ەل بولدىق, كەتكەن ەسەمىز قايتتى دەپ جۇرگەن كەزدە بۇل قاسىرەت مەملەكەتىمىزگە قاتەر بولىپ جابىسىپتى. بابالار ارۋاعى جار بولعان شىعار, ول قاسىرەتتەن قۇتىلىپ وتىرمىز. ەلدىڭ ىرگەسىنىڭ بۇتىندىگىن, شىعار ءتۇتىننىڭ تۇزۋلىگىن قۋ دۇنيەنىڭ جولىنا بايلاپ, ۇرپاق الدىندا كۇناعا باتۋ قانداي قاسىرەت قامىتى ەدى. ەندىگى جەردە ەلدىگىمىزدەن باسقا قۇندىلىعىمىزدىڭ جوق ەكەنىن تۇسىندىك. ءوزىمىز عانا ءتۇسىنىپ قويماي, ۇرپاقتىڭ دا ساناسىنا سىڭىرەتىن ءسات تۋىپ وتىر.
جولداۋدا پرەزيدەنت «مەن قازاقستان حالقىنىڭ ەرتەڭى ەمەس, بۇگىن باقىتتى بولعانىن قالايمىن» دەدى. بۇل اقيقات ءسوز. ءدال بۇگىنگى ءىستى اتقارۋ ەڭ ءتيىمدى شارۋا ەكەنى ءسوزسىز. سول سەكىلدى جولداۋدا شەكسىز بيلىكتى ازايتىپ, پارلامەنتتىڭ بەدەلىن كوتەرۋ تۋرالى وي كوڭىلگە قوندى. مۇنداي ءسوز بۇرىن دا ايتىلعان. بىراق ول ورىندالمادى. اتا زاڭعا دا ءبىراز وزگەرىستەر ەنگىزىلەدى ەكەن. بۇل كوكەيدەگى كوپ ءۇمىتتى وياتتى. ءۇش وبلىس قايتا قۇرىلادى, بۇل دا ارعى-بەرگى «شاپقىنشىلىقتان» قۇتقارارى انىق. اكىم قارالار بۇرىنعىداي اكىمدىك قىزمەت پەن پارتيانىڭ جۇمىسىن دا قاتار اتقارا المايدى. تەك ءوز شارۋاسىن تياناقتاۋى ءتيىس. پارتيا ءسوزى دەگەن جالعاندىقتان ارىلادى.
پرەزيدەنت ق.توقاەۆ «كۇماندى كورسەتكىشكە الدانبايمىز» دەدى. بۇل دەگەنىڭ ءار ءىستى كوزبەن كورىپ, قولمەن ۇستاۋدى تالاپ ەتەدى. ەڭ باستىسى, حالىقتىڭ جۇيكەسىن جۇقارتقان جالعاندىق ەمەس, وتىرىك كورسەتكىشتەر, بيۋروكراتيانىڭ جولى كەسىلەدى دەگەندى بىلدىرەدى. وسىنداي تالاپ ءار مەكەمەنىڭ ماڭدايشاسىندا, ءار باسشىنىڭ جەلكەسىندە تۇرسا, پرەزيدەنت ايتقان كۇماندى كورسەتكىشتەر ورىن المايتىنى حاق. ءبىر سوزبەن ايتقاندا, جولداۋدى دۇرىلدەتىپ قولداۋمەن ەمەس, تاپسىرمانى ورىنداۋمەن ىسكە اسىرساق جۇرتتىڭ سوڭعى سەنىمى ويانىپ, بۇدان كەيىنگى جەردە ءۇمىتى ۇكىلەي بەرەتىنى ءسوزسىز. سوندا عانا جاڭا قازاقستاننىڭ جارقىن جۇمىسى, اقيقات ءىسى كورىنىپ, حالقىمىز وسىلاي ءومىر ءسۇرۋىمىز كەرەك ەكەن عوي دەيتىنى ايداي اقيقات.
سۇلەيمەن مامەت,
جازۋشى-جۋرناليست
