تۇركى اكادەمياسى ەۋرازيا ۇلتتىق ۋنيۆەرسيتەتىمەن ارىپتەستىك مەموراندۋمىنا قول قويدى

بۇگىن, 1 ءساۋىر كۇنى تۇركى اكادەمياسى مەن ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى ءوزارا ارىپتەستىك تۋرالى مەموراندۋم بەكىتتى. بۇل تۋرالى تۇركى اكادەمياسىنىڭ ءباسپاسوز قىزمەتى حابارلادى. سالتاناتتى جيىنعا تۇركى اكادەمياسىنىڭ پرەزيدەنتى دارحان قىدىرالى, اكادەميا عالىمدارى مەن ەۇۋ رەكتورى ەرلان سىدىقوۆ باستاعان ۋنيۆەرسيتەتتىڭ اكادەميك, پروفەسسورلار قۇرامى قاتىستى. باسقوسۋدا ءسوز العان ەۋرازيا ۇلتتىق ۋنيۆەرسيتەتىنىڭ رەكتورى تىكەلەي ءتورت ەلدىڭ باسشىلارىنىڭ باستاماسىمەن قۇرىلعان تۇركى اكادەمياسىنىڭ ماڭىزدىلىعىن اتاپ ءوتتى. ال تۇركى اكادەمياسىنىڭ پرەزيدەنتى دارحان قىدىرالى ءوزى جەتەكشىلىك ەتەتىن اكادەميانىڭ كوپتەگەن شەتەلدىك ۋنيۆەرسيتەتتەر مەن عىلىمي ينستيتۋتتارمەن تىعىز ىنتىماقتاستىق ورناتىپ, بىرىگىپ جۇمىس ىستەپ جاتقانىن تىلگە تيەك ەتتى.بۇگىندە قازاقستانداعى تۇركولوگيا ماماندارىنىڭ شوعىرى ورىن تەپكەن ەۋرازيا ۇلتتىق ۋنيۆەرسيتەتىمەن ارىپتەستىك ورناتۋ ەۋرازيا كەڭىستىگىندە تۇركولوگيا عىلىمىنىڭ سونى سەرپىنمەن دامۋىنا نەگىز بولادى. تاراپتار مەموراندۋم اياسىندا عىلىمي جوبالار مەن عىلىمي-زەرتتەۋ جۇمىستارىن بىرلەسە جۇرگىزۋ, تۇركولوگيا ماسەلەلەرى بويىنشا بىرلەسكەن كونفەرەنتسيالار, سەمينارلار جانە سيمپوزيۋمدار وتكىزۋ,  تۇركىتانۋ سالاسى بويىنشا ماماندار دايارلاۋدا ەكى تاراپتىڭ پروفەسسور-وقىتۋشىلار قۇرامى اراسىنداعى عىلىمي-ادىستەمەلىك بايلانىستى ورنىقتىرۋ, تۇركىتانۋ بويىنشا ماگيستراتۋرا جانە دوكتورانتۋرا جۇيەسىندە ماماندار دايارلاۋدا ۋنيۆەرسيتەتتىڭ  اۋديتوريالىق قورىن  بىرلەسە پايدالانۋ, تۇركىتانۋ ماماندىعى بويىنشا ستۋدەنتتەر مەن ماگيسترانتتاردى, دوكتورانتتاردى وندىرىستىك جانە وقۋ تاجىريبەسى مەن عىلىمي تاعلىمدامادان وتكىزۋگە مۇمكىندىك جاساۋعا كەلىستى.  «18 مامىر كۇنى كونە تۇرىك جازۋى كۇنىنە ارناپ حالىقارالىق فورۋم وتكىزگەلى وتىرمىز. وعان الەمنىڭ تانىمال تۇركولوگتارى كەلەدى. سونىمەن قاتار, ءتورت ەل اراسىنداعى ارنايى حالىقارالىق كەلىسىمگە ساي اكادەميا اياسىنان ماگيستراتۋرا مەن دوكتورونتۋرا بولىمدەرى اشىلادى. بۇنىڭ سىرتىندا ءبىزدىڭ جوبالارىمىزعا شەتەلدىڭ 170-تەن استام بەلگىلى عالىمى قاتىسىپ جاتىر. سول اكادەميكتەردىڭ الەۋەتىن ەۋرازيا ۇلتتىق ۋنيۆەرسيتەتىنىڭ ستۋدەنتتەرى تولىق پايدالانا الادى», — دەدى دارحان قۋاندىق ۇلى. ەۋرازيا ۇلتتىق ۋنيۆەرسيتەتىنىڭ رەكتورى ەرلان سىدىقوۆ  18 مامىر تۇركى جازۋى مەرەكەسى كۇنىن اتاپ ءوتۋ باستاماسى ەۋرازيا ۇلتتىق ۋنيۆەرسيتەتىندە كوتەرىلىپ, قولداۋ تاپقانىن جەتكىزدى. «تۇركى اكادەمياسىمەن بىرىگىپ اتاۋلى كۇندى ابىرويمەن اتاپ ءوتىپ, الداعى ۋاقىتتا يۋنەسكو-نىڭ مەرەكەلەر كۇنتىزبەسىنە قوسۋ جاعىنا قولعا الۋدى ۇسىنامىن»,- دەدى ەرلان باتتاش ۇلى.  تۇركى اكادەمياسىنىڭ پرەزيدەنتى دارحان قىدىرالى بولسا «تۇركى جازۋى كۇنىن اتاپ ءوتۋ تۋرالى قازاقستاننىڭ يگى شەشىمىن تۇركى كەڭەسى قۋانا قۇپتاپ, تۇگەل تۇركىگە ورتاق مەرەكە ەتۋ جايىن ءبىراۋىزدان قولداعانىن» اتاپ ءوتتى. جالپى, ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى اشىلعان كۇننەن بەرى تۇركولوگيا سالاسىنىڭ دامۋىنا ەرەكشە كوڭىل ءبولىپ كەلەدى. كۇلتەگىن  ەسكەرتكىشى كوشىرمەسىنىڭ  دە ەڭ العاش ءدال وسى ۋنيۆەرسيتەتتەن ورىن العانىن ايتا كەتۋىمىز كەرەك. داستان كەنجالين. دەرەككوز: تۇركى اكادەمياسى. فوتو: تۇركى اكادەمياسى.