تاياۋدا قاراعاندى وبلىستىق بەينەلەۋ ونەرى مۋزەيىندە ناۋرىز مەرەكەسىنە ارناپ ۇيىمداستىرىلعان «ۇلت ونەرىن ۇلىقتاۋشى» كورمە-جارمەڭكەسىندە وسى بۇيىمدار توردەن ورىن الدى.
گۇلبارشىن ماتنيازوۆا ءوزىنىڭ شەبەر شاكىرتتەرىن ورىندى ماقتان ەتەدى.
– بۇگىنگە دەيىن كوللەدجدە 80 ادام ءبىلىم الىپ شىقتى. ولاردىڭ 20-سى ەلىمىزدىڭ تۇپكىر-تۇپكىرىندە ءوز تسەحتارىن اشقان. كوللەدجدە 16 جاستان 70 جاسقا دەيىنگى قىزدار مەن ايەلدەر وقيدى. مەنەن شەبەرلىكتى ۇيرەنگەن 15 اپا بۇگىندە ءوز ىسىمەن اينالىسىپ, شەبەرحانالار اشىپ العان, – دەيدى ول.
شەبەردىڭ ءبىر شاكىرتى شىنار ءجۇسىپوۆا كيىز باسۋ كاسىبىن مەڭگەرىپ ءجۇر ەكەن. قازىردىڭ وزىندە ول شەبەرلىگىن شىڭداپ, ۇلتتىق ونەردى كەيىنگى جاستارعا ۇيرەتە الاتىن دارەجەگە جەتىپتى.
– گۇلبارشىن ماتنيازوۆانىڭ ادىستەمەسى بويىنشا بۇل ىسپەن 2020 جىلدان اينالىسا باستادىم. مۇنداي ىسكە ەڭ الدىمەن قاجىرلى ەڭبەك پەن شابىت كەرەك. ءار جۇمىستىڭ وزىندىك قيىندىقتارى بار عوي: كەيدە بۇيىمدى ءتۇنى بويى كوز ىلمەي جاسايتىن كەزدەرىم بولادى, – دەيدى جاس ىسمەر.
شىنار كورمەگە بىرنەشە جۇمىسىن اكەلىپتى. سونىڭ ءبىرى – قىزعىلت ءتۇستى شاپان. شەبەردىڭ ايتۋىنشا, كوكتەمدى, كۇن مەن ناۋرىزدى بەينەلەيتىن بۇيىمدى «كوڭىل كۇي ءتۇسى» دەپ تە اتاۋعا بولادى ەكەن.
قازىرگى ۋاقىتتا پەداگوگ-پسيحولوگ ماماندىعىن مەڭگەرگەن شىنار ەرەكشە قاجەتتىلىكتەرى بار بالالارمەن جۇمىس ىستەيدى.
– جاس ۇرپاقتى ءوز ونەرىمە ۇيرەتەمىن. مەن بالالار ويۋ-ورنەكتىڭ نە ەكەنىن, ءمان-ماعىناسىن جانە ونىمەن قالاي جۇمىس ىستەۋ كەرەكتىگىن بىلگەنىن قالايمىن. ءوز ءبىلىمىم مەن شەبەرلىگىمدى سولارعا جەتكىزگىم كەلەدى, – دەيدى ش.ءجۇسىپوۆا.
«ۇلت ونەرىن ۇلىقتاۋشى» كورمە-جارمەڭكەسىنىڭ اشىلۋ سالتاناتىندا ء«سان» كوللەدجىنىڭ ستۋدەنتتەرى ديزاينەرلەردىڭ كيىمدەرىن كورسەتتى. دەفيلەگە بولاشاق مودەلەر-كونسترۋكتورلار جانە ديزاينەرلەر اتسالىستى.
جالپى, كورمەگە كەلۋشىلەر وزدەرىنە ۇناعان بۇيىمداردى ساتىپ الىپ, ناۋرىز مەرەكەسى قارساڭىندا وزدەرىنە جانە جاقىندارىنا سىيلىق جاساي الادى. ال ماماندار جۇننەن جاسالعان بۇيىمداردى جىلدىڭ كەز كەلگەن مەزگىلىندە كيىپ جۇرۋگە بولاتىنىن ايتادى.
قاراعاندى
