شوقان ءۋاليحانوۆ اتىنداعى الاڭدا وتكەن بەيبىت شەرۋگە بارلىق سالانىڭ وكىلدەرى قاتىستى. ولاردىڭ ىشىندە پارتيا جانە قوعام بەلسەندىلەرىنەن بولەك, ءماجىلىس دەپۋتاتتارى, كاسىپكەرلەر, عىلىم مەن مادەنيەت سالاسىنىڭ وكىلدەرى, سپورتشىلار, جاستار جانە ەل ەرتەڭىنە بەيجاي قارامايتىن قالا تۇرعىندارى بار.
ميتينگكە قاتىسۋشىلار ساياسي جۇيەنى كەشەندى جاڭعىرتۋ باعدارلاماسىن قولدايتىندارىن ءبىلدىرىپ, ارنايى ترانسپارانتتارمەن كەلدى. جينالعاندار الدىندا ءسوز سويلەگەن Amanat پارتياسىنىڭ اتقارۋشى حاتشىسى اسحات ورالوۆ جاڭا سىن-قاتەرلەر جاعدايىندا ءبارىمىز بىرىگىپ, تاۋەلسىزدىگىمىزدى قورعاۋ, اتا-بابا اماناتىن كەيىنگى ۇرپاققا تۇتاس جەتكىزۋ باستى پارىز ەكەنىن العا تارتتى. ء«بىزدىڭ باعىتىمىز – ايقىن, ماقساتىمىز – ورتاق. ءبىز – كوزى اشىق, كوكىرەگى وياۋ ازاماتتاردى بىرلەسىپ جۇمىس ىستەۋگە شاقىرامىز! باسقا پارتيالار بيلىككە جەتۋدى كوزدەسە, ءبىز ەڭ اۋەلى تاۋەلسىز قازاقستاننىڭ مۇددەسى ءۇشىن جۇمىس ىستەيمىز! ارداقتى اعايىن, اباي اتامىزدان قالعان امانات ءسوز بار: ء«بىرىڭدى قازاق, ءبىرىڭ دوس, كورمەسەڭ ءىستىڭ ءبارى بوس». سوندىقتان, كۇشىمىزدىڭ بىرلىكتە ەكەنىن كورسەتىپ, جاڭا قازاقستاندى بىرگە قۇرايىق! ءبىز بىرگەمىز!» دەدى ول.
بەيبىت ميتينگكە قاتىسقان ۇلتتىق عىلىم اكادەمياسىنىڭ اكادەميگى, تاريح عىلىمدارىنىڭ دوكتورى, پروفەسسور حانكەلدى ءابجانوۆ Amanat پارتياسىنداعى وڭ وزگەرىستەر ەلىمىزدە ساياسي مودەرنيزاتسيالاۋدىڭ جاڭا كەزەڭى باستالعانىنىڭ ءبىر كورىنىسى ەكەنىن اتاپ ءوتتى. «پرەزيدەنتىمىز قاسىم-جومارت توقاەۆتىڭ رەفورمالارى مەن باستامالارى ەلىمىزدىڭ كونستيتۋتسياسىندا پاش ەتىلگەن قۇقىقتىق مەملەكەت قۇرۋعا جول اشاتىنىنا سەنىم مول», دەدى عالىم.
«مەنىڭ ۇلتىم – ۋكراين, بىراق جۇرەگىم قازاق دەپ سوعادى! سەبەبى مەن وسى ەلدە تۋىپ-ءوستىم, ءبىلىم الدىم, دوستارىمنىڭ بارلىعى دەرلىك قازاقتار», دەگەن قازاقستان-رەسەي مەديتسينالىق ۋنيۆەرسيتەتىنىڭ 2-كۋرس ستۋدەنتى اريانا بەلوبجيتسكايا جاستاردى ەڭ الدىمەن مەملەكەت مۇددەسى ءۇشىن قىزمەت ەتۋگە شاقىردى.
ءوز كەزەگىندە, ءماجىلىس دەپۋتاتى ەرلان سايروۆ ەلىمىزدەگى ساياسي رەفورمالاردىڭ وزەكتىلىگى مەن ماڭىزدىلىعىنا توقتالدى. ء«اربىر قازاقستاندىق داۋىس بەرۋ جانە سايلانۋ قۇقىعىن قولدانا الۋى ءتيىس. دەموكراتياعا, پىكىرلەر پليۋراليزمىنە بالاما جوق. بۇل بۇگىندە بىردەن-ءبىر ساياسي پروگرەسس جانە ۇلتتىق تۇلەۋ جولى», دەدى ول.
«قازىرگى تاڭدا بىرلىككە شاقىرۋ پوپۋليزم ەمەس, قاجەتتىلىك». بۇل – ميتينگتە ءسوز العان دەپۋتات ايدوس سارىمنىڭ پىكىرى. ماجىلىسمەن بارلىق قوعامدىق-ساياسي كۇشتەردى ارىپتەستىككە, بىرگە جۇمىس ىستەۋگە, جاڭا قازاقستاندى بىرگە قۇرۋعا ۇندەدى.
ال حالىقارالىق «قازاق ءتىلى» قوعامىنىڭ ۆيتسە-پرەزيدەنتى ماكسيم روجين قازىرگى تاڭدا قازاق ءتىلىن مەڭگەرگەن وزگە ەتنوس وكىلدەرىنىڭ, اسىرەسە, جاستاردىڭ سانى ارتا تۇسكەنىن زور ماقتانىشپەن جەتكىزدى. «مەنىڭ تۋعان ەلىم – قازاقستان. مەن, تاۋەلسىز ەلىمىزدى وركەندەتۋ جولىندا پارتيالاستارمەن بىرگە ۇلەس قوسۋعا قاشان دا دايىنمىن», دەدى ول.
سونداي-اق ميتينگتە ءماجىلىس دەپۋتاتتارى جاناربەك ءاشىمجان, ساياسات نۇربەك, دينارا زاكيەۆا, قالالىق ءماسليحات حاتشىسى ستانيسلاۆ كانكۋروۆ, جۋرناليست سەرگەي پونومارەۆ, كاسىپكەر لاريون ليان, كوپبالالى انا سانا جانداي, ءانشى يبراگيم ەسكەندىر جانە باسقالار ءسوز سويلەدى.
