«قازاقستان-رەسەي شەكاراسىندا جۇك كولىكتەرىنىڭ جينالىپ قالۋىنا بايلانىستى اقپاراتپەن بولىسە كەتسەم. ماشتاكوۆو/سىرىم شەكارا بەكەتىندە قازاقستانعا كىرۋ ءۇشىن كەزەگىن كۇتكەن كولىك سانى از ەمەس. قازىر جەلىدە رەسەي وتكىزبەيدى, قازاقستان كىرگىزبەيدى دەگەن ءتۇرلى حابارلاما تاراپ جاتىر. بۇل اقپاراتتىڭ شىندىققا جاناسپايتىنىن حابارلايمىن. كولىكتەردىڭ تۇرىپ قالۋىنا سوڭعى بىرنەشە اپتاداعى اۋا رايىنىڭ قولايسىزدىعى سەبەپ. بۇل ايماقتا شامامەن 10 كۇن بوران بولدى, كوكتايعاققا بايلانىستى جولدار جابىلدى. اۋا رايىنىڭ قالىپقا كەلۋىمەن جۇك كولىكتەرىنىڭ بارلىعى بىردەن رەسەيدىڭ ماشتاكوۆو وتكىزۋ بەكەتىنە كەلىپ, كوپ شاقىرىمدىق كەزەك قۇردى.
وعان قوسا, 16-17 ناۋرىزدا بولعان قارلى بوران كەزىندە قازاقستاننىڭ «سىرىم» شەكارا بەكەتىندە ەلەكتر جارىعى ۇزىلگەن. قازاقستان تاراپىنان تاۋاردىڭ كەشىگۋىنە وسى سەبەپ بولدى. بىراق قازىر جولدار اشىلىپ, تازالاندى, ماشينالاردى وتكىزۋ قالىپتى رەجيمدە ءجۇرىپ جاتىر. سونىمەن قاتار جۇكتەردى شەكارادان وتكىزۋ پروتسەسىن جەڭىلدەتۋ ماقساتىندا قازىر ءبىز ۆەتەريناريالىق ينسپەكتورلاردىڭ شەكارا بەكەتىنىڭ اۋماعىنا كىرۋىنە رۇقسات بەرۋ مۇمكىندىگىن پىسىقتاپ جاتىرمىز. بۇل جۇرگىزۋشىلەردىڭ جەكە ۆەتەرينارلىق باقىلاۋ بەكەتىنە اينالىپ ءوتۋ قاجەتتىلىگىن جويادى جانە ترانسشەكارالىق ساۋدا پروتسەسىن جەدەلدەتەدى. دوستار, مەن شەكارا ترانسشەكارالىق ساۋداداعى جاعدايدى قاداعالاپ وتىرامىن جانە رەسەيلىك ارىپتەستەرىمىزبەن ۇنەمى بايلانىستامىن. قانداي دا ءبىر قيىندىقتار تۋىنداعان جاعدايدا, ءبىز ولاردى جويۋ بويىنشا جەدەل شارالار قابىلدايمىز», دەپ اتاپ ءوتتى ب. سۇلتانوۆ.
