعامى قايىرىمدىلىق قورىنا اۋدارساق دەگەن ويلارىن ايتتى, ول جاعىن وزدەرى شەشە جاتار. دەگەنمەن, ولار از قامتىلعان 1-2 وتباسىنا باسپانا سالىپ بەرەمىز دەپ وتىر, ءبىز ونى قولدايمىز, ءوز تاراپىمىزدان شامامىز كەلگەنشە كومەكتەسەمىز», دەدى نۇرلان ورىنباسار ۇلى.
جالپى, رەسپۋبليكالىق دەڭگەيدە وتكەن بايگەگە الماتى, شىعىس قازاقستان, اباي, جامبىل, قاراعاندى وبلىستارىنان جانە الماتى, تالدىقورعان قالالارىنىڭ اتبەگىلەرى قاتىستى.
25 شاقىرىمدىق الامانعا - 50, 15 شاقىرىمدىق توپ بايگەسىنە – 40 , ال 8 شاقىرىمدىق قۇنان بايگەسىنە - 50, 4 شاقىرىمدىق تاي جارىسىنا – 30 سايگ ۇلىك شابىسقا جىبەرىلدى.
جالپى, سايىستا 100-دەن استام تۇلپار باق سىناستى. ناتيجەسىندە توپ بايگەدەن – باتىس قازاقستان وبلىسى, قۇنان بايگەسىنەن - ەسكەلدى اۋدانى, تاي بايگەدەن – جامبىل اۋدانى جۇلدەلى ورىندارعا يە بولعان. ال الامان بايگەدەن قورداي اۋدانى باس جۇلدەنى جەڭىپ الىپ, تىگىلگەن «لادا گرانتا» اۆتوكولىگىن قانجىعاسىنا بايلادى.
